2019年7月30日 星期二

發掘十倍股呢個地方可以幫到大家D乜?

係呢一刻,我都唔知可以做D咩幫到香港
同D唔同政見既人嘈,只會浪費時間
留返D時間思考一下,自己可以點幫香港
或者有人係覺得,感化其他人係自己可以做既野,其實都可以

我就無咩興趣同其他人爭論誰是誰非
想做返D實際D既野~講下投資~
其實對於果D工作5年都無既人黎講,投資十倍股關佢Q事咩~佢打工就算儲起一半錢,做左5年野,都係得2.5年既收入儲備,假設畢業至今5年,平均月入15000,儲起一半有7500,22.5萬本,再all in一隻渣5年中左10倍,225萬,夠唔夠俾首期?而家d上車盤都6球起....

邊個可以ALL IN就守到十倍...好多人都話有一倍已經好好,但1倍,45萬,可以做d乜? nothing.... 唔係我要求高,係社會生活成本太高,ALL IN有10倍先叫做可以諗下買樓,中唔到十倍,食屎啦~ 仲有注碼問題,唔all in,分10隻,有1隻中10倍,只係相等於你成舊錢多左1倍only,22.5萬拎2.25萬買左1隻升10倍,拎返22.5萬,只係多左1倍錢,買幾多隻去搏先岩?我覺得頂多4隻.... 搵十倍股既過程應該係點入手? 香港有2千幾隻股票,美股更多,A股,um....... 幾千隻股票,合埋眼買中一隻10倍,應該係千份之幾(5年都有幾隻有10倍既), 咁當然唔會合埋眼揀咁叻仔~

假設一下,你有能力睇到一間公司有10倍潛力,100%準既~ 但你睇一間公司要用1日時間先可以了解有冇10倍潛力 幾千間公司,每日睇1間, 你要用10年時間去睇哂先會搵到果一間, 你睇得黎都可能升左10倍......

如果你幾千隻入面,是但揀幾十隻黎睇,可能係睇報紙雜誌電視網上有人講,又或者朋友俾既number,希望係入面搵到1隻係10倍, 其實呢個機會計同合埋眼搵一隻既機會差別不大,可能比合埋眼揀一隻高dd.....因為本身呢d資料,都唔係for你爆升10倍架嘛....

其實最好既方法一定係整合左過往10倍既公司共通點, 再用果d共通點去篩一堆股票出黎,再逐隻自己睇~

我暫時可以肯定既共通點係收入同盈利一定係持續高增長...呢個係必然,一間公司既市值,好大程度上取決於佢做左幾大既生意同埋賺到幾多錢,呢兩樣增長得越快,公司價值增長得越快..... 如果間公司盈利低增長,盈利減少,有排都唔會市值升10倍,邊個買?(有人自己夾到自己d股票升10倍又係另計啦)

另外市值大果d都難d十倍...或者耐d時間...呢個要有例外既例子,但普遍都係正確~倍升係呢個情況就唔難既

仲有好多其他因素,但我唔會寫哂出黎住.....

寫到呢度,一定有人個心入面諗,有NUMBER未? 我俾個NUMBER你有幾難,但我係咪真係一定會中? 未必, 我都唔敢保證自己100%準, 就算我真係100%準,你睇到個NUMBER,會唔會就咁真係信哂我,瞓身ALL IN渣幾年唔郁? 我敢講,100%無人會咁做,SO,我講個NUMBER出黎有咩意思? 其實我應該講過好多次,我做既野係集中講D有用既資訊俾大家去分析,邊D公司值得睇,邊D可以研究下,減少睇D無謂既資料,令你唔需要睇10年先搵到1隻10倍股.... 所以,大家如果只係想睇number,睇推介,sorry,呢度無的, 想睇分析,會有,睇下有冇時間寫,可以一齊傾下, 有人有10倍股推介,都可以出post講,一齊傾, 係我最希望達成既情況,大家都為香港人努力,香港人加油.....

2019年6月28日 星期五

新股: 萬寶盛華大中華 (2180)

IPO,我比較少睇,因為近排上得都比較多
好多都係炒味濃,基本面吸引既少

呢隻其實已經招左股一排,7月3已經係最後一日招股日
我明顯遲左發現,不過唔緊要,基本面靚既公司,長渣既,總有靚位入
廢話唔多講,介紹下呢間公司

格隆已經有寫過呢篇野,大家可以睇一睇先,我再補充同埋矯正入面部份錯既野

https://m.gelonghui.com/p/278332


首先要補充既係母公司盤數
母公司Manpower (MAN US)美國上市多年, 2018年收入1723億港元,南歐734億,北歐421億,美洲326億,亞太及中東226億, 2018年中國區收入,只有近30億港元,佔公司整體收入1.74%, 佔中東亞太區分類只有13%,所以就算中國區高增長,對公司整體收入影響都不大,MAN往績2016-2018年收入增長分別是2%,7%及5%, 因為67%收入來自歐洲,而歐洲近幾年經濟增長都是很慢,不及美國...利潤增長是6%,23%,2%....所以公司股價不是很理想,歷史市率只有11倍.

講返香港上市果間公司既野
業務
利潤佔比最大2項係靈活用工同埋人才尋獵,靈活用工,我估係打散果類,佢有一班潛在散工資料,當公司需要散工既時候,就安排散工去做, 收服務費, 人才尋獵好簡單,即係獵頭公司,幫公司搵高級員工做高級職位. 

行業
格隆內都有寫左,公司所在行業極度分散,雖然公司是龍頭,但市佔只有1.74%,第2位係國企,1.21%,第3位先係私營0.93%,只是首名的一半,其實差距好大,我估計呢行咁分散,係因為公司靠既係員工獲得收入,客係中國公司,要靠員工去服務唔同既公司,好難每個區都有人,要慢慢去建設,所以現時分散係好正常,唔係咩不好既野,亦都因為咁,客難搵但易守,建立左長期關係亦都好少會轉,所以收入幾穩,龍頭地位好難被動搖... 

根據灼識諮詢預測,整個行業未來增長仍然有20%,所以公司未來收入基本增長20%係不難,加上搶佔同業市佔率或者用收購方式增加市佔率,增長30%左右係大機會達到,假設利潤率無咩變動或略減,利潤都可以增長20-30%,公司上市前幾年既利潤率都有改善,所以高增長係極高機會達到,除非公司上市前盤數有水份...

估值
公司2018年不計上市開支的調整後利潤係1.26億人民幣,估計2019年利潤增長30%,大約係1.85億港元, 招股上限價市值25億,預測市盈率13.5倍, 如果母公司單位數增長,仍然做緊11倍市盈率,公司雙位數高增長,我覺得俾25倍市盈率都唔過份,合理估值大約50億市值,潛在升幅1倍左右,仍然適合長線投資.

股息
公司招股書內寫,會分派35-45%,如果以中間40%計,2019年預計利潤1.85億港元,大約分派74百萬港元做股息,市值25億(上限價)計算,大約3%息

上市前,公司分派左35.3百萬美元,大約280百萬港元

風險
經濟轉差,會對公司應收賬有負面影響,可能需要撇賬,另外,人才需求也會下降,降低公司收入

2019年6月6日 星期四

從過往經驗中,獲得投資智慧

有GROUP友重提返呢個LIST~



當時選股準則係~
"" 升市後,選擇市盈率低於12倍,盈利前景OK的公司 原因是靠估值重修提升股價 "" (我都唔記得當時根據D咩黎揀呢11隻股,好彩有寫低,記錄真係好重要) 當時想法係,揀D P/E唔高,當時盈利增長強既,當盈利繼續增長, 估值又同時提升,就可以有好強既股價升幅~ 但原來事實係,有D公司,一兩年收入盈利高增長~ 之後係咪可以維持到落去,靠既唔係行業有幾大前景~ 而係公司既護城河有幾闊,即係公司壟斷力同競爭力有幾大....
可以保住個市佔率,同埋搶人市佔率既能力~ 如果無競爭能力,或者行業周期好反覆,就好似個LIST入面咁,有好多都係中途已經炒哂車,到而家跌左80-90%,有D係中途已經業績走樣要沽,實際情況唔會輸80-90%既

逐隻檢討下,1.東鵬同2.奧普都係私有化左,所以,有D低估值既,真係有增長,最終結果就係私有化,因為公司管理層認為市場定價太低,自己私有化自己賺仲好~(我估)... 3.海航機場,其實增長係OK,前景都係OK,但母公司唔OK,起新機場,要股東負責,借左一大筆錢,之後將公司轉幾次名,我無跟好耐,而家都唔知點,只係睇到既係,公司收入同盈利之後,每年有1X%增長,但個股價唔升,令到個P/E越黎越低~即係你睇得中佢基本面係OK既,但股價唔升,你都吹佢唔漲~我加入LIST果時係P/E 7.X,而家係3.7,如果估值唔跌,而家股價升幅已經1倍左啦~ 4.永達,5.正通,兩間都係賣車既,其實之後都有升超過一倍,但當D車唔好賣既時候,又回返哂,佢地只有汽車周期上行先會有一次大升周期,然後就沒有然後了~~~所以呢類大家都係賣同一樣既產品既行業,好難有競爭優勢,一齊升一齊回,利潤率極低,波動就會勁大,唔可以長期持有~ 6.江南集團,其實推左之後升左一兩個月就開始潛水,我都唔記得做咩會揀仍佢,應該係見佢之前3年業績都OK所以加左入去,2012年上市,之後3年收入同盈利都增長正常,所以以為OK~再睇返佢近幾年,其實收入增長都穩定,毛利就差D,但問題係其他費用升,有年就存貨減值,有年就金融資產減值, 盤數好似無咩古怪,但P/B係0.22...P/E 6.7, 一定有D古怪野先會咁,一間話自己做緊百幾億生意既公司,市值只有13億...

7.興業太陽能,又係之前業績好,後尾走哂樣, 而家變左賣殼比山東國資委,大陸民企,10間真係有9間都奇怪, 呢間太複雜,有時間再講

8.北京汽車果陣揀佢,係因為佢出自主品牌汽車賣得OK,同埋BENZ賣得好好, 但之後自主品牌汽車越賣越差根本唔夠人鬥, 現代又無啦啦俾南韓事件影響賣得勁差, 汽車,都係過左周期就唔掂既行業...

9.中國白銀,呢隻其實有升過一下,但又回返,明顯有人做野先郁,同基本面都無咩關係,其實真係睇管理層,歷史增長有幾好真係無咩用

10.11.金界,聯塑,兩隻仲未點跌有升既公司,聯塑都係古怪,金界呢一兩年先有人買返起,賭股黎講算係咁.....

第一頁11隻講完
其他頁面,太多唔講了~ 其實我有PICK過2382舜宇,但一隻都頂唔到其他跌...

從過去經濟,得到既智慧係~
1.唔可以係同政府做生意既公司, 主要客戶唔可以係國企,呢類公司我會避,即係類似江南集團呢類...賣電纜俾國企(電企)
2.公司客戶,盡量係大眾消費者,即係你同我,或者中游公司,佢地客戶雖然係D其他私人企業,但果類企業要面對大眾消費者,類似舜宇,賣零件俾手機廠再賣俾我地,或者申州,賣料俾NIKE,UNIQLO,再賣俾我地
3.客戶係大眾消費者,但公司要有護城河,行業周期波幅唔大,即係好似賣車,我地個個都買既,但賣車既公司個個都係鬥平先搶到生意, 護城河弱, 利潤率低既公司都係呢類, 賣車既都係得3-4%淨利率
4.睇基本面,之外,都要睇股價走勢,跑輸大市,一直潛果D,都係要小心D....其實買一直跑贏大市果D反而穩陣, 仲有,成交多都係重點...無成交,即係無人睇,可能係好公司,但無人睇,即係無人買,無人買上去都係唔會升

5.低市盈率既公司,有好多係伏,高市盈率其實都多,好難統計哂,只可以講,市盈率高低無咩參考意義,唔好以為低就係一定好,上面大把例子話俾大家知,低市盈率有增長,都可以大跌, 而且高就唔一定係差,無關係的...煤氣,維他奶,騰訊,一直都高P/E,咪又一直升, 重點都係,股價走勢最重要

講住咁多先,其實我覺得我當時有D係睇1-2年再調整,而唔係咩都唔理渣4-5年,所以累計升跌幅唔代表呢個組合最終回報....

2019年5月17日 星期五

網易, 下一隻騰訊?


我係睇左呢兩篇報導,
先發現呢個重大機會係眼前!!!
我之前對呢間公司係零認識,知個名,知佢做咩,但唔知佢做左D咩


所以我而家係由頭開始睇,一路睇一路寫,
我會慢慢深入咁寫,暫時寫住D表面野先

首先,未睇業績/基本面果D野之前,先睇圖啦,最簡單直接

幅圖靚,隻股唔會差得去邊,幅圖衰,短期都係衰,除非轉緊勢.....
好簡單咁對比下同業騰訊.......
2009年底,騰訊調整後股價係32.8,而家355.8,升10.84倍
網易33.84,而家係270.07,升8倍....
距離算大, 但又唔係太差........升多3成幾就追到騰訊架喇
圖OK,同股王騰訊有得比,唔會太差啦,再睇兩篇報導重點



網易第一季度淨利潤30.17億元同比增126%
https://finance.sina.com.cn/stock/usstock/c/2019-05-16/doc-ihvhiqax9019732.shtml

網易瘦身有成 Q1財報犀利

https://tw.news.yahoo.com/%E7%B6%B2%E6%98%93%E7%98%A6%E8%BA%AB%E6%9C%89%E6%88%90-q1%E8%B2%A1%E5%A0%B1%E7%8A%80%E5%88%A9-215006178--finance.html

大陸2018年底才重啟遊戲版號審批,故網易、騰訊近幾季遊戲業務都受到大環境不小的影響。但網易此前轉移遊戲市場至海外有成,多款遊戲在日本取得成績,使網易遊戲業務在2018年Q4、2019年Q1期間斬獲佳績,提早度過遊戲寒冬。

《明日之後》和《量子特攻》於4月在日本發布,兩款遊戲均連續多日登頂日本iOS下載榜;
《荒野行動》在日本仍受追捧,於3月和5月再次登頂日本iOS暢銷榜;
《第五人格》於4月首次躋身日本iOS暢銷榜前五;
《神都夜行錄》預計今年將在日本和韓國發布。

-------------------------------------------------------------------
標題,勁吸引,NONGAAP淨利增126%!!!再睇收入升29.5%
對比騰訊第一季,收入升得16%,利潤先得NONGAAP先得14%增長

跑贏股王呀.....咁都未算吸引
睇我QUOTE果段仔, TOP TOP TOP~
一間大陸公司,可以打到入去日本呢個本土遊戲市場爆炸既市場,超級唔簡單~
騰訊我聽既都係內地TOP TOP TOP,好少聽到做到外國TOP(收購果D子公司應該有既)
做到海外市場既公司,先真係國際級大公司,走出海外其實好難....

中國有幾多間公司走得到出去又搶到人地市場??? 海爾,華為,小米(但非主流市場),其他諗唔到了~

網易最大收入來源都係遊戲,佔首季收入65%,幾接近騰訊,騰訊都好似60%左右,但網易第2大收入係來自電商,呢個我就唔係好識,廣告收入好少,騰訊反而多廣告收入,創新果個唔知咩黎,要再睇.....

暫時寫住咁多先,因為我都要花D時間睇下
大家可以先睇2篇新聞
我再搵多D公司業績內容做分析~

遲下可能寫篇對比騰訊....



以下是參考資料

·淨收入為183.56億元人民幣(27.35億美元),同比增加29.5%。其中:
-在線遊戲服務淨收入為118.50億元人民幣(17.66億美元),同比增加35.3%;
-電商業務淨收入為47.89億元人民幣(7.14億美元),同比增加28.3%;
-廣告服務淨收入為4.39億元人民幣(6,535萬美元),同比下降5.1%;
-創新及其他業務淨收入為12.78億元人民幣(1.90億美元),同比增加5.0%。
·毛利潤為80.91億元人民幣(12.06億美元),同比增加35.9%。
·營業費用為46.82億元人民幣(6.98億美元),同比下降1.4%。

2019年5月1日 星期三

比亞迪 (1211.HK) 純電動車銷量首超燃油車

未提供相片說明。

新能源車,新能源車,講左成十年啦~
比亞迪,我一直都無咩理佢, 因為佢仲未係一間真正新能源車公司~
即係KFC賣炸雞,又賣牛肉飯,
你唔會話KFC係牛肉飯公司掛~
比亞迪一直都係賣燃油汽車,
同吉利,長城,都係一樣~
吉利,長城,呢1-2年都開始有賣電動車~
唔通你又話佢兩間係新能源車公司咩~
係,比亞迪有自己做電池, SO..........?
係,比亞迪有做電動巴士,SO........?
問題係,賣幾多部先,收入佔幾多先?
2018年開始比亞迪終於肯講自己銷量~
純電動車,到2018年3月先賣得4,668部,加埋混電8,444部(油+電),13,112部,但油車呢? 29,216部......
而且,我唔當混電係新能源車,
你都是要入油丫,可以用下電唔算真係環保BOR,
雖然你係慳左油.....
所以,我一直無睇佢,但直到今個月我望一望佢銷量,叮~~~
純電銷量終於超過油車, 係歷史首次,
一來油車賣得唔掂,另外純電動一直增長,
終有一個月佢地會交匯並超越,
就係2019年3月......
代表咩?恭喜比亞迪,終於成為新能源車公司~
比亞迪增長有幾快要睇返全中國需求有幾大~
補貼已經開始CUT,黎緊會CUT一半~
影響有幾大要再睇,無左一半補貼仲有幾多人肯買?
要睇公司新產品有冇吸引力~
比亞迪係最近車展發表左一部混電跑車~
雖然仲未係純電,同TESLA仲有距離~
但過多幾年應該可以做到....
比亞迪對於TESLA優勢應該係成本~
始終國內生產成本都係低於美國~
雖然技術上做唔到TESLA既性能
但TESLA要搶中低價市場亦都唔容易~
係咪而家就要買比亞迪~?
再睇埋佢賺幾多錢先 公司預期2019上半年賺14-16億人仔, 市場預期全年賺45億人仔~ 2019預期市盈率28倍,
除非2020年確定到高增長, 否則,現價都唔太吸引~
但我可以肯定既係,比亞迪已經可以擺脫長期股價得波幅無升幅既局面, 未來新能源車發展可以帶動到公司價值增長
最後,想講,我Google左最新一個月既news,無人講呢樣野,我唔敢話係獨家發現,因為呢個係公開資料,如果大家搵到另一個網有講比亞迪純電超油車,請告之~

2019年4月2日 星期二

海天味業,老恆和,感慨良多


睇返最近海天既文,真係感觸良多..... 
海天味業,老恆和,差唔多時間上市~ 
一間A股上,一間港股上, 
海天主要做醬油,仲有蠔油... 
老恆和主要做料酒,有做醬油
海天應該無咩香港人識,但內地就好出名~ 
相當於香港李錦記一樣(李錦記內地都勁既)

2014年-15年,兩間公司增長差唔多 
連埋中期業績 
海天味業收入增14%,17%,12%,15% 
老恆和收入增:34%,26%,20%,19% 
老恆和增長係明顯略高於海天~ 

至於利潤方面~ 
海天味業增,27%,30%,22%,20%
老恆和增,24%,21%,22%,8% 
利潤率海天一直升,老恆和一直跌~ 
老恆和2016年開始利潤仲減少緊添~
2018年先有D好轉 
如果唔係去到2015年全年,都唔會睇淡老恆和...... 
但股價就有好大分別,
老恆和一直潛水,P/E只有10-15
海天就係30倍開始,一直升到50倍...... 

老恆和上市50億市值左右,而家只有21億.....
海天500億市值,而家2299億RMB 

如果我地返返去2014-15年~ 
睇住兩間公司盤數去揀,
點樣可以令自己揀到海天,而唔係老恆和? 

老恆和高增長,P/E較低~市值低......
海天,增長較低,P/E較高~市值大10倍.... 
就算唔比較增長,如果睇P/E,咁正路都揀個平D~ 
如果睇埋增長,仲要平D,一定揀老恆和...... 

但其實諗返,單靠數字,根本唔會令你有正確選擇~ 
真係要睇埋行業,同埋管理層作風...... 
海天上市時有5年計劃就係收入翻一番~ 
2013年84億收入,2018年170億,真的做到了~ 
淨利潤由16億升到44億... 公司目標明確..... 

我们预计14-18年收入复合增长率16%,净利润复合增长率20%

老恆和,看不到有類似計劃~ 

豉油呢D普通到無得再普通既野,竟然可以產生幾倍升幅既股票 
如果5年前,叫你買豉油股,個個都可能當我傻仔~ 
你可能更有興趣買既會係豉油碟(咸碟)~ 而唔係豉油股
豉油飽和市場,點會有增長,俾你都計到啦,一個家庭用既數量有限~ 
唔會無啦啦食多左豉油架,而家唔洗豉油撈飯食,何來增長呢?

酒都話,可能會越飲越多,豉油喎,唔通會當水飲咩...... 
仲要豉油競爭唔細,有李錦記呢個強勁對手~ 
仲有好多唔同品牌,山寨品牌等... 
但呢間野就係越賣越多,越賣越貴,而且利潤率一直升~ 
所以競爭大,唔代表一定差,環境難做唔代表做唔到 
越難做既地方,越做得好,越有競爭力,越能夠增長 

除左產品做得好,品牌做得好,搶到人市場,應該無其他原因~ 
海天味業係國內品牌知名度係排第4,僅次於伊利蒙牛康師傅 

數字,係只反應結果,但反應唔原成因,成功既原因 
有時間我會再研究下呢間海天~
要將失敗既教訓,化為尋找下隻倍升股既經驗 揀錯股,代價係好大的
遲下先再講老恆和失敗原因...


2019年2月23日 星期六

2019年2月第3星期 A股反擊


好耐無寫過一周升跌, 1月有寫總結,不過睇返果篇野,都係寫得麻麻地
2月初就新年啦,放假無野好寫啦
年假返黎果個星期,都無咩升跌既,恆指頂住左係28000 所以無咩野好寫,咪唔寫囉,
其實唔係我懶啊

今個星期就堅喇,有好多野值得講下 恆指一星期升915點,+3.28%,日均成交額1050億
唔算特別

精彩點係望下隔離A股, 全A股指數+5.75%,滬深300+5.43%,上綜+4.54%,深綜+6.32% 兩市日均成交額5,780億,超過一年新高,去返2017年9月時水平,接近一年半前(按圖可放大)


如果大家相信成交長期低迷後,突然大幅增加,就係轉勢起點, 咁A股今個星期可以算係新升浪起點??? 今個星期A股升咩呢,睇下下面

A股有樣好,有行業指數,香港真係好落後,恆指公司整果個,流到爆

多元金融係信託果類公司,今個星期第一次升,所以升幅特別勁,D公司唔係好識

券商指數,呢個係2018年10月已經見左底,之後慢慢爬升,今個星期先大彈,其中一個原因一定係上面提過,A股成交額大升呢個因素,其次係減稅降費,可以睇下面呢篇

A股熱炒減稅降費 券商A股集體漲停H股急飆

通信設備,半導體,5G,炒得最勁係新年之後,美國不斷叫其他國家唔好用華為設備,但部份國家表示唔用唔得, 反映華為競爭優勢之強,而國內有唔少設備公司都係華為D供應商,亦都有類似華為的低價優勢,所以D錢一齊湧入, 炒一轉OK既,但小心炒錯

半導體應該係手機設備,Samsung出摺mon機,3後置鏡2前置鏡既s10+

太多行業就唔逐個寫喇

睇返香港果個list

其實同a股差唔多, 手機零件,5G設備,券商
比A股多左D既係賭股
內險係H股黎講算強勁,始終A股大升有幫助

A股大升,應該同中美貿易談判有點關係
美國延長加關稅期限,有時間繼續傾
然後,人民幣穩定成為焦點
雖然我覺得無咁快會解決中美間糾紛
但氣氛緩和,A股明顯有資金流入,3月應該繼續好

3月港股業績期,匯豐業績未如預期,恆生略好
聯想好過預期後大升.....
有部份公司發盈喜,例如雅生活,國泰
聯想同埋國泰都係之前一直潛既股
逆轉既業績推動股價向上,如果KEEP到
潛在升幅會好勁,要睇返公司基本面

市好,機會就多,把握今次機會,再儲定過冬既糧
對於經濟基本面,有人睇好有人睇淡
而家D數據有D係轉差,不過係滯後定領先
要小心D去睇

聯儲今個星期話希望今年停止縮表,加息或不多,亦都係令市場放心左既一個主因

買咩公司行業都唔洗我點講,要炒既都係上面呢堆,反而係業績中發掘優秀公司,作為長期投資對象,係2月及3月必要做既事情,我都唔打咁多字了,花多D時間睇返今個星期既業績,搵D有價值既野同大家講返,係咁先