2020年7月11日 星期六

<開收費前送大禮> 手遊行業




手遊,一個周期性行業,係今年上半年最受關注行業之一。因為佢不受疫情影響,還得益於疫情,無得出街玩,係屋企玩手指,呀唔係,係玩手機GAME。

睇返張圖,我係根據2019年全年公司手遊收入做排名,單位係億港元(張圖漏左)。 最左邊果行係Sensor Tower數據(最底參考資料1),2020年6月中國手游發行商在全球App Store 和Google Play 的收入排名。有D無排名,例如中手游,因為收入分散係唔同子公司,佢只計發行果間公司,收入少所以見唔到。睇返有排名既,其實有D 6月排名高,但整體2019手遊收入排名低,有部份原因係有D公司可能係主要平台以外既其他平台收錢,所以計唔到。有D可能係公司單月收入高,但全年唔係。有D就新遊戲增長強,推高左排名。

講下股價升幅,今年1月1至7月10日,各手遊公司升幅都唔錯,龍頭騰訊+45.9%,網易美股+58.9%,三七互娛A股+83.4%,升左咁多,係咪就唔值得再講,又未必。十倍股都唔會一年升哂十倍,升左都可以繼續望下,等個靚位入就OK。由於我多數睇港股,A股果D我唔太熟,A股D數據做個參考睇住先,再者A股市場估值都比較高。

手遊股其實有個特色係,每間公司都唔同構造,有d公司可能1-2隻GAME佔大部份收入,例如IGG(0799),《王國紀元》一隻遊戲佔成間公司收入80%(最底參考資料2,3),公司股價就同呢隻遊戲收入畫上等號,呢隻遊戲剛剛出既頭一兩年,越黎越多人玩+課金,股價就一直升(《王國紀元》2016年中推出,2016年中至2017年初至年尾果段),但當遊戲成熟,新加入玩家與舊玩家流失達到平衡,收入無增長,股價橫行浮沉(2018年果段),到晚期,遊戲無乜新玩家玩,舊玩家玩厭左,棄GAME多,收入下跌,股價一直跌(2019年),所以股價=遊戲周期。單一雖然風險較大,但亦都機會多,一隻爆升推升成間公司股市。單一遊戲,我只要睇住果隻遊戲排名一直向上升,我就知道有好多人課金,比較易跟蹤。公司收入增長一定高於整個手遊市場收入增長平均值,公司多遊戲,收入分散就會好貼近平均增長。

至於最近IGG出左新既遊戲,公司在3月業績會曾經指今年上半年會推10隻遊戲,不過要知道果D新遊戲收入情況有點難,因為通常都要俾錢先睇到數據。近期IGG強勢,肯定同王國紀元無關,因為我見佢中國國內IOS暢銷排行第55-60位,一直跌緊,當然佢隻遊戲唔只國內有,全世界都玩到,你要搵資料就更難。我估強勢原因同佢新GAME有關,不過真係無咩數據,其他網站投資者都係希望王國紀元收入唔好下跌得咁快,等新遊戲收入增長推高整體公司收入。如果公司有返增長,估值當然可以提高返,而家IGG係大公司之中P/S或P/E估值最低,如果要追落後,股價都會好勁。

少量遊戲佔公司大部份手遊收入既公司仲有網龍、友誼時光。友誼時光6820今年上半年股價升幅真係好驚人(見表),主要係佢今年年初出左隻好強既新手遊<<浮生為卿歌>>,曾經打入中國國內IOS暢銷排行TOP10之中,有新聞指單月收入可達2億人民幣。(最底參考資料4), 當然唔會個個月都可以排TOP10入面,最近排名一直下降到20左右,但如果計埋公司既其他遊戲,平均每月有2億收入,一年都24億,相對上年18億收入,都增長33%。所以股價升得比較快,因為有高增長,類似2017年既IGG情況一樣。友誼時光算係一間幾特別既公司,佢標榜自己做女性向手遊,針對女性玩家,打機呢樣野通常都係男性多,佢就專做大家認為小眾既女性市場,但又俾佢做到好好成績,佢做宮廷類手遊為都幾受歡迎,<<浮生為卿歌>>就係呢類。市場上都有好多宮廷類手遊,佢可以從中脫穎而出其實有佢既實力,我本身無玩過,但睇其他人評價都係指佢故事性好,同埋佢切合到女性需求,例如玩家角色設計自由度好大,個樣可以自己整到好多種,另外衣著方面亦都俾玩家好多選擇,吸金能力所以好強。

另一類公司例如騰訊/網易/中手遊,佢地本身遊戲就有好多好多類別,雖然騰訊都係靠王者榮耀同埋PUBG(食雞)兩隻GAME為主,但佢仲有好多好多唔同遊戲,分散度較高(雖然我覺得王者榮耀同埋食雞如果收入減少,騰訊手遊收入都會明顯增長放緩),呢類公司收入波動性會較少,即係類似恆生指數,有50隻成份股,雖然有幾隻佔比達10%,龍頭果幾隻大跌都會拖低指數表現,但風險就分散得比較高。不過呢類公司有另一個問題,就係難以跟蹤,網上有免費資源可以睇到TOP 20 / 30課金手遊排名,如果公司D遊戲每隻收入不高,太分散,就上唔到榜,你會比較難監測到果間公司收入變化。

想講講一隻比較特別既公司,巨人網絡,2006年巨人網絡靠端遊《征途》起家。2006年巨人改變了中國網游的收費模式:在《征途》之前,《傳奇》《奇蹟》《騎士》等遊戲都採取按時計費的方式,需要購買點卡才能繼續遊戲,而《征途》玩家可以0成本玩遊戲,只需在購買道具時花錢。係第一個用錢買道具既公司(新聞咁講),2007年巨人去左美國上市,市值排左BAT(百度BABA騰訊)之後,但而家市值只有500億HKD,相比騰訊5萬億市值,騰訊係巨人既100倍。一時風光不能持續下去,所以要持續增長,都要睇好多野,例如有冇其他軟件配套形成一個生態圈,例如騰訊有QQ有微信,有幾億用家,佢一出遊戲就可以係呢D平台上宣傳,好易就接觸好多人,所以一直都好多人玩,形成護城河。當然巨人創辦人史玉柱都係好勁。

未來半年有咩新推動力推動手遊股上升? 都係新遊戲推出,暑假嘛,遊戲推出高峰,7月尾有ChinaJoy(中國國際數碼互動娛樂展覽會),會有好多廠商推新遊戲,但新遊戲初期唔會太多人俾錢,免費下載,俾人升LV升到某個程度之後,再升就要收錢買道具或裝備去升LV,所以越玩得耐先會越願意(或者被逼地)俾錢,因為佢地本身投入左好多時間係遊戲上,花費左時間玩唔想停,但又想玩得強就要俾錢買裝備。

初期好難知邊隻遊戲爆到出黎受歡迎,ABCDE5隻遊戲,就算口碑好,都未必多人課金,無人留意既GAME都可以突然爆出黎勁受歡迎,所以好多不確定性,好似電影咁,大製作未必票房好,小本製作都可以好多人鍾意睇,一種藝術。 所以短期睇股價圖做參考,可能更有價值。至於各股股價圖應該點睇,留待收費欄再教大家。

最後,俾number嘛,有睇開我page/gp既朋友,有d都估到我年初有提過友誼時光(6820),我當然有貨,利申左先,至於友誼時光黎緊有咩利好股價既消息

1.中期業績盈喜,上半年盈利一定大幅增長,不過盈喜唔係一定要發,所以我唔能夠保證一定有發盈喜 
2.加入港股通,IGG,中手遊(302)都係之前入左港股通,友誼時光要到3蚊先夠市值60億,6月整個月佢都到左,有機會9月港股通檢討果陣入,但我不能保證入硬,只係佢符合條件。
3.新遊戲突出,<浮生為卿歌>唔知仲可以KEEP到幾耐,而新遊戲<此生無白>1月已經獲廣電批准,但公司一直都未出隻遊戲,估計7月底ChinaJoy推出,公司籌備已久,希望有好成績

再利申多次,本人持有友誼時光(6820)

最後,真係最後,最近香港肺炎疫情再次爆發,大家小心及注意環境清潔,做足防護措施!


2.「王國紀元」收入佔整體八成 (2020年3月5日12:36)

3. IGG上半年收入3.88亿美元 《王国纪元》贡献超八成 (2018-08-09 09:17)


2020年5月20日 星期三

小米 (1810) 2020 Q1 業績簡析



小米1810,第一季業績
總收入增長13.6%...
主要係手機收入增得OK~
互聯網服務收入增長都勁....
主要靠遊戲收入15億+80%.
仲有 有品電商平台、金融科技業務、電視互聯網服務以及境外互聯網服務所產生的收入, 同比增長71.5%

收入都係谷出黎,最緊要係毛利,睇返公司解釋,以下係引自公司業績

智能手機分部毛利率由2019年第一季度的3.3%升至2020年第一季度的 8.1%。2019年第一季度正處於我們境外市場的產品切換期間,我們為籌備於2019年2月 底至3月推出的新款智能手機而對部分智能手機型號進行了促銷,造成了該季度較低的 毛利率。我們在2020年第一季度發佈的Mi 10和Mi 10 Pro等數款熱門機型憑藉其優越的性 能深受市場歡迎。發佈新產品後我們智能手機業務的毛利率於2020年第一季度上升。

IoT與生活消費產品分部毛利率由2019年第一季度的12.0%升至2020年第一季度的13.4%, 是由於毛利率較高的IoT產品的收入佔比增高所致。

互聯網服務分部毛利率由2019年第 一季度的67.4%降至2020年第一季度的57.1%,主要是由於遊戲及其他增值服務業務的收 入佔比上升,而這些業務的毛利率比廣告業務毛利率低,及我們的金融科技業務毛利率 下降所致。於2020年第一季度,受疫情影響,我們增加了金融科技業務的減值撥備。

睇返前幾季度手機毛利率就見到D變化
智能手機毛利率
2018Q4係6.1%
2019Q1係3.4%
2019Q4係7.8%
2020Q1係8.8%,

係上年Q1太低,今年Q1係提高左,而且手機毛利率一直上升緊,所以毛利增長好高,應該同佢越賣越多高價機影響,所以手機毛利增長咁勁....

IOT都係靠高毛利率產品推高毛利增長

銷售開支同毛利增長差唔多,
行政開支都增長高,
研究開支增長慢都慳到D錢

唔計其他雜項利潤增長都靚

小米而家係靠提高毛利率去增加利潤...
我睇到就係咁,大家可以再深入睇...
呢隻我本人興趣不大....所以唔寫咁長了

2020年5月10日 星期日

舜宇光學 (2382) 大行預測與實際值的研究


增長,增長,增長,呢句係百倍股果本書(100 Baggers: Stocks That Return 100-to-1 and How To Find Them)入面第2個原則 (第1個原則係你必須以100倍做目標,唔係1倍唔係2倍)

但係問題來了,以往既增長,有哂歷史俾人睇,好易睇到,但未來增長呢? 大家都知好難預測。點先知未來增長係幾多? 以前每年增長30%,未來3年都一定會係? 唔一定架嘛

咁咩人係有方法預計得到? 公司ceo? 佢最熟公司,咁照計最有可能計到果個就係佢,但佢預計到都唔會講出黎 (美國大公司有未來1年業績指引算係一個預測,香港無),但就算美國公司自己既預測都唔係準,佢都會不斷調高 (其實無人要求公司講出黎個預測一定要準)

再者,ceo都未必預計得到 (叻果d ceo會預計到有市場機會,會提早部署,但部署都可以錯/唔足夠),咁ceo果d我地無資料做back test....咁最公開既又可以知到個預計值可以做back test既,得返大行既分析報告。

咁今次我就係想研下,成日做開預測既大行,資源最多既分析員,係曾經十倍股上預測係點?

所以我拎左2382舜宇光學呢隻曾經100倍股,做研究對象,因為佢市值大,多大行會跟(其實百倍前d日子無咩人跟),我由2015年開始睇,太舊既時間太少資料。呢隻雖然大但報告都唔算特別多(我只有中資行既source)。其實應該睇多幾間,不過寫住一間先。今次我只計2015-2016年大行報告,因為舜宇2014-2018年升得最快,2016年既報告會預測到2018年。我知得7份報告係比較少,不過資源有限,無辦法。

入正題,以下呢個表係大行收入預測vs實際值


由於我個Source主要係中資大行,所以資料有限,但我估同外資大行差別不大

1.2015年收入,實際收入高出預測收入4-5%,唔算差距好大
2.2016年收入, 係2015年做預測既大行差距比較大,實際值高過預測值20%, 2016年做預測既,越接近年尾,大行估計相對差距較少。平均值上,實際高於預測7%, 因為出左上半年數相對易估下半年數,所以全年數會較接近實際值。
3.2017年收入,2015年預測既,實際遠高於預測64-72%, 2016年預測既,實際值高於平均預測值42%,差距是超大
4.2018年收入,2016年預測既,實際值高於平均預測值42%,同樣差距超大

再睇利潤

1.2015年利潤,實際利潤高出預測平均8%,唔算差距好大
2.2016年利潤, 係2015年做預測既大行差距比較大,實際值高過預測值47%, 2016年做預測既,平均值上,實際高於預測16%
3.2017年利潤,2015年預測既,實際遠高於預測187%, 2016年預測既,實際值高於平均預測值106%,差距是超大
4.2018年利潤,2016年預測既,實際值高於平均預測值44%

股價升幅與收入/盈利升幅及實際值高於預測值百分比關係圖

近5年,除左2018年,舜宇都係盈利增長高於收入增長,而股價增長同樣除了2018年,股價增長都大於盈利增長。亦都反映公司估值(P/E)越來越高。主要係公司盈利增長一直超預期,特別係2017年大超預期,所以股價增長最大,兩個原因1.盈利超高增長,2.盈利增長遠超大行,市場對公司前景更樂觀,給予更高估值水平。但2018年好似有D奇怪,實際值都係高於預測值超過40%,但股價跌得多過盈利倒退百份比,因為我既大行報告只去到2016年,可能係2017-18年,大行對公司期望更高,但實際數值低過預測值,所以係我數據出左問題。

結論

對於高增長既公司,要估未來3年收入同利潤係極其困難.對於收入來說,2015年去估2017年收入,大行低估左40%,2016年去估2018年,低估33%,利潤果邊,2015年去估2017年利潤,大行低估左64.8%,2016年去估2018年低估31%。

其實,就係因為大行估得唔夠高,如果大行估到舜宇2017年有咁高收入同利潤,2015年就唔會係呢個價。

而圖表亦都見到,收入,盈利增長係肯定帶動到股價增長,但要係高於市場預期既大型股,中小型股股價增長有機會低於盈利增長幅度。不過都同市場預期有關,只係中小型股無/無乜大行報告,你唔知佢地預期幾多。

而事實上,又係唔係要真係估得中幾高盈利增長先賺到十倍回報呢? 或者舜宇增長低D,咁個故事會係點? 其實佢增長唔係之前咁強,只係股價十倍既時間會延長左,唔係2年幾就完成(最遲係2016年2月前仲可以17蚊以下買到舜宇,2018年6月就17X蚊,十倍),增長無舜宇咁高既公司,就要5年/10年時間或更多時間,坐耐D。不過耐性又係一大難題。

咁所以,要達成十倍股價,2個因素,
1.收入要高增長,而盈利增長不能低於收入增長,一定要高於甚至遠高於收入增幅,呢個要睇公司商業模式。即係如果估值無提高無降低既情況下,盈利至少要增長10倍。(虧損科技股同生技股或新經濟未有利潤行業,是另一個計算方式)

2.估值提高,呢個要靠公司增長高於市場預期,如果市場一早預期你極高增長,但你只有高增長,股價有好大機會跟唔足。估值有提高,盈利增長可以唔洗10倍都做到股價10倍,如果估值下降,盈利就要多過10倍增長。

以上既內容可能有人覺得阿媽係女人,我係未講到如何能預測公司未來盈利增長,但呢個無得教,因為每間公司都唔同,要有遠見,即係手機未有雙鏡頭之前,你已經要預計到舜宇受益雙鏡頭而有盈利大增的機會。呢樣係要想像力+對行業認識+唔係諗D無咩機會發生既野,例如某某公司會出個破天方既產品,即係乜?唔知,要實際有好大機會發生既預測,而唔係幻想出黎既事物。



2020年5月9日 星期六

十倍股D市盈率係點? 曾經十倍港股市盈率統計數據

頭先睇左個youtuber講P/E...市盈率.......
應該係投資者常犯十大錯誤觀念之一
其實市盈率呢個野,我應該講過好很多次....
總結就係市盈率參考性係零

不過見人講左D point,我又屎忽痕走去驗證一下
佢個point是咁的, 市盈率高於15倍會有加分~
因為市場認定呢類公司有前景,先會俾高市盈率
我理解佢意思是咁~

咁我就屎忽痕拎返之前整既曾經10倍股做個check~
不過我只有港股數據,唔完善~(應該睇埋中美市場)

而且我係懶唔夠精準.....所以呢個圖,大家有個概念好了~



實際數字要再花時間調較~不過.......有需要先再算
正確應該係統計升果段入面,D公司既P/E......

幅圖是咁的,我拎返2013年12月底至現時曾經出現過10倍以上升幅既股票,大約7x隻... 然後剔走d最高價唔高過1蚊既細股~(最低價係仙既仙股有keep), 高位前一個月日均成交額少過100萬既剔走(易俾人做高), 市值無考慮高低(升左10倍以上都唔會低得去邊), 所以入面有妖股,有正常股......大約70隻

由於曾經10倍過既股票都擺係度,所以假如佢2017年股價見頂, 之後跌左一半,佢2018,2019年底個P/E都係會KEEP埋一齊做統計~即係升緊果段同跌返落黎果段既P/E都有計~(懶,其實應該只睇升果段)

我係計每年年底個P/E.....

個統計數字就係咁,3段P/E既公司數目差唔多,虧損,P/E 0-15,P/E大過15既公司數目都好相近,除左明顯虧損既公司比較多之外,唔覺有明顯偏向高P/E....虧損果D大部份都是妖股......(香港唔同美國)...2018年虧損果D有阿里影業,阿里健康(最近勁升啦), 鼎益豐,光啟科學呢D....

咁0-15倍P/E果D係咩公司? 年年唔同我同樣抽2018年講,有內房....恆大,融創,新城發展,中國奧園果D, 賣車公司,中升,美東,春立醫療都係0-15

15倍以上,舜宇,金斯瑞,頤海,丘鈦,中海物業.. 

其實,我只想帶出,咩P/E都好,都可以有10倍股,係咪低P/E或高P/E,股價就會一定升得勁? 
同一堆低P/E股,係咪全部都會升返上去變正常P/E? (NO~) 
高P/E股係咪就會一定股價大升? (NO~)

我想強調舉單一股票或者就算舉十隻股票出黎做例子,都變成偏見(BIAS)... 或者好容易犯左一個好多投資者都犯既錯誤,以偏概全~

即係見到A公司股價勁升,佢P/E一直高喎,咁買同樣一直高P/E既B公司都一樣勁升啦~買買買 錯哂~

一個選股準則,係要經過統計學去驗證先可以叫做一個正確既投資準則,即係所有股票都要睇係咪有超過一半既公司都成立

如果一個準則,例如低P/E既公司會較大機會有10倍股,呢一個假設,經過統計數據驗證過係錯既... 咁佢就唔係一個正確既選股準則


不過我呢次都無全部將全部公司納入統計範圍,只納入曾經十倍既股票,只有70隻,係偏少,所以我話呢個表參考下算,有時間應該係將全部股票升果段既P/E去做一個統計,但由於超大工程,要花唔少時間.....但我覺得結論唔會偏差太遠....

之前篇文都用AMAZON舉例講過會計上利潤唔一定係真正利潤
咁所以P/E未必係真正既P/E....
所以直接睇P/E.....用途不大........
至於要睇乜? 

我慢慢糾正返大家D錯誤觀念先再講啦~

2020年5月7日 星期四

利潤是陷阱? 虧損反而是寶物?

我今次想講既係利潤的陷阱
以前我地睇書學買股票...
好多時d人都係教人睇P/E...
間公司一定要有利潤先好投資
P/E低先係平...我都係睇呢D書大
而且我一開始學就係睇呢D
所以深信不疑,而且都有見過唔少低P/E股勁升既經驗
(買就好少買得中,呢個係我自己問題,遲D再講)
但當投資經驗多左就發覺,P/E低既香港股票70%都係伏(而家可能有80-90%)
至於點解,呢個又真係可以有排講...今日唔講住

點解我講"利潤"會係一個陷阱?唔通虧損先係好野?
有D公司明明連續多年虧損,但股價一直長升~
或者每股盈利好低,估值超高,一直KEEP住幾百倍P/E
但可以升幾倍.....
呢類公司主要出現係美股,仲要係科技相關既公司
相比起香港果D低P/E股,可以幾年都唔升,得波幅~
我今次會以amazon做例子,呢個網幾好,有齊哂d數
https://www.macrotrends.net/stocks/charts/AMZN/amazon/revenue
我都係cap佢入面d數做圖


點解會有呢種奇怪情況? amazon賺得咁少錢,估值可以咁高,幾百倍P/E?

主要係會計制度上利潤並不等於真正利潤...
amazon 有好多開支係Depreciation(折舊),不是真正現金支出
2015年公司淨利潤(net income) 596million usd
2015年 公司Depreciation(折舊) 6,281million usd
2015年公司經營現金流(cash flow from operating) 12,039millon
2015年公司自由現金流(free cash flow) 7,347.6millon
2016年3月公司市值約282,600million (股價$600)
見唔見到,個折舊加返落淨利潤,6,877million,已經好接近自由現金流
公司市值除以自由現金流,只係38.5倍
而當時公司市盈率約474倍...
看到分別了沒有?



另外,仲有一個因素係令公司股價勁升4倍...
收入......
2015年底,公司收入107Billion
2019年底,280.522Billion
+161%......等於107*2.6...
如果2016年3月股價係600...2020年3月應該至少1560
3月中大跌果陣,公司股價最低1626....
看到關係了嗎?



我無cap佢2019年利潤率同利潤,大家可以上頭先個網睇
只要收入膨脹, 開支增長慢過收入增長(公司營運趨成熟),
利潤率就會升得好快...利潤好快由低轉高....
而家公司虧損或賺得好少(利潤率好低)
但好快公司就會利潤率爆升,利潤上升
Tesla,都係呢個原因...(當然仲有公司自己其他原因)
其實呢單野同負油價一樣,人類對於負數既概念基本上係無....
虧損就係負數,負概念,轉正數既影響有幾大,好少人可以理解...
特別上係會計上既概念好多人都唔熟....
我估上面我講幾個Term都無咩人知係乜(有讀過下就一定知) 

今日寫住咁多先,已經好長~
其實篇文入面有好多野要解釋返
呢d真係拍條片講方便過打字...
因為真係好多野要解釋同講......
唔好以為蝕錢公司就一定係好
唔好以為蝕錢公司就一定係好
唔好以為蝕錢公司就一定係好
上面只係一d適用於某d公司既例子
仲有好多其他因素要去睇先可以判斷
真係講唔哂,唔明再問,遲d真係要拍片解釋
一陣你地誤解左蝕錢就係正野就大獲~
總之,之後再補充,理解左先好去投資

2020年5月2日 星期六

Poker 與 投資

網上面都有好多人寫過,甚至拍過片去講Poker 與投資既相似地方,至於我點解又要寫Poker與投資,主要係因為睇左日本散戶股神cis講佢有玩開poker(其實佢打麻雀多過玩poker),而美國股神buffett(巴菲特/畢菲特)亦都好鍾意玩poker。就令我諗到poker同投資/投機都一定有好大既聯繫

另外我前兩個月睇左一本書,叫<Thinking in Bets: Making Smarter Decisions When You Don't Have All the Facts> by Annie Duke, Goodreads 評級3.8分(唔算好高分)。中文版:「高勝算決策:如何在面對決定時,降低失誤,每次出手成功率都比對手高?」,睇完啟發到我要寫下呢個題目,當中有句幾有意思,生活是扑克,不是象棋。其實人生好多決定都係You Don't Have All the Facts之下去Make Decisions。最簡單,就好似你同唔同某個人拍拖/結婚/生仔,都係You Don't Have All the Facts。 不過當時睇書諗到既野,而家有D唔記得左,所以我會再睇返本書,遲下諗到D咩野會再補充返。
https://www.goodreads.com/book/show/35957157-thinking-in-bets

作者:Annie Duke,中文版介紹佢果段其中一部份係咁寫:  「曾於職業撲克玩家生涯贏得世界撲克大賽金手鐲,是唯一獲得世界撲克冠軍聯賽NBC國家撲克冠軍杯單挑賽冠軍的女性牌手。」所以,值得睇睇。書唔多介紹了,留返下次。

今次唔係書藉介紹,入返正題,Poker 與 投資,首先介紹Poker玩法,網上有好多片教,有玩過既可以skip左睇片呢part。搵左條片係一隻手遊介紹poker玩法,6分鐘,唔識既可以睇左先。https://www.youtube.com/watch?v=my5bEyyzD58
另外有條片係拍俾新手睇,我覺得會更清楚
https://www.youtube.com/watch?v=GLPa_3iRoio


簡單d講,poker就係玩家,與其他玩家對賭既遊戲,真正既zero sum game,即係類似麻雀,無人係中間抽佣的話,你賺既錢就係其他對手蝕既錢,每局只有一個贏家。 玩poker面對既難題,亦都係投資上會面對到。

玩Poker經歷既係d咩,投資又會經歷d咩?

1.不完整的訊息
Poker每次開局(派左2隻牌但未開牌就已經唔跟住果下唔計開局啦,雖然果陣已經算係開始左),出面只有3張已公開既牌,仲有兩張未出是未知既牌,一輪下注後先會再開餘下兩張。開始時候手上兩張牌+上面3張牌,可以預計自己當時既勝出機會率,但隨住其他兩張牌開出,會扭轉你預計既勝出機會率及對手勝出既機會率,可以增加或者減少。另外就係對手牌型訊息,基本上最初開始唔會估到,之後可以憑對手跟注/加注金額去估對手既牌係乜,但對手都可以係無靚牌加大注去令你以為佢有靚牌,例如最後一輪下注ALL IN。 面對既就係不完整訊息下,如何安排合適既賭注。

投資上面對是更多不完整既訊息,你知既可能只係公司年報,至於公司內部運作情況,除非你認識內部工作既人(當然是高層),否則可知既資料很少,另外就係新聞,或者是分析員寫既報告,如果係面向大眾銷售既公司,會知道佢既產品/服務,但如果面向機構客既,例如賣水泥,你可能要識行內既人,先會了解到公司產品/服務。Poker只係面對幾隻牌,投資是面對很多種不同方面既訊息,複雜好多,所以訊息取捨是一個好重要要解決既首要問題。(呢個應該要教大家)

另外,股價變化都係不完整訊息,你唔知道誰在買,買既理由係乜,總共買幾多。好多時股價上升,有人就會覺得有人知道左公司有利既消息,而掃貨。相反股價急跌,會令人以為有人知道公司不利消息沽貨。類似手上無靚牌ALL IN嚇人既動作,你睇股價變動/睇到人ALL IN係唔能夠100%保證到D乜,你要去估。有人掃高股價,可以製造投資者對公司有樂觀感覺,亦都可以沽到低一低令人覺得公司前景悲觀(特登沽低情況是較少),點樣面對呢類情況? 有人可能靠技術分析,有人可能靠經驗,或者有人選擇不理會股價短期變動(例如有人話股神buffett係唔理既),所以一切都係策略,要預早去部署。

2.下注的多少
由於規則是小盲開始下注,每局首個下注既人都唔同,而最重要是最尾果位玩家有冇加注,而每個玩家要做既決定是加注/跟注/唔跟注。所以,每個人都是在不完整訊息下控制注碼,而如何下注賺到幾多,都是一門藝術,假設你開左3隻牌,你係砌到最大既葵扇同花順,100%贏硬, 你會唔會即刻就all in推哂D錢出去,一定唔會,其他對手會俾你嚇到唔敢跟注,就算有一兩個跟,你都賺唔哂其他對手既錢,你要做就是引佢地跟注跟到最尾先ALL IN。

股票上,大戶(或者叫做莊家?) 都有用到類似Poker技巧,最相似既例子就係搭棚,即係慢慢收乾D貨,慢慢推高股價引散戶跟注,然後一下跌70-80%,收割。不過呢類股票不是投資上既目標,不買妖股是我既宗旨之一。

投資都一樣,同一間公司,每日都會報上不同價格,舉Tesla為例,佢可以報上900美元一股,一個月後可以報價400美元一股,投資者都係幾個選擇,唔跟注=唔買/賣,跟=買/賣,加注掃得更高或推得更低(散戶難做到)。 然後就係買幾多賣幾多既問題,用總資產幾多%去買一間公司既股票或某個投資產品。投資上可以買超過自己總資產既資產,借錢買貨(當然不建議)。投資要控制就係倉位分佈/叫資產管理,幾多%既資產買d乜,呢個已經人人不同,超過進取型100%買一間公司搏升十倍以上,保守型100%買哂高息股,分散型買10間公司每間10%,好多種策略可以用,因應每個人喜好或需要去定。我曾經都係進取型,諗住100%買1間公司搏10倍,但發覺效果不太高,而家都開始轉變緊行多策略混合型。



3.面對其他對手反應時自己情緒控制
玩poker, 就算網上玩講唔到野,但對手落既注碼都會影響你對自己贏既機會既睇法,就算手上一副爛牌無機會贏,但你敢all in大返其他對手,令佢地覺得你好大機會贏既時候,你都可以扭轉自己由無機會贏,變左贏錢。然後唔係一局定輸贏,有D人既策略就係無靚牌唔跟,一路每局蝕少少蝕少少,之後贏就贏得唔多,無人跟你注,你要面對情緒既影響,其實情緒好多時都係做決定時影響好大既因素。


投資,當然係面對股價變動,老手就應該對股價變動無咩感覺,但新手就一定試過升左有賺就怕跌,想快D沽左佢止賺袋錢落袋,而跌左某個金額既錢就覺得好肉痛,但唔會止蝕覺得會升,呢類情緒控制係要練返黎,無得教。有人教你面對遇到熊人要點做,但當你係森林面對熊人既時候,情緒就會控制你令你咩都唔記得,腦袋一片空白,所以,是要經驗。或者可以透過其他練習練返黎,我自己初初投資都經歷過,升左就執錢走,蝕左就坐到等升,但慢慢會明白,咁樣係賺唔到大錢,情緒習慣就會適應到應該要點做,即係好似你日日對住d獅子老虎你就唔會驚一樣(詳情可以睇Netflix既Tiger King,不過你都可以話佢一出句就唔驚老虎既)。 情緒控制,是最難亦都最重要去練習既項目。


總結
寫住3點先,其實有好多可以寫,不過寫太長又變左出書其中一個Chapter咁,我想講既係,投資除左需要金融財經知識理解之外,以上幾項對於做決策既知識都好重要。坊間好多都係教金融/財經知識為主,教你了解經濟,商業,金融,呢d係助你了解訊息,點樣運用訊息去搵投資目標。但有D非金融類,策略類或心理學上既知識都係需要去了解同埋練習。呢一類係助你買賣操作。就好似你搵到十倍股,當中經歷如何面對股價波動,是另一階段既事。投資成功係需要對好多方面既知識有所理解。

另外,要了解自己,明白自己強項,弱項,修正弱項,然後發掘一套自己投資策略,呢個係無人幫到你,人地可以教適用於佢自己既策略。我唔會寫文去教大家應該點做,我覺得係應該因應果個人既性格去幫佢思考一套策略。所以睇完篇文,可能有人會覺得無咩實用工具幫佢 做決策,如果想知道有咩工具,可以睇返我開頭講果個作者出既書,可能幫到你。

遲下有機會可能我再開班教一d我認為好有用既工具,呢個就後話,開得成再算。投資上真係好多野可以講,下次諗到又再寫下。

2020年5月1日 星期五

GDP同股市既關係

GDP同股市既關係,應該點樣理解呢....

其實好吊詭既野~ 好多人誤會哂GDP,股市關係好密切...
某程度上係但係咪GDP升1個單位,股市升1個單位
定係GDP升1個單位,股市升3個單位,
又或者GDP升1個單位,股市升0.2個單位...

好簡單舉個實際數字~

中國2011年至2019年GDP增長都係高於6%(6-9%)
美國2011年至2019年GDP增長範圍1-4%...
金融海嘯後,中國GDP增長一直高於美國
2011-2019年
中國股指:滬深300,+33%, 全A股指數+63%
美國股指:S&P500,+153%, 羅素1000(市值最大1000間公司) +157%

GDP增長快既中國,股市表現卻差於美國?

點解會有咁既分別?
首先要了解基本野,GDP點計~ 
GDP計算係極其廣同複雜,公式可以上香港統計署有寫~
當然每個國家地區計算方式會有別.... 我搵左NOW財經做既一條片簡單講下GDP係點計
除左私人機構,政府開支都計算在內,有幾個大項,唔詳細係度講,自己睇片
https://www.youtube.com/watch?v=SPI4aqaAN-M
佢入面有個例子係麵包增加值,係麵包價減牛奶麵粉成本計出佢增加值..
類似麵包製造出既利潤...因為避免重複計算之前牛奶麵粉已經計左既增加值...

GDP是否等於國家整體經濟之總量?
呢個問題唔係今次要討論既野~
同埋,GDP是否等於經濟之總量呢類問題,對於投資者黎講,重要性好低
呢類問題留返俾專業既經濟學家去探討好了...
專業投資者關心既地方並非在於呢一方面...
所以我暫時假設GDP等於該國經濟之總量去討論GDP與股市

咁股票市場又點計算...
股市=上市公司市值加總...係公司市場上既價格...
如果計指數,通常係市值最高既公司加權計算得出...
通常指數只計流通市值,例如滬深300(剔除限售股),標普500只計可交易股份
就好似中石油A股,雖然市值係8126億,但流通市值只有668億,
因為有80.3%股權係限售,有11.4%係H股...
滬深300排名入面只排第79,佔0.326%...

A股市場之中,中石油2019年收入排第2(次於中石化),
25168億收入,利潤排第9,有670億

中石油係經濟中佔既地位,
同股指反映既地位,明顯有好大分別

中國收入最大既企業一定係中石化嗎? 所有有經濟活動既機構/企業都有上市嗎?
明顯唔係,最簡單,華為就已經無上市,仲有好多國企都只係分拆其中子公司上市,
就算係吉利,都無整體上市。

如果GDP=經濟總量,所有上市公司極其量只係總體經濟既一部份。仲有好多經濟活動唔會上市,政府相關經濟活動就同上市無關,例如教育、醫療(藥同設備係有上市,但醫護人員相關開支唔係),有D行業較少上市公司,例如農業(食物)、部份服務業(理髮保安清潔等)。上市公司經濟活動只係總體經濟既一部份。

而經濟活動反映於上市公司是收入與利潤之中,
而股市/指數反映是公司估值,而非收入與利潤。
就算係指數,不同時期指數市盈率都會有別

所以GDP同股市當中差異就差別在於
1.上市公司經濟活動只佔整體經濟活動一部份(百分比每個國家不同)
2.股價反映估值,並非反映經濟活動變化

GDP由好多唔同行業經濟活動組成,指數亦都一樣由多個行業組成。 GDP負增長(收縮),可能由其中幾個佔比大既行業收縮影響,例如金融/地產業,抵銷左其他行業增長導致。

指數持續下跌都可以係部份行業拖累,而非100%全部下跌,要睇返當時情況去判斷,當然整體經濟活動收縮對好多行業都會有負面影響
而熊市下,亦都好多股票股價會被拖累,至少估值會下調,因預測增長放緩等因素

但係咪代表GDP收縮/熊市,所有行業/公司都沒有投資價值? 當然不是

只是在呢個環境下,風險管理要加強返...
如果牛市是合埋眼都會有錢賺,熊市就合埋眼都會蝕錢

3月1至3月23,美股,5003間公司,只有176間有升/無升跌,S&P500跌24.9%,只有1643間公司跌得少於24.9%....(佔總數32.8%) GDP持續收縮,投資回報係好容易變左負數

疫情會係令GDP短期收縮定長期收縮,呢樣要預測一下 暫時我認為疫情影響未必超過一年,抗體+疫苗都會一年內令疫情影響逐步降低
除非有意外情況例如病毒變得令抗體難以抵抗或疫苗因病毒變化延長推出


搵返自己一篇舊文,講股市市值同GDP既關係 股神Warrent Buffett好喜歡睇美股總市值/GNP 呢個數字,去衡量美股估值
做個參考啦~最近數字可以睇呢度~ https://www.macromicro.me/charts/105/us-market-cap-gdp

我篇文

發掘十倍股重點都唔係關注宏觀環境,
選股最重要,十倍股通常都唔會係市值最大果d公司,通常由市值較細既公司慢慢越做越大去達成10倍目標,之前做過統計,香港曾經十倍股起點都普遍係100億HKD市值之內。

至於買賣策略係Buy and Hold
定係要出出入入食波幅,就再之後討論。