談談Porsche 保時捷 波子(CODE: P911)，最近上市後披露數據及公司最近發展

 Porsche AG(波子AG)係今年9月尾在德國法蘭克福交易所上市(CODE: P911)，係由Volkswagen Group(福士/福斯/大眾集團)分拆出黎。Volkswagen Group有好多大家都熟既子公司(下圖)，除左波子仲有林寶堅尼，Audi，Bentley。Volkswagen本身喺香港就少人揸，但波子，Audi，林寶就一定識。為什麼波子值得寫? 除左自己偏好之外，最重要係奢侈品是有很強投資價值。

不過都要補返一段歷史俾大家知，雖然波子係VW分拆出黎，但上市呢個係波子AG，係由波子控股(波子SE)喺2009年拆出黎賣俾VW，但同時間波子SE係控制VW GROUP，係VW既大股東，係咪好有趣呢，以下係WIKI既描述，未必睇得明，只需要知道，波子控股(波子SE)先係大佬，第2大股東是德國下薩克森州政府，第三大是今屆世界盃主辦國卡塔爾投資局。

2009年年初，保時捷控股公司（Porsche SE）收購福士汽車超過半數的股權，但金融海嘯讓保時捷控股公司也出現資金不足的問題，12月，保時捷控股公司把旗下保時捷汽車公司（Porsche AG）的百分之四十九點九的股份賣給福士汽車，邁出與其合建汽車集團的第一步^[17][18][19]。2012年7月4日，福士宣佈收購保時捷汽車公司百分之百的股份^[20]，但保時捷控股公司已擁有福士汽車集團公司（VW AG）過半數股權。2013年歐盟法庭宣判"福士汽車法"中規定福士汽車股東會決議須有八成股權同意的規定無效，保時捷控股公司正式控制了福士汽車集團公司，保時捷控股公司中保時捷家族擁有半數股權，但卻有百分之百的股東投票權，保時捷家族因此在實際上控制了福士汽車集團。不過保時捷控股公司並未擁有百分之75的福士汽車集團股權，所以福士汽車集團的營收不列入保時捷控股公司的營收。

https://zh.m.wikipedia.org/zh-hk/%E5%A4%A7%E4%BC%97%E9%9B%86%E5%9B%A2

歐洲大家都識既消費品牌一定係奢侈品果堆LV(MC)，GUCCI(母公司Kering（KER）)，HERMES(RMS)，PRADA(1913.HK)，都有在歐洲上市(除左PRADA)，而且過去10年升幅都冠絕大部份公司(除左PRADA)，奢侈品品牌為佢地製造很強的競爭優勢，其他公司難以競爭，原因唔係佢地賣得貴，而係佢地有好長既歷史先可以建立到今日既品牌而其他公司難以短時間搶到佢地既市場，你一個初創公司要做一個手袋，點樣可以令人覺得你個袋既價值可以等同於HERMES? 或者一個老品牌如何創造新款既袋令人覺得你可以同HERMES比? 超難。少競爭係這類公司穩升原因之一，另一個原因當然都要錢配合，全球人均消費力上升先可以有更多人既人有錢去買這類高價產品，收入唔升，好難跳得入成為HERMES長期客戶門檻，儲錢買一兩個係可以但對公司長期收入增長幫助不大，全球QE後人均可支配收入明顯上升，香港已經係，美國更加係，中國更不用說，疫情前自由行來港買金人數都多到逼爆金鋪。題外話唔講咁多住，講返波子。下圖是上面4家公司近十幾年股價圖，次序如上述一樣。

講波子D數之前，講下公司管理層，因為Volkswagen最近都出現人事變動，對波子未來發展都有重大影響，波子CEO係奧利弗·布魯默 (Oliver Blume)，2015年10月開始做波子CEO，佢係接替 Matthias Müller，因為 Matthias Müller 升左上去做Volkswagen CEO。 Oliver Blume今年都經歷Matthias Müller之前既經歷，因為Oliver Blume今年9月升左上去做Volkswagen CEO，就係波子開始準備上市前就升左職，不同的是，Oliver Blume兼任埋波子CEO，而無其他人代替，所以佢應該係近年同時做VW同波子兩個公司既CEO既人，董事會咁睇重佢，一定有原因。

Matthias Müller與Oliver Blume中間其實有另一任CEO，即係Oliver Blume之前果一位，係Herbert Diess，佢被離職既原因根據市場報導係因為佢想大攪電動車，但VW核心技術就係燃油，如果突然大幅轉去電動，會大幅裁員近3萬員工，這個舉動觸發起工會神經，令到公司內部有不滿聲音，被市場認為是要炒佢既原因。VW轉型與其他傳動車廠面對一樣既難題，雖然手上有資金，有生產線，有技術，但燃油車與新能源車除左個油箱引擎換做電池電機之外，仲有好多其他設計上既考慮，特別是軟件。新能源架構下汽車系統是以前不注重，現在被普遍注重的東西，傳統車廠缺乏這種技術，Herbert Diess被炒另一個原因係佢既VW軟體子公司CARIAD專案研發成果不如預期或許有關，CARIAD進度不如預期，令原本計畫好推出既車型要延後2-3年推出，原預期2024年推出Level 4自動駕駛車型，可能要2026甚至2027才可以出到。要2024年出LV4自駕，都算是艱難級任務。其實油車公司面對既問題除左軟件，自身定位都有一定障礙。

喜歡這些跑車級高價車的人，會買波子既原因除左馬力強，加速快，仲有駕駛體驗，例如引擎氣喉聲，轉波既聲，如何讓用家接受新能源車可能無左部份以往喜歡的特色，是對公司所有人的考驗。經營上既風險可以有好多，但投資上又係另一考慮。

近期經營數據上，波子銷量係未受疫情影響，同比持續上升，2020年全球銷量同比減少3%，2021年同比增加11%，2022年1-9月同比增加2%，但公司整體收入增加15.7%，即係產品結構中價格較高的產品銷售佔比增加左，而最強既係公司毛利率一直提高，成本控制做得好。雖然過去不等於將來，將來公司面對轉型電動或其他新能源產品，有很多不確定性，但睇返本身做開油車轉緊做電動車既中國車企，多數都係正面影響，反而提高利潤率，不過現時可以話競爭不大既環境與未來競爭很大的環境又不同說法。所以決定性都係管理既人身上，如何因應當時情況將公司價值擴大，不是數據上可以預期到將來，但從幾個方面去考慮，車企之中，波子可以列入最佳考慮之列，原因如下:

https://investorrelations.porsche.com/en/financial-figures/

1. 強大的品牌價值

波子品牌就如手袋界的HERMES，保值率高，中國是保時捷最大的一個市場，佔公司收入超過31%，根據最近中國汽車流通協會數據，在德系品牌中，波子3年保值率高達96.47%，遠高於第2位既BENZ 只有77.74%。HERMES袋唔只保值，仲可以升值，車要升值就有D難，除非限量版又好吸引人但比較少。

圖片來源: https://www.autoxw.com/post/27896.html

2. 新管理層值得期待

公司每換管理層都為公司帶來新發展，可以係好，可以係壞，2015年做CEO至今，近年波子盤數做到靚一靚，再被提升為VW既CEO，Oliver Blume既管治能力我不會有什麼懷疑，至少獲得VW董事會既肯定，如果佢成功將VW及波子從燃油轉為電動車界豪華品牌，我也不會太意外。VW應該都好努力想做好為佢地不斷帶來利潤既波子。

3.技術仍然領先

除左燃油技術領先，配件都不差，電動車技術未必最領先但定位做豪華車，公司研發方向都係提高駕駛體驗，最近有報導公司研發出液晶遮光玻璃，應該業界第一家，面對現時全玻璃天窗既趨勢，除左自行加遮擋，一個可調既液晶天窗一定是較佳選擇。所以不太擔心公司競爭會被比下去，做到差異化總有市場空間，豪華車不是鬥多鬥銷量，定價過百萬既車你都唔會預期銷量超過定價幾十萬既品牌，即係你唔會認為米芝蓮d餐廳每日客流量會多過老麥，公司只要擴大銷量，提高單價，改善利潤率，做到穩增，已經可以持續提高公司價值。

https://www.carstuff.com.tw/topic/item/37080-porsche-taycan.html

小結

波子呢間公司要講有排講，但大家要明白幾樣野就夠，公司衰退機會低，有能力保持穩增，業務不會每年幾十%高增長，有十幾%已經算好，不要預期短時間會升十倍，倍升都要較長時間，這家公司一定是歐股入面必定要關注既公司之一。

至於買入位，當然越平越好，但公司上市後股價一直升，歐股市場都係10月初開始跌轉升，短期難有大減價，想做長線投資就等待一下，平返10個%已經好好，因為你唔係預期短時間倍升，買入位要等返黎。最尾，大家都要有個買賣到歐洲股票既戶口先可以買，至於邊間就大家自己搵下，我唔幫佢地宣傳(無收錢唔幫haha)。

香港勞動人口減少原因

最近有篇報導(https://cmmns.co/zfW0F)指自2019年6-8月開始，香港勞動人口開始減少，報導入面結論係疫情(外藉人士離港)同移民是原因。不過我想指出，報導提出數據，提出勞動人口減少，然後一下飛左去結論，就係因為這兩個原因，中間無論證或其他數據支持這兩個原因，移民數據?沒有，外藉人士離港數據?沒有。如果要分析勞動人口減少原因，要了解香港人口結構變化。

香港出生人口一直跌，每年新加入勞動人口一直減少，而每年超過65退休的人口逐漸增加。早在2011年，林奮強就香港人口數據去預測(https://paper.hket.com/article/855113/%E9%A6%99%E6%B8%AF%E9%BB%83%E9%87%915%E5%B9%B4%20%E5%8F%AF%E8%AE%8A50%E5%B9%B4)

，到了2016年，香港勞動人口就會減少。其實好易計，當年有幾多個0-4歲，15年後，就係15-19歲既人口，唔計外來人口，要預測唔難。但佢預測同實際數據唔一致，佢預期2016年勞動人口會減少，但實際上要去到2019年至今才一直減少。佢預計唔準既地方係外來人口比較難預計。

勞動人口定義係15歲以上有工做或無工做而又有打算搵工做既人，過去3年勞動人口減少23-24萬人。

政府統計處 : 表6：勞動人口、失業及就業不足統計數字 (censtatd.gov.hk)

如果用整體人口計，15歲以上過去3年既人口減少左5萬左右，如果只計15-64歲，減少左21.8萬人，由64歲踏入65歲既人比14歲踏入15歲既，3年黎累計多出21.8萬人。退休人數遠多於畢業人數。21.8萬已經很接近勞動人口減少，當中可以包含移居人士。

政府統計處 : 表1A：按性別及年齡組別劃分的人口 (censtatd.gov.hk)

之前有公佈每年移居外地人數，係根據領事館發簽證既數字，但最近無提，有篇報導有講淨移出，但港府唔承認係移民。 (【移民潮？】2021年香港居民淨移出2.73萬人　港府：以此證移民潮屬「以偏概全」（附10年數據、普查重點） - 香港經濟日報 - 即時新聞頻道 - 即市財經 - 宏觀解讀 - D220228 (hket.com))，淨移未必準確，做個參考咁過去3年都少左10萬人。我見部份用出入境人數更唔準確，有D報導話過去3個月咁樣計少左14萬，完全錯，如果好似某D”明星”返內地長期居住，納入出境之後無再入境既人，已經是有錯誤。移居又未必一定係長期，可能隨時又返返黎，所以好難計算，但一定唔會係少。

香港單程證來港人士之前每年有4-5萬，80%都是15-65歲這個範圍(https://www.info.gov.hk/gia/general/201711/29/P2017112900344.htm)，不過近幾年減少左，疫情原因，之前每年有3萬幾人(4-5萬既80%)加入勞動市場，近3年得返幾千至萬幾，都令勞動人口有一定減少，3年累計大約5-6萬。

疫情影響人口流動對勞動人口都有影響，不過主要都係人口老化影響是最大，其次移居，無論係移居外國或移居內地都係移居，但唔代表佢地唔會返返黎香港。唔會再返返勞動市場其實只有退休人士(可能有少部份突然又入返勞動市場既)。

要維持勞動人口唔跌，得一個方法，引入香港以外既勞動人口來港，因為本地出生人口好難推高到足以彌補人口老化果個數字，以前一個生幾個，你要追即係要香港人一個生幾個再乘2，無可能發生。香港住屋市場發展同人口發展關係都好密切，人口等如總體住屋需求，住屋數目等如整體供應，供應之前跟唔上香港自然人口+外來人口既增長，但如果香港人口出現自然下降，外來人口不足，供應繼續增加，住屋供過於求的情況遲早會出現，不過政府可以有好多措施引外地人口來港工作及居住，亦都可以控制住屋供應量，所以供過於求情況應該好難長期發生，短期出現可能會。

了解左人口未來發展趨勢，你都大概可以了解未來香港既整體發展，例如可能延遲退休年齡，醫療需求大而新醫療人手少，會引入外地醫療人員，或者其他行業出現同類情況都會引入外來相關人員。

大家對香港人口及勞動人口有個認知就可以，要預計太遠既事係好難，中間可以有很多事改變你既預測，同埋預測這些複雜的事留返俾林奮強這些專家吧。

過往5年港股股息率達5%的高息股實際回報

好多人想收息，但過去5年如果買收息股，最高最低回報會係如何? 又有冇人講過? 叫人買收息股既，永遠只講好既一面，但有邊個會講實際情況，你會面臨咩風險? 你真係會賺到幾多? 還是要蝕錢? 

https://docs.google.com/spreadsheets/d/1DxJDbkXKK2wUbV0iTvJKTAbOW4-fPOZHkvpjz-Cz22E/edit?usp=sharing

以上個表是回顧過去5年，2017年4月17日，港股股息率有5%以上既港股，如果買入持有至今總收股息，股價變化，息與股價變化一齊計既實際回報。俾大家睇下如果當時揀5%以上息率既股，5年後你賺幾多?

當時息率5%以上既港股有187間公司，假設現在有一個人在2017年4月17日想買股收息，預期持有5年，之後唔增持，收息拎現金用左佢，唔會再投資返係股票入面。5年後，每年至少有5%回報，5年回報就是25%，舉個例，你投資10萬，每年收5%息，每年收5,000蚊，5年收25,000蚊，相對10萬回報率就係25%。

如果只計收息，有幾多可以平均每年收到達到5%既股息回報? 假設用50萬買入股票，5%股息率即係每年收25,000蚊股息，5年共收12.5萬就達標，表上第H行就是每間公司總收息金額，結果是87間公司可以之後5年收到12.5萬蚊股息，佔整體187間的46.5%。即是，如果2017年只在5%息率的港股隨意選擇，之後5年收得返5%息既機會率不足50%。

另一個角度睇，唔理股息收左幾多，股息+股價變化，5年內實際回報要有25%，只有36間公司達25%標準，佔187間公司的18.7%。如果只睇息率去揀股買，只有18.7%可以達到每年5%回報。

87間公司係派到息，但總回報率有25%以上既公司只有35間，有51間公司派到息但回報低，其實答案很簡單，就係公司股價係過去5年下跌，即係派到息既公司之中都有59%既公司會令收息者賺息蝕價。不過最近港股弱，如果另一個時段去睇可能會多D公司達標。

如果揀市值大既公司，可唔可以令你增加揀中穩收息既公司? 

市值最大6間公司係銀行，包括四大中國國有銀行，加上匯豐及中銀香港，5年都達唔到實際回報率25%標準，最高既工商銀行只有23%，最低係匯豐，只有5%，雖然匯豐最近回升返，但5年前買持有至今計埋息只有5%回報。匯豐、農行、中行與中銀香港回報較低，主要原因是股價過左5年跌左16%，影響整體回報，農行如果投資50萬，收返$145,583股息，比工行還要多，但股票賬面值虧損$80,000，賺左息蝕左價，收14.5萬股息蝕返8萬出去，淨賺只有6.5萬，5年回報率只有13%。

按市值大至小排，頭3家達到25%實際回報率既是周大福，聯想，電訊盈科，後兩者就係俾恆指剔走左曾經成份股。以下股票是派到超過125,000股息，加埋股票賬面值，總回報率達25%的港股，總共29間公司。

股價跌係咪一定達唔到標? 股市總有少許例外情況，例如3383雅居樂，股價跌左42%，但派息多，計返息5年都有26%回報，另一個朗生醫藥，股價跌41.8%，但實際回報有58%，原因是最近一次公司派特別股息，將公司現金派哂俾股東。

有個同雅居樂好相似既情況，就係恆大3333，恆大股價雖然跌左80%，由8.28跌至1.65，但如果5年前一直持有至今，每股收左3.76港元股息，實際回報是-35%。曾經睇書有提到，高息股是熊市保護傘，雖然股價跌，但持續收息抵銷跌幅，令回報高於低息股，果本書是統計美股高息股得出的結論。之後有時間我可以做多次全港股統計，睇下高息股在熊市下是否保障到投資者。

未做統計之前比張有趣既股價圖大家睇，過去5年，派息同股價都穩既電盈，對比低息既騰訊，無息既BABA，一樣有息同樣做電信業務既同業中移動，同埋散戶最愛匯豐，電盈除左略低於騰訊，過去5年跑贏哂全部公司，曾經俾散戶鬧到爆既電盈，過去5年表現竟然出眾，其中一個原因應該係ViuTv有關，之後會寫下電盈。

如果要講股息係保護傘，真係可以好多野講，有息中移動不及電盈，無息既BABA衰過電盈，股王騰訊都就快不敵電盈，這5年時間是很精彩，當然另一個時間段落又會唔一樣，如果早一年去睇，騰訊+300%，BABA+200%。呢張圖我可以開另一篇黎寫。

講返正題，計實際回報率，5%息既頭3間最高回報公司是什麼?

1.6865 福萊特玻璃: 1642%回報，主要來自股價大升，公司靠光伏玻璃需求大漲推動收入利潤上升，2017年是公司經營最困難時期，成本上漲令公司利潤同比下跌，但之後光伏市場大熱，公司亦都大賺。

2.1830 完美醫療: 757%回報，即係必瘦站，大家應該都見過佢既廣告，但應該好少人5年前預計到升咁多，最近公司發展內地市場成功是股價上升原因之一。

3.1523 珩灣科技: 460%回報，曾經愛股，大家都應該見唔少我寫過佢，大家可以上FACEBOOK搵返舊文睇返。

1373 國際家居零售，即係日本城，David Webb愛股，排第10，回報率103%，仲有好多股都值得講，不過唔一一介紹了，之後有機會再介紹。

要點先揀到賺價又賺息既股? 這個留返收費欄寫

以上資料不代表全體港股，因為我一開始定左5%以上息率既港股去睇，如果定低d入場門檻例如4%或3%，會有更多公司進入研究範圍內，例如941中移動，當時息率只有3.2%，入唔到，但佢都係高息股，最近2年息率都有5-6%，所以如果不設5%門檻，全部股去睇，有更多股票是可以再研究。

以上資料供大家參考與思考，我相信就算降低門檻，個達標比率唔會有太大變化(如果定在5年25%回報)，如果降低回報率(例如每年4%，5年20%)咁達標比率一定會高d，所以以上設定不代表一切，只代表這個設定下的比率。

總結(十分重要)

希望大家明白一個道理，買收息股，不是只睇股息率，大家見到股息率揀股，以上設定只有46.5%公司之後5年派到一樣息俾你，但就算派到息，有唔少蝕埋股價，得返不到20%是保到回報率。另外，不是覺得穩陣就是可以，好多人覺得銀行股穩陣，但6大市值既銀行股，過去5年回報大家都見到。要賺息又要賺埋價，其實係好難，一樣要做功課了解間公司，唔係人地講買乜乜乜砌個股息組合，每年收息就以為真係一定可以年年收到息。

一定收到高息既產品只有一定同你贖回債券既高息債券(但債券是無一定贖返的)，佢低息環境下俾得高息你，當中一定有些風險溢價，不過相對股票收息，債券收息應該係更保障收息果一部份(除非佢違約)。債券有幾大風險，要計一次先答到大家，如果想收息，債券應該比股票簡單很多，純收息真係唔好諗股票。對於長期投資者，股票派息只係抵銷部份股價下跌之用，不是給你當利息的。

最尾賣少少廣告，就是本人收費欄最近有一個月半價優惠，有興趣可以參考華富既帖(傳送門: https://www.facebook.com/quamnethk/posts/5751364314877679)