最近市場上都好多爭拗，最近著名香港投資人-紅猴，出左篇文講"走左先啦"既睇法。(http://redmonkeyblog.blogspot.com/2021/08/1-aug-2021.html) 有興趣可以睇睇。大概講最近港股市弱，有人建議走左先，佢既睇法係，優質公司唔應該隨便見價弱就走(如果我無理解錯誤)。 呢類睇法爭論其實是難有公論，沒有答案，沒有真理，點講都可以係岩，點講都可以係錯，可以沒有什麼好討論，因為每個人投資風格都不一樣，每股股票走勢都不一樣
最近有個例子，1211比亞迪，2月見頂280開始跌，跌到最低140，跌幅一半，如果走左先，係可以避到一劫，而紅猴既疑問係，你會唔會再買返? 走左再買返同一隻股票，真係唔多見，因為通常會買左另一隻股票，而唔會一直持有現金等股價跌完再買返。
如果是長期投資者坐貨，唔走，面對既係你個倉隻比亞迪市值將會跌左一半(唔一定係蝕，你可以係低位買，但市值無左一半)。 如果有信念，溝貨，而家升返，又賺多左。 但2月尾至5月中，你會面對係股價不斷下跌既壓力，溝貨可能越溝越跌，壓力更大。好多人都面對唔到，所以走左先係適合大部份人，唔係人人都捱到股價調整果一浪。而長期投資者對於這段下跌既面對方式係信念(雖然我唔認同，因為錯誤信念會害左投資者)，不過信念不易建立。
自己坐貨面對呢段難捱，如果你曾經公開強烈推介這家公司股票並一直持有，你面對既嘢就更難。聽左你意見買入既人，未必面對到咁既跌幅，佢「信念」未必如推介者深厚，而且跟推介買的人唔會懷疑自己，佢係會懷疑推介俾佢既人，會問點解跌到咁。所以推股票既人除左自己有貨質疑自己之外，仲會俾其他人質疑佢，面對更大既心理壓力。如果係你既客戶，壓力是最大，因為你會怕你既客會走，紅猴應該係經歷緊呢樣野，好多人都係想次次賺錢，唔會蝕，但做長期投資就是要面對調整果一段時間，紅猴明，但佢既客一定唔係個個都會明，很多人都是很怕賬面虧損(就算係賺少左都係虧損)
所以，最受歡迎既買賣策略一定係趨勢投資，坐一浪止賺，坐錯就斬倉止蝕，唔需要賺到盡，唔需要優質公司，只需要食升浪，食完就走搵下一隻，是比較多人易接受到既買賣策略。特別是上年牛市，隨便篤隻強勢股都食到好高既升幅。長線投資坐貨這類策略係現時投資界係唔易做。
沒有誰對誰錯，任何穩賺既策略都係好策略，走定唔走真的取決於人既性格，有人承受到有人承受唔到，所以我曾經出post講過，唔同投資風格既人係傾唔到計，只有相同風格先可以明白大家，可以討論到。所以，我之後，都唔會評論其他人既投資對或錯，市場自然會話俾佢地知，你係對定係錯，不需要由我去評論。(不過你問我個股睇對我都會有自己睇法，但我唔會講我一定係對，要了解，沒有人可以預測任何事物未來都會100%準確)
沒有留言:
張貼留言