2017年9月5日 星期二

一年後的回顧

http://edwardten.blogspot.hk/2016/09/blog-post.html

一年前,寫左篇咁既野,一年後睇返,另一世界
原因係呢12個月以黎,資源價(煤/金屬)復甦,油價回穩,內房銷售回升,周期性股票大部份都復甦哂...加上科技股/手機股等增長加快.......恆指上半年都升20%,業績數據是滯後,2016係最差既時間,亦都係最好既入市時間,雖然2016上半年難賺錢,但2017應該好多人都賺唔少錢....



盈利公司佔比是2011年以來最好.......2015-2016年係最差的........




盈利增長佔比是2010年以來最好.....內房,汽車銷售,煤,太多行業今年擺脫左之前好多年既下跌周期.......

下半年要開始留意返,會唔會有d行業周期已經完左/將快完結...就唔好放太重信心係果d行業上面,有貨要留意轉勢既訊號....


2017年升既唔少都係因為上年度基數低既因素,呢d因素無左之後,增長預期無左,估值/股價都會下調返合理水平

2017年8月25日 星期五

2017年8月第3個星期升跌,國指突破

今個星期恆指升2.96%曾經突破高位十幾點,國指升5.56%創新高,

今次個表有D唔同,左邊係跑贏大市升幅高於2.96%既公司,再以行業分類,公司數目多少來分次序,
由於行業公司數目多少都會影響,所以只供參考,唔代表多公司就係熱門,因為右邊跑輸大市既都一樣多~
其實跑贏/跑輸最多既都係地產,個LIST只係方便大家睇返同一個行業,有D咩公司升最多,邊D升最少,方便選股

先講成交額大於5000萬既行業有邊D股大升~
1.內房一定係今個星期之星,富力升23%,恆大升19%,融創升12%,中海外升11%,大悅城升10%,雅居樂升9%...
2.第2大一定係內銀內險,金融類股,招行升11%,太保升9%,新華升9%,工行升9%,中人壽升8%
3.第3大係科技野,丘太升22%,通達升13%,比亞迪電子升10%,瑞聲升10%,FIT HON升8%,舜宇升7%
4.第4大係汽車及相關,東風升11.5%,永達升10.3%,敏實升9.1%,正通升8%
5.醫藥股,中國中藥+14%,藥明生物+10%,康哲+8%

1.內房,科技,汽車,都係之前熱門野,資金仍然集中呢幾個版塊,但今個星期新貴係內銀,內險,其實早前內險都炒過一轉,內銀都有慢慢升緊,但今個星期特別強勁,帶埋國指大升
富力係22號出業績已經開始有人買定先,出左裂口高開繼續升
恆大,融創都未出業績,中海外出左之後就連升.....

2.內銀仲未出業績,但招行出左之後都係連升...不良貸款率3年來首降,可能係上升原因之一,如果有跟開內銀,內銀之前既擔憂已經開始減退,所以估值提升唔出奇
3.汽車股見到東風追落後,汽車銷售股業績後都應該追落後估值,但吉利出業績後就無左影,亦都反映股價已經反映哂業績利好
4.科技股,丘太跑贏舜宇,其中一個因素丘太估值低,舜宇太高,另一因素係瑞聲,開始加大鏡頭產能,市場擔心舜宇受影響?,通達業績後市場信心回升,通達負面因素係一次性,業績會上有利好消息
5.醫藥股業績都幾好,之前無咩升幅無咩人炒而家開始多人追返入,反映返業績增長因素,醫藥股未來幾個月可能會持續跑贏其他行業(如果大市轉差)

另外其他行業,想講下石油,石油價穩返,石油股利潤穩定返,中海油盤數係靚過中石油,中海油業績前已經有人買定左,所以升幅大
不過好難言定石油股基本面係咪見左底,因為油價都係好難測既野,減產有好多變數,頁岩油都係,但如果睇圖就見左短期底,長跌周期暫時完左,

今個星期有好多業績後既公司大升/大跌,太多真係講唔哂,

如果你地覺得有D業績唔明,可以問,有D業績想推介,請開新POST推介俾大家一齊賺

2017年8月11日 星期五

2308研祥智能, 1979天寶集團, 福壽園(1448)

最近業績期,搵D公司講下,首先,講一個故事俾大家聽
2308研祥智能
呢間公司應該係2015年最癲果陣見過有人吹佢,工業4.0,智能化果D概念股之一,佢2014年全年業績係有增長,2015年3月底股價仲係0.8左右,5月底上到最高3.65,而家係0.96....因為2014年之後公司收入+毛利一直減少,到2017年上半都仲係收入減少緊,概念係可以成真既,但前題係要了解行業先,再了解公司產品競爭力,然後憑自己能力去計算,但單睇業績介紹/公司網站,我都唔係好理解到佢D產品競爭力,所以唔了解既概念,掂都唔好掂...錯失一個好機會唔緊要既,最怕係中一次陷阱...如果唔了解就衝入去搏開大/細,咁係賭而唔係投資了,不過,有D唔了解既,又可以賭得過...下面果間係另一個例子

1979天寶集團
呢間同上面果間差唔多,我都係唔係好明開關制產品有咩競爭優勢,不過佢又真係盤數近年越做越大,間公司係有近40年歷史既公司,但前幾年食到手機充電器既增長,收入增長幾大,今年上半年手機明顯增長大幅放緩,本來應該增長斷纜,但今年有照明,娛樂媒體設備既單撐住個增長,公司開發到新產品,入到歐美市場,拎到大客既單,所以公司預期仍然會有增長,佢仲要有充電樁概念,不過兩輪電動車用,其實業務黎睇感覺上維持增長都唔易,所以我先覺得同研祥差唔多,但兩間公司分別係咩?點解覺得1979賭得過? 因為股價圖,1979係KEEP到唔跌,2308係潛緊,對於一班無咩經驗既散戶,你覺得佢地會追創新高,定係買潛緊水既股? 一定係潛水股,因為佢地覺得安全/平,會反彈,升得咁高,一定會跌...不過你睇返呢2間股價圖就知,你既結果會係咩....故事完左,下面係另一間公司

福壽園(1448)

呢間死人地產股,收入增長快左,利潤增長都快過上年,其實呢個市場增長唔會快,無啦啦唔會年年都多好多人死,死亡人數增幅係隨老齡人口數變化,單位數增長是合理,雖然話人口老化加快但都可能只係3.6%->4.2%,或者4.4%->5.1%,呢個行業唔同內房,內房可以一個人買幾間屋,有錢就買,但呢個唔會一個人買幾塊墓地,幾有錢都係用咁多位,呢D同公用股玩法一樣,平就買,公司業務無異樣就繼續HOLD,長線之選

2017年7月19日 星期三

美國VIX與美國加息(以LIBOR倒轉表示)



簡介下VIX係恐慌指數,LIBOR 1M係一個月銀行拆息
呢張圖,簡單講下,VIX係1994-95,2005-06,同埋現時2017係跌至10-12水平低位
即係最樂觀水平,40以上為之極恐慌水平,包括98-99年既亞洲金融風暴,同埋2008-09年金融海嘯

VIX低位時間長達數年,都係美國加息周期,LIBOR亦都推升,由於相反關係,倒轉顯示
1994年初LIBOR由三點幾%升至95年中接近6%水平
2004年中由一點幾%升到06年中5點幾%
2016年初開始升,而家都只係一點幾%

但VIX見底,拆息抽高見頂之後2年都會有金融大動盪,VIX爆升
98年初金融風暴,同埋08年既金融海嘯,都係加息停止後2年發生

而家只係加息開始,黎緊1-2年會有最強勁牛市,大家要賺就賺盡佢,
當加息見頂後,2年內見好就收喇
加息見頂既準確時間好難講,因為好難估加息幾時完
以之前94開始加,98爆,04開始加,08爆,今年16年尾加,2020-2021年爆既機會最大,但亦都有可能早D,因為今次有D唔同

留意住加息加到咁上下停左唔加,大家就要開始增持現金了

2017年7月11日 星期二

長城汽車的故事

長城汽車呢間公司應該係我跟得最耐既一間公司,無他,對其管理有好感
長城最令我有興趣既地方係,佢係皮卡龍頭,一直做SUV


睇下長城10年前車型銷量佔比,只有皮卡同埋SUV,長城就係靠皮卡同埋SUV起家

2008年開始長城進入轎車市場,因為轎車在國內佔比最大,70-80%, 但其實而家回看係做錯左
果年係汽車下鄉補貼期,好多人首次買車都係買轎車,長城銷量都急增左,

2011年轎車銷量佔公司銷量40.5%,達到新高,但之後,轎車銷量下跌
SUV急增,主要係市場轉變緊,之前買過車既人開始試下其他車型,例如更多功能既SUV
長城又開始轉變策略,由於佢做開SUV,所以好快適應市場轉變,搶到SUV需求增長最快既機會
2011-12年出既H6,成為公司皇牌,一直幫長城搶唔少SUV市佔率
2014年佢開始大減轎車產量,轉為專注研發新SUV...推出新SUV型號..
但係減轎車,SUV,此消彼長下,公司整體銷量沒有增長,這段是長城轉型陣痛期
20147月開始推H2,201411月推出H1,H9,
201311月本來出H8,但出過幾次問題,推遲至到20154月才出...
H8,H915萬以上級別,面對合資廠更高技術,H8,H9證明是還未能與合資競爭
2015年及2016年係無新車型出,一直靠H6換款(9-15),以及靠H2(8-12)
2015-16,其他車廠都開始追上黎,長城竟然係得2件野賣得月銷過萬部....吉利一出都出4件,每件月銷過萬

講返長城之前成功因素,專注做某一種產品,會做得好好,所以之2014年前,一直以黎佢既SUV銷量跑贏其他廠幾條街
連外國品牌都不及佢,主要原因有幾個
1.佢車既價格低,合資唔會做到佢果個價,12萬以下基本無咩對手
2.中國汽車市場一直都係合資為主,因為無技術,就算自主品牌都係買外國零部件再組裝
3.其他自主品牌無一間專做SUV,甚至好少車廠做SUV,無咩競爭對手
4.中國市場由轎車轉向SUV,造就前幾年長城高速增長

簡單黎講,長城之前成功既因素,1.專注因此技術高,2.價廉低價市場無對手,接近獨市3.市場需求高增長
但其他對手不是盲//懵的,見住SUV市場增長咁強,一定會有空間容納新公司
而且好多車企見轎車增長低,資源投放一定會多放係SUV,但由計劃到建立生產線等,需要幾年時間
而時機一到,競爭對手就出黎了,而且唔只一間,係間間自主品牌都一齊衝入去(合資唔計,唔同價格市場)
20154月廣汽開始入場,出左部GS4,之後就係北汽,長安,奇瑞,三菱,最後係吉利(2015年下半)
再加上SUV市場增長一直放緩,轎車銷售更是收縮,長城成功既三架馬車斷左2,最後一架靠技術幾乎斷埋
原因係長城H8失利,延遲推出,俾對手有機會搶入,H8是為左打入中高端市場的較高價產品,H620125月出既產品, (自動波,棍波早半年多D出左)
H610-12萬市場銷量最高產品,亦都係長城主力產品,對手加入既市場由7-15萬都有,
但長城用2012年出既產品去同對手2015-2016年產品競爭,就算技術再高都會有負面影響
雖然H6會每年出新款,但基本配置變化唔會太大,競爭力提升有限

2016年購置稅減半,加大需求,雖然SUV供應大增,但需求增加,市場影響唔明顯
長城有降價促銷,其他廠都有減價,毛利率有下降,但銷量補得返,利潤增長保持到
2017年問題開始浮現,扣置稅完左,整體SUV銷量增長放緩得更強
部份車廠銷量開始減少,北汽SUV銷量明顯下降,仲有江淮,長安部份車型
個餅增長慢左,但入黎爭食既人多左,自然汰弱留強,雖然長城係好強...但產品有點落後於對手
所以2017上半年係長汽最壞既時間

故事黎到2017,長城沉靜左2,終於再推新車,WEY品牌,全新品牌,以創辦人""姓氏命名
長城知道唔可以只係一直做9-15萬市場,一定要上中高端市場,先可以再保持高增長
以及技術必須提升,品牌必須提升,15-20萬市場一定要加快進入,搶先於其他自主品牌
本來H8H9就是打15-25萬市場,但明顯技術仲未到家,失敗左,加上市場對國產野看法都唔係幾好,國產=平野概念仲未改變,要佢地俾15-25萬買國產,除非產品超級好,接近外資既技術,而價格夠低,抵用,否則肯俾錢既人唔會多

2017年長城
再次嘗試,成敗未能定論,但
暫時睇論壇睇到WEY VV7口碑幾好,劣評唔多,主要集中油耗之外,其他問題都不大,而且有D人評同日本車差異少左好多,有D放棄外資,轉買長城,原因係外觀/價格/試駕之後轉變想法....
車主/潛在車主對其外觀及內飾最滿意,駕駛上問題不大,自主變速箱雖然未拍得住日本廠,但用家認為可接受,估計銷量應該會不錯,月銷量保守估計達1
2017年尾出VV5,估計2018年總銷量可再增10%

黎緊下半年主要競爭對手應該係吉利LINK,要等LINK出左先知影響大唔大,因為大家定位都好接近

至於長城股價,今年盈利應該唔會有大增長,有增長已經好好了,2018年重拾雙位數增長是肯定

2016年長城賺118,2017 市場估120億左右,2018132億應該問題不大,10倍市盈率估值

市值1320億港元,14.46港元,1年內目標價...

2017年6月12日 星期一

長城汽車的資本大戰?

長城資本大戰,要從供求上開始講起....
長城雖然有91億股,但H股只有31億股,31億股有幾種分佈

1.港股通,2.指數基金/基金,3.散戶,4.沽空戶
以上各類近期變化主要係1.同埋4....
港股通一直密密掃長城,都已經唔係咩新聞,有買開長城一定知
至6月9日已經有8億股係港股通(滬+深)=25.8%
根據WEBB資料,長城於6月2日有671,050,494股沽空=21.6%
https://webb-site.com/dbpub/short.asp?i=3413
基金同散戶,比較難搵數,基金應該佔比都大....

故事開始,點解今日會有20%升幅+52億成交?
以上4類持有者,有各自特質
1.港股通果D買左通常唔沽(根據過去歷史數),同埋今日港股通成交都見到都係淨流入
所以有25.8%貨係LOCK死左,唔會賣出黎

2+3.基金/指數基金,指數基金好少買賣,除非有錢入有錢出,基金通常唔會隨便轉倉...
即係得返部份基金/散戶,係主要沽貨來源,但力量好微,同埋佢地都係跟勢走
除非有好負面消息,先會變成主要沽壓

4.借左出去俾人沽空,果6.7億貨同樣唔會郁,佢地得一個方向郁,就係買貨還股,佢地唔可以再沽出黎.......因為佢地借貨果陣已經賣左,佢地係欠人6.71億股股票
如果價格一直升,佢地會一直蝕,所以佢地變左主要買貨主力,呢度而家有六十幾億潛在購買力
有人會話今日創左一年新高,但唔會全部都係蝕,因為有D好早沽空
但睇返高過現價既日子係2015年7月,
當時只有4千幾萬股沽空,所以極大部份,起碼6億多股係今日開始蝕緊...

我個人認為,今日一定係夾沽空,由開市價9.66創52周高(除淨後),之後一直向上掃...有哂計劃咁
雖然今日都有DD利好消息傳過,例如傳新車訂單好多,又有大行唱好....
但睇返剛剛上星期,長城先出完5月銷量,之後仲要低開跌,突然新車多訂單?架車5月已經出
再者就算之前銷量好過預期,都無咁誇張既升幅, 吉利新車出左,但未出銷量之前都無咁大反應,吉利都係慢慢爬....

長城估值低,炒落後? 以佢Q1盈利倒退估,估值唔算低,489,2238,1958都係單位數預測PE...而且長城低PE已經係過去9個月都已經咁低....市場會突然1日內就180度反轉態度?唔會...你見過市無緣無故因為追落後勁掃貨嗎?無吧


之後會點? 由於沽空餘額更新太慢,要睇D沽空減少幾多,剩返幾多,好難估,唯一可以睇實係港股通股,因為每日有數,港股通唔係一定唔減持,佢地都會減持,吉利到左某個價位之後港股通有減持過,但佢地減持都仲有升,但長城如果俾港股通開始沽,應該幾難升,長城新車未明朗,但如果新車真係賣得好好,加埋港股通再掃,最樂觀情況係上返歷史頂$17.X...而家長城難玩架喇,值唔值搏,睇你覺得D人仲想夾沽空夾到幾時...

2017年6月2日 星期五

2017年5月升跌

2017年5月升跌
恆指升4.25%,升既股600隻,跌既574隻,差距好細,反映升既集中係成份股
1174隻股票中,只有348隻股票升幅高於4.25%,佔比只有30%,70%股票連大市都贏唔到...
即係如果隨機選成交大於100萬元既股,你5月贏到恆指既機會,只有30%
成交少於100萬既多達923隻....基本上呢堆股票係俾市場遺棄左,散戶都唔會有幾多個買
下次有時間比較埋美股既話,就會知港股係有幾頹,問題係成個市場無人重視,點解?

睇下今個月跌幅最勁果D,科通芯城400,瑞聲2018(恆指成份股),通達698,美圖,中芯...
美股熱炒緊既科技行業,港股之中全部插水,原因各有不同,但反映全世界都睇好既行業
係香港既表現竟然倒轉,呢批之前都升左唔少,但今個月好似泡沫爆破咁,
呢批公司有幾多真係有問題,有幾多只係受情緒影響,要每日睇下先知,
但可以肯定既係,市場對中國新興行業公司管治信心大降...

睇返升果邊,內房一定係5月大贏家,恆大升70%有佢本身既原因,公司回購加上沽空盤再加回歸A股等因素,有跟開又知內情既一早已經買入坐定定,我地呢D散戶只能見佢升到目標先知咩事,其他內房主力主要都係銷售好好果幾間,例如碧桂園,融創,龍湖等...雖然中央不斷出限購政策,成交量跌,價升慢好多,但內房銷售仍然強,推動人民積極購房既原因真係有排研究,內房升左咁多仲值唔值追? 如果睇PB又未到歷史高位,咁計其實仲有水位,問題係要睇返每間內房仲有幾多樓賣,無乜樓賣,銷量無咩增長,好似升幅勁低果D內房,就好難升得好勁

火電股都係今個月升幅好勁既行業,最近有大行唱好,加上呢批公司比較落後,行業開始有轉機,包括煤價跌,下年電價有機會上調,就開始炒預期

都市麗人同恆大應該都係差唔多,呢間配股俾復星之後就由谷底直上

彩票股今個月都好強,傳聞仲未變事實,已經升左

敏華,偉易達,德昌電機,都係出左業績好過預期而上升既股票

車股,汽車銷售,都係5月較強行業,吉利升22.8%兼創歷史新高,華晨都係新高,其他汽車銷售股升係因為寶馬,有新聞指寶馬5月銷售好好,而汽車銷售股有幾間都係主力賣BMW,長城汽車只升3.7%,買股買行業領導股,絕對係正確,吉利華晨之前一直都係領先其他同業,至於吉利升什麼,唔係好知...

6月升幅勁既股票應該未必係以上既行業,行業輪動下次輪到去邊真係只能睇實,睇返5月27-6月3首周升跌,都係內房+車+車銷售.....唔寫了,有問題就問啦