整個中國網絡遊戲公司今早都受這篇文影響，咁篇文究竟講左咩? 篇文長達5500字，我都用左唔少時間去睇+諗。內容主要係記者做左調研(即係調查)，走訪幾個省市去研究手遊對青少年影響，當中好多個別事例去講遊戲害左幾多細路，包括有人唔食飯儲起屋企人俾既錢去買手機打機，就算屋企人扑爛左佢5-6部手機都阻止唔到。有個屋企人禁打機就2樓跳落街離街出走，之後屋企人唔敢禁，有幾段係呢類個別例子。另外，佢有用數據去指出手遊有幾危害，以問卷調查有幾多人有打機，打幾密，派左2千幾份問卷收返千幾份，同埋強調D人答問卷係無如實答，係特登答少D，實際情況更惡劣等，整篇文個感覺都好似係一份手遊業沽空報告一樣。
當中有引用上市公司騰訊數據表示發展成千億產業是不合理(其實我唔明有咩不合理)，另外最有趣又係見到有近視率呢個統計，其實之前2018年打壓手遊果陣都有見過(下面163.COM果篇文)。2017-18年官方媒體都有出文打壓過手遊業，今次都係延續果次既打壓，睇返下面連結，比較返今日篇文，其實內容都好相近。成篇文都係講青少年。
2017/07/04, 官媒狠批騰訊《王者榮耀》「陷害人生」，誤導孩子價值觀歷史觀
2018-05-30，新華網(官媒)- 多少道檔才能管住網游對少年兒童的戕害？
2018年4月12日，騰訊蒸發千億，兇手竟是小孩沉迷遊戲！
所以，這篇文可以話係無咩新嘢，市場之前已經見過。市場都了解或知道，我早前都寫過，2020年疫情期間，學童無得返學要上視像課，在家沒得外出的日子，網遊成為大多數人的娛樂之一，學童更加多。在家唔打機，都可以做其他野，例如睇電視既節目，睇書(應該少)，咁打機好自然人數增加，你唔俾佢地打機咁做咩好，畫畫彈琴在家運動? 呢D只係家長想小朋友做既家中活動，但小朋友未必有咁大興趣。可以限制佢地打少D，但文章入面未見有其他建議活動俾青少年去取代打機呢個活動。主要都係講打壓，甚至連遊戲公司開支都有提到，用左好多錢去宣傳推廣，呢方面都要限制。
想講下篇文入面有錯誤地方，文中提到2020騰訊網遊收入係1561億人民幣，但唔係全部都係來自中國，騰訊之前收購幾間外國公司入賬係包括這些公司，騰訊海外市佔都高，所以有部份收入係來自海外，不過騰訊未有拆開各地區收入佔比。增長亦都唔係全部來自國內，有唔少估計係靠海外市場推動。
騰訊2020年報有提到，18歲以下未成年人士對佢地中國地區網遊收入佔比只係6%，未夠16歲既只係3.2%。所以限制學童打機對騰訊影響其實好細。
沉迷打機現象全世界都有，美國其實更誇張，睇SENSOR TOWER數據(下圖)( US grows to account for 28% of all 2020 mobile spending - Sensor Tower | GamesIndustry.biz) ，美國手遊市場在全球佔比每年都增加，反映美國網遊市場增長比中國更高，更多人課金，雖然這裡沒有年齡數據，但由上面騰訊資料都估計到課金主力係18歲以上成年人。雖然中國政府防止青少年沉迷手遊，但不是主要課金群成年人，對上市公司影響不會太大。可能有人會擔心，如果細個俾人限制打機，大左會唔會少打機少課金? 我無做過研究證明唔到有冇關聯。短期黎睇，就算限制學童打機，對遊戲公司影響也是不會太大，市場認定會有大影響而今日瘋狂沽貨是不理智。
宏觀地分析這件事
中國政府突然連番打壓科技股既原因我就不便公開揣測，不過可以講下已知既數據，科技股中騰訊這類公司是盈利能力極強既公司，5月30日有寫過SAAS公司員工開支佔收入比，(20+) Edward Lee發掘十倍股 - 帖子 | Facebook，其實我有MARK埋騰訊不過無貼出黎。騰訊每名員工成本係金蝶既幾倍，達到每名員工每年開支係135萬，不過員工開支佔比只佔公司收入的14.5%，遠比金蝶76.8%低。代表騰訊在科技界是暴利行業公司，有大量資源吸引科技界人才加入(因為賺更多錢，可以給予人工更高+福利更好)。反映既係騰訊吸走好多人才去做手遊導致其他軟件公司缺乏人材的不平衡現象出現。大家會見到中國軟件業發展一直偏向某一邊，這是同市場有關，客戶越多既地方自然越賺到錢自然吸引更多人進入這個市場，軟件有分好多類，消費類係一類例如網購，娛樂係另一類手遊/串流平台，仲有一類係工作類，其實手機OS(操作系統)都算係這一類。
太過偏向一個類別係會影響其他類別，手遊市場大又好肥，果邊人工高，工作類軟件這邊市埸好細，你係唔會有能力用同樣價錢請到一個人才返黎，佢好自然會走左去做手遊相關開發。所以如果限制手遊發展，係有機會對其他軟件開發公司有利，手遊減肥，人工減低，人才自然會流去其他軟件公司開發其他類型軟件推動返其他行業發展。但今次集中針對佔手遊業只有6%既消費者，未必對整個軟件業有太大影響，這是一個宏觀既理解。
最後都係要講返投資
手遊股搏反彈是可以，急跌會彈是必然，但我個人操作手法就很少會搏反彈，我喜歡低風險下賺錢，有人可能會覺得急跌之後風險已經降低左好多，再急跌機會不大，係合理既預期。不過我會更穩健地選擇股價穩定返先買，上次騰訊急跌之後反彈係有人單日賺到錢，但咁樣係搏，不是我投資風格，詳細買賣建議都係留返係收費欄講，8月會有一周年活動，正在籌備中。
沒有留言:
張貼留言