2020年5月20日 星期三

小米 (1810) 2020 Q1 業績簡析



小米1810,第一季業績
總收入增長13.6%...
主要係手機收入增得OK~
互聯網服務收入增長都勁....
主要靠遊戲收入15億+80%.
仲有 有品電商平台、金融科技業務、電視互聯網服務以及境外互聯網服務所產生的收入, 同比增長71.5%

收入都係谷出黎,最緊要係毛利,睇返公司解釋,以下係引自公司業績

智能手機分部毛利率由2019年第一季度的3.3%升至2020年第一季度的 8.1%。2019年第一季度正處於我們境外市場的產品切換期間,我們為籌備於2019年2月 底至3月推出的新款智能手機而對部分智能手機型號進行了促銷,造成了該季度較低的 毛利率。我們在2020年第一季度發佈的Mi 10和Mi 10 Pro等數款熱門機型憑藉其優越的性 能深受市場歡迎。發佈新產品後我們智能手機業務的毛利率於2020年第一季度上升。

IoT與生活消費產品分部毛利率由2019年第一季度的12.0%升至2020年第一季度的13.4%, 是由於毛利率較高的IoT產品的收入佔比增高所致。

互聯網服務分部毛利率由2019年第 一季度的67.4%降至2020年第一季度的57.1%,主要是由於遊戲及其他增值服務業務的收 入佔比上升,而這些業務的毛利率比廣告業務毛利率低,及我們的金融科技業務毛利率 下降所致。於2020年第一季度,受疫情影響,我們增加了金融科技業務的減值撥備。

睇返前幾季度手機毛利率就見到D變化
智能手機毛利率
2018Q4係6.1%
2019Q1係3.4%
2019Q4係7.8%
2020Q1係8.8%,

係上年Q1太低,今年Q1係提高左,而且手機毛利率一直上升緊,所以毛利增長好高,應該同佢越賣越多高價機影響,所以手機毛利增長咁勁....

IOT都係靠高毛利率產品推高毛利增長

銷售開支同毛利增長差唔多,
行政開支都增長高,
研究開支增長慢都慳到D錢

唔計其他雜項利潤增長都靚

小米而家係靠提高毛利率去增加利潤...
我睇到就係咁,大家可以再深入睇...
呢隻我本人興趣不大....所以唔寫咁長了

2020年5月10日 星期日

舜宇光學 (2382) 大行預測與實際值的研究


增長,增長,增長,呢句係百倍股果本書(100 Baggers: Stocks That Return 100-to-1 and How To Find Them)入面第2個原則 (第1個原則係你必須以100倍做目標,唔係1倍唔係2倍)

但係問題來了,以往既增長,有哂歷史俾人睇,好易睇到,但未來增長呢? 大家都知好難預測。點先知未來增長係幾多? 以前每年增長30%,未來3年都一定會係? 唔一定架嘛

咁咩人係有方法預計得到? 公司ceo? 佢最熟公司,咁照計最有可能計到果個就係佢,但佢預計到都唔會講出黎 (美國大公司有未來1年業績指引算係一個預測,香港無),但就算美國公司自己既預測都唔係準,佢都會不斷調高 (其實無人要求公司講出黎個預測一定要準)

再者,ceo都未必預計得到 (叻果d ceo會預計到有市場機會,會提早部署,但部署都可以錯/唔足夠),咁ceo果d我地無資料做back test....咁最公開既又可以知到個預計值可以做back test既,得返大行既分析報告。

咁今次我就係想研下,成日做開預測既大行,資源最多既分析員,係曾經十倍股上預測係點?

所以我拎左2382舜宇光學呢隻曾經100倍股,做研究對象,因為佢市值大,多大行會跟(其實百倍前d日子無咩人跟),我由2015年開始睇,太舊既時間太少資料。呢隻雖然大但報告都唔算特別多(我只有中資行既source)。其實應該睇多幾間,不過寫住一間先。今次我只計2015-2016年大行報告,因為舜宇2014-2018年升得最快,2016年既報告會預測到2018年。我知得7份報告係比較少,不過資源有限,無辦法。

入正題,以下呢個表係大行收入預測vs實際值


由於我個Source主要係中資大行,所以資料有限,但我估同外資大行差別不大

1.2015年收入,實際收入高出預測收入4-5%,唔算差距好大
2.2016年收入, 係2015年做預測既大行差距比較大,實際值高過預測值20%, 2016年做預測既,越接近年尾,大行估計相對差距較少。平均值上,實際高於預測7%, 因為出左上半年數相對易估下半年數,所以全年數會較接近實際值。
3.2017年收入,2015年預測既,實際遠高於預測64-72%, 2016年預測既,實際值高於平均預測值42%,差距是超大
4.2018年收入,2016年預測既,實際值高於平均預測值42%,同樣差距超大

再睇利潤

1.2015年利潤,實際利潤高出預測平均8%,唔算差距好大
2.2016年利潤, 係2015年做預測既大行差距比較大,實際值高過預測值47%, 2016年做預測既,平均值上,實際高於預測16%
3.2017年利潤,2015年預測既,實際遠高於預測187%, 2016年預測既,實際值高於平均預測值106%,差距是超大
4.2018年利潤,2016年預測既,實際值高於平均預測值44%

股價升幅與收入/盈利升幅及實際值高於預測值百分比關係圖

近5年,除左2018年,舜宇都係盈利增長高於收入增長,而股價增長同樣除了2018年,股價增長都大於盈利增長。亦都反映公司估值(P/E)越來越高。主要係公司盈利增長一直超預期,特別係2017年大超預期,所以股價增長最大,兩個原因1.盈利超高增長,2.盈利增長遠超大行,市場對公司前景更樂觀,給予更高估值水平。但2018年好似有D奇怪,實際值都係高於預測值超過40%,但股價跌得多過盈利倒退百份比,因為我既大行報告只去到2016年,可能係2017-18年,大行對公司期望更高,但實際數值低過預測值,所以係我數據出左問題。

結論

對於高增長既公司,要估未來3年收入同利潤係極其困難.對於收入來說,2015年去估2017年收入,大行低估左40%,2016年去估2018年,低估33%,利潤果邊,2015年去估2017年利潤,大行低估左64.8%,2016年去估2018年低估31%。

其實,就係因為大行估得唔夠高,如果大行估到舜宇2017年有咁高收入同利潤,2015年就唔會係呢個價。

而圖表亦都見到,收入,盈利增長係肯定帶動到股價增長,但要係高於市場預期既大型股,中小型股股價增長有機會低於盈利增長幅度。不過都同市場預期有關,只係中小型股無/無乜大行報告,你唔知佢地預期幾多。

而事實上,又係唔係要真係估得中幾高盈利增長先賺到十倍回報呢? 或者舜宇增長低D,咁個故事會係點? 其實佢增長唔係之前咁強,只係股價十倍既時間會延長左,唔係2年幾就完成(最遲係2016年2月前仲可以17蚊以下買到舜宇,2018年6月就17X蚊,十倍),增長無舜宇咁高既公司,就要5年/10年時間或更多時間,坐耐D。不過耐性又係一大難題。

咁所以,要達成十倍股價,2個因素,
1.收入要高增長,而盈利增長不能低於收入增長,一定要高於甚至遠高於收入增幅,呢個要睇公司商業模式。即係如果估值無提高無降低既情況下,盈利至少要增長10倍。(虧損科技股同生技股或新經濟未有利潤行業,是另一個計算方式)

2.估值提高,呢個要靠公司增長高於市場預期,如果市場一早預期你極高增長,但你只有高增長,股價有好大機會跟唔足。估值有提高,盈利增長可以唔洗10倍都做到股價10倍,如果估值下降,盈利就要多過10倍增長。

以上既內容可能有人覺得阿媽係女人,我係未講到如何能預測公司未來盈利增長,但呢個無得教,因為每間公司都唔同,要有遠見,即係手機未有雙鏡頭之前,你已經要預計到舜宇受益雙鏡頭而有盈利大增的機會。呢樣係要想像力+對行業認識+唔係諗D無咩機會發生既野,例如某某公司會出個破天方既產品,即係乜?唔知,要實際有好大機會發生既預測,而唔係幻想出黎既事物。



2020年5月9日 星期六

十倍股D市盈率係點? 曾經十倍港股市盈率統計數據

頭先睇左個youtuber講P/E...市盈率.......
應該係投資者常犯十大錯誤觀念之一
其實市盈率呢個野,我應該講過好很多次....
總結就係市盈率參考性係零

不過見人講左D point,我又屎忽痕走去驗證一下
佢個point是咁的, 市盈率高於15倍會有加分~
因為市場認定呢類公司有前景,先會俾高市盈率
我理解佢意思是咁~

咁我就屎忽痕拎返之前整既曾經10倍股做個check~
不過我只有港股數據,唔完善~(應該睇埋中美市場)

而且我係懶唔夠精準.....所以呢個圖,大家有個概念好了~



實際數字要再花時間調較~不過.......有需要先再算
正確應該係統計升果段入面,D公司既P/E......

幅圖是咁的,我拎返2013年12月底至現時曾經出現過10倍以上升幅既股票,大約7x隻... 然後剔走d最高價唔高過1蚊既細股~(最低價係仙既仙股有keep), 高位前一個月日均成交額少過100萬既剔走(易俾人做高), 市值無考慮高低(升左10倍以上都唔會低得去邊), 所以入面有妖股,有正常股......大約70隻

由於曾經10倍過既股票都擺係度,所以假如佢2017年股價見頂, 之後跌左一半,佢2018,2019年底個P/E都係會KEEP埋一齊做統計~即係升緊果段同跌返落黎果段既P/E都有計~(懶,其實應該只睇升果段)

我係計每年年底個P/E.....

個統計數字就係咁,3段P/E既公司數目差唔多,虧損,P/E 0-15,P/E大過15既公司數目都好相近,除左明顯虧損既公司比較多之外,唔覺有明顯偏向高P/E....虧損果D大部份都是妖股......(香港唔同美國)...2018年虧損果D有阿里影業,阿里健康(最近勁升啦), 鼎益豐,光啟科學呢D....

咁0-15倍P/E果D係咩公司? 年年唔同我同樣抽2018年講,有內房....恆大,融創,新城發展,中國奧園果D, 賣車公司,中升,美東,春立醫療都係0-15

15倍以上,舜宇,金斯瑞,頤海,丘鈦,中海物業.. 

其實,我只想帶出,咩P/E都好,都可以有10倍股,係咪低P/E或高P/E,股價就會一定升得勁? 
同一堆低P/E股,係咪全部都會升返上去變正常P/E? (NO~) 
高P/E股係咪就會一定股價大升? (NO~)

我想強調舉單一股票或者就算舉十隻股票出黎做例子,都變成偏見(BIAS)... 或者好容易犯左一個好多投資者都犯既錯誤,以偏概全~

即係見到A公司股價勁升,佢P/E一直高喎,咁買同樣一直高P/E既B公司都一樣勁升啦~買買買 錯哂~

一個選股準則,係要經過統計學去驗證先可以叫做一個正確既投資準則,即係所有股票都要睇係咪有超過一半既公司都成立

如果一個準則,例如低P/E既公司會較大機會有10倍股,呢一個假設,經過統計數據驗證過係錯既... 咁佢就唔係一個正確既選股準則


不過我呢次都無全部將全部公司納入統計範圍,只納入曾經十倍既股票,只有70隻,係偏少,所以我話呢個表參考下算,有時間應該係將全部股票升果段既P/E去做一個統計,但由於超大工程,要花唔少時間.....但我覺得結論唔會偏差太遠....

之前篇文都用AMAZON舉例講過會計上利潤唔一定係真正利潤
咁所以P/E未必係真正既P/E....
所以直接睇P/E.....用途不大........
至於要睇乜? 

我慢慢糾正返大家D錯誤觀念先再講啦~

2020年5月7日 星期四

利潤是陷阱? 虧損反而是寶物?

我今次想講既係利潤的陷阱
以前我地睇書學買股票...
好多時d人都係教人睇P/E...
間公司一定要有利潤先好投資
P/E低先係平...我都係睇呢D書大
而且我一開始學就係睇呢D
所以深信不疑,而且都有見過唔少低P/E股勁升既經驗
(買就好少買得中,呢個係我自己問題,遲D再講)
但當投資經驗多左就發覺,P/E低既香港股票70%都係伏(而家可能有80-90%)
至於點解,呢個又真係可以有排講...今日唔講住

點解我講"利潤"會係一個陷阱?唔通虧損先係好野?
有D公司明明連續多年虧損,但股價一直長升~
或者每股盈利好低,估值超高,一直KEEP住幾百倍P/E
但可以升幾倍.....
呢類公司主要出現係美股,仲要係科技相關既公司
相比起香港果D低P/E股,可以幾年都唔升,得波幅~
我今次會以amazon做例子,呢個網幾好,有齊哂d數
https://www.macrotrends.net/stocks/charts/AMZN/amazon/revenue
我都係cap佢入面d數做圖


點解會有呢種奇怪情況? amazon賺得咁少錢,估值可以咁高,幾百倍P/E?

主要係會計制度上利潤並不等於真正利潤...
amazon 有好多開支係Depreciation(折舊),不是真正現金支出
2015年公司淨利潤(net income) 596million usd
2015年 公司Depreciation(折舊) 6,281million usd
2015年公司經營現金流(cash flow from operating) 12,039millon
2015年公司自由現金流(free cash flow) 7,347.6millon
2016年3月公司市值約282,600million (股價$600)
見唔見到,個折舊加返落淨利潤,6,877million,已經好接近自由現金流
公司市值除以自由現金流,只係38.5倍
而當時公司市盈率約474倍...
看到分別了沒有?



另外,仲有一個因素係令公司股價勁升4倍...
收入......
2015年底,公司收入107Billion
2019年底,280.522Billion
+161%......等於107*2.6...
如果2016年3月股價係600...2020年3月應該至少1560
3月中大跌果陣,公司股價最低1626....
看到關係了嗎?



我無cap佢2019年利潤率同利潤,大家可以上頭先個網睇
只要收入膨脹, 開支增長慢過收入增長(公司營運趨成熟),
利潤率就會升得好快...利潤好快由低轉高....
而家公司虧損或賺得好少(利潤率好低)
但好快公司就會利潤率爆升,利潤上升
Tesla,都係呢個原因...(當然仲有公司自己其他原因)
其實呢單野同負油價一樣,人類對於負數既概念基本上係無....
虧損就係負數,負概念,轉正數既影響有幾大,好少人可以理解...
特別上係會計上既概念好多人都唔熟....
我估上面我講幾個Term都無咩人知係乜(有讀過下就一定知) 

今日寫住咁多先,已經好長~
其實篇文入面有好多野要解釋返
呢d真係拍條片講方便過打字...
因為真係好多野要解釋同講......
唔好以為蝕錢公司就一定係好
唔好以為蝕錢公司就一定係好
唔好以為蝕錢公司就一定係好
上面只係一d適用於某d公司既例子
仲有好多其他因素要去睇先可以判斷
真係講唔哂,唔明再問,遲d真係要拍片解釋
一陣你地誤解左蝕錢就係正野就大獲~
總之,之後再補充,理解左先好去投資

2020年5月2日 星期六

Poker 與 投資

網上面都有好多人寫過,甚至拍過片去講Poker 與投資既相似地方,至於我點解又要寫Poker與投資,主要係因為睇左日本散戶股神cis講佢有玩開poker(其實佢打麻雀多過玩poker),而美國股神buffett(巴菲特/畢菲特)亦都好鍾意玩poker。就令我諗到poker同投資/投機都一定有好大既聯繫

另外我前兩個月睇左一本書,叫<Thinking in Bets: Making Smarter Decisions When You Don't Have All the Facts> by Annie Duke, Goodreads 評級3.8分(唔算好高分)。中文版:「高勝算決策:如何在面對決定時,降低失誤,每次出手成功率都比對手高?」,睇完啟發到我要寫下呢個題目,當中有句幾有意思,生活是扑克,不是象棋。其實人生好多決定都係You Don't Have All the Facts之下去Make Decisions。最簡單,就好似你同唔同某個人拍拖/結婚/生仔,都係You Don't Have All the Facts。 不過當時睇書諗到既野,而家有D唔記得左,所以我會再睇返本書,遲下諗到D咩野會再補充返。
https://www.goodreads.com/book/show/35957157-thinking-in-bets

作者:Annie Duke,中文版介紹佢果段其中一部份係咁寫:  「曾於職業撲克玩家生涯贏得世界撲克大賽金手鐲,是唯一獲得世界撲克冠軍聯賽NBC國家撲克冠軍杯單挑賽冠軍的女性牌手。」所以,值得睇睇。書唔多介紹了,留返下次。

今次唔係書藉介紹,入返正題,Poker 與 投資,首先介紹Poker玩法,網上有好多片教,有玩過既可以skip左睇片呢part。搵左條片係一隻手遊介紹poker玩法,6分鐘,唔識既可以睇左先。https://www.youtube.com/watch?v=my5bEyyzD58
另外有條片係拍俾新手睇,我覺得會更清楚
https://www.youtube.com/watch?v=GLPa_3iRoio


簡單d講,poker就係玩家,與其他玩家對賭既遊戲,真正既zero sum game,即係類似麻雀,無人係中間抽佣的話,你賺既錢就係其他對手蝕既錢,每局只有一個贏家。 玩poker面對既難題,亦都係投資上會面對到。

玩Poker經歷既係d咩,投資又會經歷d咩?

1.不完整的訊息
Poker每次開局(派左2隻牌但未開牌就已經唔跟住果下唔計開局啦,雖然果陣已經算係開始左),出面只有3張已公開既牌,仲有兩張未出是未知既牌,一輪下注後先會再開餘下兩張。開始時候手上兩張牌+上面3張牌,可以預計自己當時既勝出機會率,但隨住其他兩張牌開出,會扭轉你預計既勝出機會率及對手勝出既機會率,可以增加或者減少。另外就係對手牌型訊息,基本上最初開始唔會估到,之後可以憑對手跟注/加注金額去估對手既牌係乜,但對手都可以係無靚牌加大注去令你以為佢有靚牌,例如最後一輪下注ALL IN。 面對既就係不完整訊息下,如何安排合適既賭注。

投資上面對是更多不完整既訊息,你知既可能只係公司年報,至於公司內部運作情況,除非你認識內部工作既人(當然是高層),否則可知既資料很少,另外就係新聞,或者是分析員寫既報告,如果係面向大眾銷售既公司,會知道佢既產品/服務,但如果面向機構客既,例如賣水泥,你可能要識行內既人,先會了解到公司產品/服務。Poker只係面對幾隻牌,投資是面對很多種不同方面既訊息,複雜好多,所以訊息取捨是一個好重要要解決既首要問題。(呢個應該要教大家)

另外,股價變化都係不完整訊息,你唔知道誰在買,買既理由係乜,總共買幾多。好多時股價上升,有人就會覺得有人知道左公司有利既消息,而掃貨。相反股價急跌,會令人以為有人知道公司不利消息沽貨。類似手上無靚牌ALL IN嚇人既動作,你睇股價變動/睇到人ALL IN係唔能夠100%保證到D乜,你要去估。有人掃高股價,可以製造投資者對公司有樂觀感覺,亦都可以沽到低一低令人覺得公司前景悲觀(特登沽低情況是較少),點樣面對呢類情況? 有人可能靠技術分析,有人可能靠經驗,或者有人選擇不理會股價短期變動(例如有人話股神buffett係唔理既),所以一切都係策略,要預早去部署。

2.下注的多少
由於規則是小盲開始下注,每局首個下注既人都唔同,而最重要是最尾果位玩家有冇加注,而每個玩家要做既決定是加注/跟注/唔跟注。所以,每個人都是在不完整訊息下控制注碼,而如何下注賺到幾多,都是一門藝術,假設你開左3隻牌,你係砌到最大既葵扇同花順,100%贏硬, 你會唔會即刻就all in推哂D錢出去,一定唔會,其他對手會俾你嚇到唔敢跟注,就算有一兩個跟,你都賺唔哂其他對手既錢,你要做就是引佢地跟注跟到最尾先ALL IN。

股票上,大戶(或者叫做莊家?) 都有用到類似Poker技巧,最相似既例子就係搭棚,即係慢慢收乾D貨,慢慢推高股價引散戶跟注,然後一下跌70-80%,收割。不過呢類股票不是投資上既目標,不買妖股是我既宗旨之一。

投資都一樣,同一間公司,每日都會報上不同價格,舉Tesla為例,佢可以報上900美元一股,一個月後可以報價400美元一股,投資者都係幾個選擇,唔跟注=唔買/賣,跟=買/賣,加注掃得更高或推得更低(散戶難做到)。 然後就係買幾多賣幾多既問題,用總資產幾多%去買一間公司既股票或某個投資產品。投資上可以買超過自己總資產既資產,借錢買貨(當然不建議)。投資要控制就係倉位分佈/叫資產管理,幾多%既資產買d乜,呢個已經人人不同,超過進取型100%買一間公司搏升十倍以上,保守型100%買哂高息股,分散型買10間公司每間10%,好多種策略可以用,因應每個人喜好或需要去定。我曾經都係進取型,諗住100%買1間公司搏10倍,但發覺效果不太高,而家都開始轉變緊行多策略混合型。



3.面對其他對手反應時自己情緒控制
玩poker, 就算網上玩講唔到野,但對手落既注碼都會影響你對自己贏既機會既睇法,就算手上一副爛牌無機會贏,但你敢all in大返其他對手,令佢地覺得你好大機會贏既時候,你都可以扭轉自己由無機會贏,變左贏錢。然後唔係一局定輸贏,有D人既策略就係無靚牌唔跟,一路每局蝕少少蝕少少,之後贏就贏得唔多,無人跟你注,你要面對情緒既影響,其實情緒好多時都係做決定時影響好大既因素。


投資,當然係面對股價變動,老手就應該對股價變動無咩感覺,但新手就一定試過升左有賺就怕跌,想快D沽左佢止賺袋錢落袋,而跌左某個金額既錢就覺得好肉痛,但唔會止蝕覺得會升,呢類情緒控制係要練返黎,無得教。有人教你面對遇到熊人要點做,但當你係森林面對熊人既時候,情緒就會控制你令你咩都唔記得,腦袋一片空白,所以,是要經驗。或者可以透過其他練習練返黎,我自己初初投資都經歷過,升左就執錢走,蝕左就坐到等升,但慢慢會明白,咁樣係賺唔到大錢,情緒習慣就會適應到應該要點做,即係好似你日日對住d獅子老虎你就唔會驚一樣(詳情可以睇Netflix既Tiger King,不過你都可以話佢一出句就唔驚老虎既)。 情緒控制,是最難亦都最重要去練習既項目。


總結
寫住3點先,其實有好多可以寫,不過寫太長又變左出書其中一個Chapter咁,我想講既係,投資除左需要金融財經知識理解之外,以上幾項對於做決策既知識都好重要。坊間好多都係教金融/財經知識為主,教你了解經濟,商業,金融,呢d係助你了解訊息,點樣運用訊息去搵投資目標。但有D非金融類,策略類或心理學上既知識都係需要去了解同埋練習。呢一類係助你買賣操作。就好似你搵到十倍股,當中經歷如何面對股價波動,是另一階段既事。投資成功係需要對好多方面既知識有所理解。

另外,要了解自己,明白自己強項,弱項,修正弱項,然後發掘一套自己投資策略,呢個係無人幫到你,人地可以教適用於佢自己既策略。我唔會寫文去教大家應該點做,我覺得係應該因應果個人既性格去幫佢思考一套策略。所以睇完篇文,可能有人會覺得無咩實用工具幫佢 做決策,如果想知道有咩工具,可以睇返我開頭講果個作者出既書,可能幫到你。

遲下有機會可能我再開班教一d我認為好有用既工具,呢個就後話,開得成再算。投資上真係好多野可以講,下次諗到又再寫下。

2020年5月1日 星期五

GDP同股市既關係

GDP同股市既關係,應該點樣理解呢....

其實好吊詭既野~ 好多人誤會哂GDP,股市關係好密切...
某程度上係但係咪GDP升1個單位,股市升1個單位
定係GDP升1個單位,股市升3個單位,
又或者GDP升1個單位,股市升0.2個單位...

好簡單舉個實際數字~

中國2011年至2019年GDP增長都係高於6%(6-9%)
美國2011年至2019年GDP增長範圍1-4%...
金融海嘯後,中國GDP增長一直高於美國
2011-2019年
中國股指:滬深300,+33%, 全A股指數+63%
美國股指:S&P500,+153%, 羅素1000(市值最大1000間公司) +157%

GDP增長快既中國,股市表現卻差於美國?

點解會有咁既分別?
首先要了解基本野,GDP點計~ 
GDP計算係極其廣同複雜,公式可以上香港統計署有寫~
當然每個國家地區計算方式會有別.... 我搵左NOW財經做既一條片簡單講下GDP係點計
除左私人機構,政府開支都計算在內,有幾個大項,唔詳細係度講,自己睇片
https://www.youtube.com/watch?v=SPI4aqaAN-M
佢入面有個例子係麵包增加值,係麵包價減牛奶麵粉成本計出佢增加值..
類似麵包製造出既利潤...因為避免重複計算之前牛奶麵粉已經計左既增加值...

GDP是否等於國家整體經濟之總量?
呢個問題唔係今次要討論既野~
同埋,GDP是否等於經濟之總量呢類問題,對於投資者黎講,重要性好低
呢類問題留返俾專業既經濟學家去探討好了...
專業投資者關心既地方並非在於呢一方面...
所以我暫時假設GDP等於該國經濟之總量去討論GDP與股市

咁股票市場又點計算...
股市=上市公司市值加總...係公司市場上既價格...
如果計指數,通常係市值最高既公司加權計算得出...
通常指數只計流通市值,例如滬深300(剔除限售股),標普500只計可交易股份
就好似中石油A股,雖然市值係8126億,但流通市值只有668億,
因為有80.3%股權係限售,有11.4%係H股...
滬深300排名入面只排第79,佔0.326%...

A股市場之中,中石油2019年收入排第2(次於中石化),
25168億收入,利潤排第9,有670億

中石油係經濟中佔既地位,
同股指反映既地位,明顯有好大分別

中國收入最大既企業一定係中石化嗎? 所有有經濟活動既機構/企業都有上市嗎?
明顯唔係,最簡單,華為就已經無上市,仲有好多國企都只係分拆其中子公司上市,
就算係吉利,都無整體上市。

如果GDP=經濟總量,所有上市公司極其量只係總體經濟既一部份。仲有好多經濟活動唔會上市,政府相關經濟活動就同上市無關,例如教育、醫療(藥同設備係有上市,但醫護人員相關開支唔係),有D行業較少上市公司,例如農業(食物)、部份服務業(理髮保安清潔等)。上市公司經濟活動只係總體經濟既一部份。

而經濟活動反映於上市公司是收入與利潤之中,
而股市/指數反映是公司估值,而非收入與利潤。
就算係指數,不同時期指數市盈率都會有別

所以GDP同股市當中差異就差別在於
1.上市公司經濟活動只佔整體經濟活動一部份(百分比每個國家不同)
2.股價反映估值,並非反映經濟活動變化

GDP由好多唔同行業經濟活動組成,指數亦都一樣由多個行業組成。 GDP負增長(收縮),可能由其中幾個佔比大既行業收縮影響,例如金融/地產業,抵銷左其他行業增長導致。

指數持續下跌都可以係部份行業拖累,而非100%全部下跌,要睇返當時情況去判斷,當然整體經濟活動收縮對好多行業都會有負面影響
而熊市下,亦都好多股票股價會被拖累,至少估值會下調,因預測增長放緩等因素

但係咪代表GDP收縮/熊市,所有行業/公司都沒有投資價值? 當然不是

只是在呢個環境下,風險管理要加強返...
如果牛市是合埋眼都會有錢賺,熊市就合埋眼都會蝕錢

3月1至3月23,美股,5003間公司,只有176間有升/無升跌,S&P500跌24.9%,只有1643間公司跌得少於24.9%....(佔總數32.8%) GDP持續收縮,投資回報係好容易變左負數

疫情會係令GDP短期收縮定長期收縮,呢樣要預測一下 暫時我認為疫情影響未必超過一年,抗體+疫苗都會一年內令疫情影響逐步降低
除非有意外情況例如病毒變得令抗體難以抵抗或疫苗因病毒變化延長推出


搵返自己一篇舊文,講股市市值同GDP既關係 股神Warrent Buffett好喜歡睇美股總市值/GNP 呢個數字,去衡量美股估值
做個參考啦~最近數字可以睇呢度~ https://www.macromicro.me/charts/105/us-market-cap-gdp

我篇文

發掘十倍股重點都唔係關注宏觀環境,
選股最重要,十倍股通常都唔會係市值最大果d公司,通常由市值較細既公司慢慢越做越大去達成10倍目標,之前做過統計,香港曾經十倍股起點都普遍係100億HKD市值之內。

至於買賣策略係Buy and Hold
定係要出出入入食波幅,就再之後討論。

2020年4月18日 星期六

油價現貨, USO, USL 比較

最近,真係好多人講油價,因為油價跌到去2002年以來新低,大家都希望買少少搏反彈賺返筆。 但係好明顯好多人都係第一次接觸油既投資產品,明顯唔明白商品同股票或者其他金融產品既分別。

首先答下大家最常問既問題
問: 點解原油現貨價與期貨價差咁大?

答: 因為現貨就係現時交易既價格,期貨係未來交收既價格。舉個例可能會易明,豬肉價格,豬肉都有期貨,但應該好少人會留意。今日1斤豬肉假設賣10蚊,但開始有豬瘟,開始有豬死,咁豬肉零售商(肉檔)會點做?今日開始買期貨鎖定未來成本,但養豬商(豬肉供應商)都唔係傻既,豬肉供應商賣1個月後交收期貨出黎,一定會比現價商,因為佢知之後收入會少左,亦都知多人會搶買,下一個月交收既期價格就會高左,假設12蚊/。如果越多人預期未來價格升,之後月份既期貨價只會越來越高。所以商品牛市下,期貨價格相對現貨有溢價,長期黎講,期貨牛市下會跑輸現貨。呢個係簡單例子,當然可以有其他情況,但太複雜就唔講住。

問:咁買現貨咪可以避開? 點解無現貨石油ETF?

答: 唔係所有商品既現貨都可以坐,豬肉都可以長期擺,擺十幾年,急凍冰鮮豬,之前開倉都有d超過十年期冰鮮豬流出。但儲存成本呢?要有個凍倉儲堆豬肉,電力成本超高,倉儲成本等,d豬肉幾錢斤? 擺一年可能都蝕埋成本,所以唔會有平民會做,政府先會做。石油唔洗凍住,咪好平? 但你諗下,一桶油,20蚊美金,160蚊HKD一桶,一桶大約159公升=157公斤,1公升/1公斤大約1蚊HKD,除左倉儲仲有運輸成本呢,每單位價格咁低,所有倉儲運輸成本超高,唔同黃金,黃金1公斤係41萬HKD!!!所以,無人會做石油現貨ETF,管理費(交易成本)太高,你都唔會買。


所以,大家就唔好諗點樣買可以追到現貨油價,你只可以買既得石油期貨/石油期貨ETF。

入正題,今次要講兩隻石油期貨ETF,與現貨價歷史差距
1.USO (美國石油指數基金)
同埋
2.USL (United States12月期原油期貨ETF)
詳細大家Google啦,簡單講,USO主要買即月/下月期貨,跟貼即月油價波動,USL就係相等地買哂即月同未來11個月石油期貨,所以價格相等於未來12個月石油期貨平均價,所以對即月波動無咁貼。

呢d大家上網都會搵到,但以下資料,應該無咩網會講。我會分三期去睇兩隻ETF同埋現貨回報差距。

1.近期+下跌期

近1-6個月,WTI(現貨價)分別跌28%,62%,58%...USO同現貨價差距好少,係跟到油價跌幅,而USL係跌得比較少。因為佢拎左未來12個月平均,而未來期貨價跌得比現貨低(波幅比較少),始終多人覺得未來油價會升返,未來期貨價支持較高。

上一次2014年下跌浪,大約1年半,現貨跌左73%,USO都跌78%,可能係管理費影響,所以跌得較多少少,但USL都係跌得比較少,只跌70%。

近20年,油價長期跌浪都係比較少,2000年-2001年,2008至2009年,2014-2016年,同埋今年2020年。

不過無人會想跌浪果陣要坐貨,所以跌緊都唔應該坐石油ETF。呢度只能見到USL係跌得比較少,好似蝕得比較少,但升既時候又係點?

2.2009年後升浪

2009年最低價開始計,現貨升219%,2隻ETF完全跟唔上,都係期貨價高於現貨價導致。3個直行有咩分別,左邊係最低價至4月20,中間係最低價至4月尾,相睇轉倉影響,但影響好像不明顯,右邊係用左唔係最低價去睇,見到現價增幅係少一半,現貨同ETF差距就細左好多。

如果比較兩隻ETF,今次又係USL表現比USO好,大約6.5%-14%優勢。睇埋另一個升浪。

3.2016及2017年後升浪

睇埋另一個升浪,2014跌到2016年2月見底後重新升返,無計到2018年9月最高,只計到2月,岩岩好2年時間,現貨同期貨ETF差距都係好大,中間果個用2017年6月唔係最低價,只係中途另一個浪開始前既浪底去計,現價升幅46%,USO同USL都差距大縮窄,右邊係再調整睇下有冇唔同,都係一樣差別不大。

只要油價唔係大幅波動時買,期貨ETF同現貨價回報分別不大(現貨同期貨價差無大變化)。用現貨最低價計,一定係有出入,始終兩樣野黎。

但今浪USL反而跑輸USO,呢個同平均期貨差距同即月期貨差距有關。但暫時手頭未有數據可以講解。

少少結論:
現貨價最低/最底果陣係咪最佳買入期貨ETF時機? 睇歷史數據反而唔係,反而係油價穩定返,現貨同期貨價差收窄先係最好時機。 

USO同USL邊個好D?
USL係跌市都比較好抗跌,但升市又未必次次都跑贏USO,但感覺上USL比較好坐,就算摸唔中底,繼續跌,都可以跌少D。

其實最重要問問題係
油期ETF係咪真係好既投資對象? 
過去食哂成個升浪,升幅都係40%-100%,對於買開股票既我黎講,呢個升幅真係唔吸引,但現價大家覺得油價咁平再跌空間唔大,唔通跌返去10蚊咩? 都已經18-19蚊,我真係答唔到, 油價60蚊果陣邊個會覺得跌到落40蚊,40蚊果陣邊個會估到20蚊,所以會唔會10蚊?我答你唔到。我目標唔係要跌極有限,我目標係要上升最大化,所以先會叫發掘十倍股。所以,石油我真係研究好少,我就唔太有興趣買,所以俾唔到建議,大家買油前,都應該諗一諗。

最後係貼返其中一張參考俾大家
我D數唔係老作,真係bloomberg cap出黎,但太多廢事貼哂出黎。


2020年4月3日 星期五

1833平安好醫生 2019業績


平安保險我一直都係睇好,因為一比較中人壽,就高下立見...
平安旗下有好多公司,準備上市又或者已經上市,當中平安好醫生,
應該係平安旗下第一隻上既子公司

最近股價好強....所以睇下佢份業績了解下公司近況....未買....

講下歷史先,平安好醫生2018年5月4日上市, 上市價$54.8,集左87.7億HKD
之後反覆向下,2019年1月3日最低收市價24.7...比上市價跌超過一半....
見底後又反覆向上爬升...2個月後,3月8前後,上返51蚊...比最低價升幅超過1倍....
之後又再潛水...4個月後,7月18前後落返30蚊左右...之後再升,基本上無咩跌過...
咁公司咁強勢,一定同2019年8月出中期業績有關,咁上個月出埋全年業績都繼續強勢
當中一定有原因,咁就由業績入手去睇....

https://www1.hkexnews.hk/listedco/listconews/sehk/2020/0211/2020021100410_c.pdf



公司業務分類有幾個項目,逐一講下:
1.在線醫療,公司介紹係「主要通過自主研發的AI輔助診療系統協助我們的自有醫療團隊,為用戶提供涵蓋7x24在線諮詢、轉診、掛號、 在線購藥及1小時送藥等醫療服務,並以自有醫療團隊為核心提供多元化的一站式會員服務類產品。」

其實呢個應該係最吸引果一部份,網上睇醫生,送埋藥俾你,病到行唔到出街睇醫生,都唔洗怕。其實有D病真係睇一睇就開到藥,其實有得做,不過收入就唔算高,對於一間現時868億市值既公司,呢個業務收入得8.6億人仔收入,毛利得3.8億,可能未來幾年增長會好勁。呢樣要再花多時間睇下佢發展策略,要擴大其實唔難。只要擴大醫生團隊,加強教育令人接受到網上睇醫生,咁可以發展得好快好大。

2.消費型醫療,公司介紹係「為個人及企業客戶提供涵蓋體檢、醫美、口腔及基因檢測等標準化健康服務。基於 用戶的檢查結果和電子健康檔案,我們還為用戶提供檢查報告解讀、線下複檢等增值服務,從而幫助用戶提升健康 水平。」,即係現時保險公司都會有做既野,不過保險公司可能轉介俾其他公司做(不過應該有佣分,間公司佢有股權?,無深究)

呢一個業務都係根據返佢D客數量,同埋中產消費升級,多左人做體檢、醫美、口腔及基因檢測之類既野。因為呢類都唔係咩新野,都係靠平安D客,即係應該唔會中人壽D客會走左去用平安呢個,因為中人壽果D agent應該都會refer返公司果d,上面個在線醫療就有可能會有其他公司既客用。因為..好似其他公司都未有做呢個(遲下再搵資料修正)

3.健康商城,公司介紹係「在線為用戶提供覆蓋中西藥品(非處方藥)、營養保健、醫療器 械、母嬰育兒及運動健身等眾多品類的商品。」網上賣藥,無咩特別,只係嵌左係佢個APP/網入面,咁D人順手買埋。毛利率唔高,亦都難有咩大增長,企業果部份今年增得唔錯,但唔係重點,因為佔公司整體毛利很低。


總體毛利只升28.5%,因為升得比較勁果D業務佔公司比例較低,推得唔高,所以點解我話唔洗睇佔比比較少既健康商城企業分部。問題黎喇,整體毛利先得11.7億。仲有開支未計....


銷售及營銷費用-2.6%,12億,公司唔燒錢宣傳...但收入增長到.....
管理費用+8.1%,10億....

22億左右,開支比較穩定,唔會隨收入增加而大幅增加.....

未計其他形式收入同埋稅,暫時虧損10億,

大行睇2022年公司先有機會賺錢,大約3.8億人仔......

咁股價升什麼呢? 
從業績上真係搵唔到原因...
或者...睇下坊間消息可能會搵到...
暫時呢個價位同埋呢個盈利水平,唔吸引







2020年3月31日 星期二

小米1810 業績簡評






小米呢間野我真係唔熟...
純睇業績內容去講返D重點
收入增長數字係上面我唔重覆

手機
手機佔集團收入60%,收入增7.3%,全年手機銷量增4.97%,Q4手機銷量增長30.5%,但Q4收入只增22.8%,Q4增長主要來自低價手機(應該係紅米)。

手機平均售價增2.2%,由959.1元增至979.9元。毛利率由6.2%增至7.2%,售價升2.2%,毛利率升1個百分點,成本升幅少於售價升幅,係好事。維持到可以持續提高毛利率。

手機值得憧憬既地方只有平均售價上升速度高於成本,改善毛利率,銷量升到就更好。但手機市場競爭越黎越大,全球手機銷量都放緩基本上無咩增長,銷量比較難有雙位數增長。蘋果一樣面對相同問題。銷量升唔到就只能靠加價/賣多D高價手機,但小米比較難做到,Android競爭太大。所以手機唔係小米增長主要動力。

IoT與生活消費產品
呢個增長比較強,增41.7%,但公司只提供智能電視數據,電視增長快既,小米電視2019年銷量同比增51.9%,係幾意外,但佢無拆電視收入,佢只講電視+手提電腦就增33%至242億。小米電視俾我印象係比大牌子差D,但估唔到佢2019年成為全中國銷量第一,全球第五,印度第一。電視其實唔太好做,毛利率?無提供,但呢個分類業務整體毛利率高於手機7.2%既毛利率,有11.2%。

互聯網服務
主要係廣告收入,Q4係30億,佔Q4 57億入面超過1半,同比增17.8%,睇黎係唯一靠MIUI平台賺錢既主要途徑。遊戲收入Q4得8.7億,比較少。廣告應該無咩成本,所以毛利率極高,毛利佔公司整體毛利44.8%。

但廣告收入不穩定,遊戲收入都係不穩定,個平台要打得夠大先有穩定收入,公司能夠有比做硬件公司更高市盈率,應該都係呢個分類業務拉高左,始終軟件/服務類既野增長比較易推,唔同手機好難再推增長,電視同其他硬件都難推而且毛利率低。呢個業務要多d關注,但業績入面資料比較少,要再搵先可以講多d。

海外收入912億,佔2058億既44%。證明公司海外發展唔錯,特別係印度市場。

毛利

毛利增28.7%,286億,手機只係88億,iot就70億,互聯網服務就128億。互聯網服務收入最少但賺既錢最多。

銷售推廣開支增29.8%,行政開支增40.9%,研發開支增29.7%,80+33+58億=171億 未計其他開支前利潤:286-171=115億....同公司計既經調整淨利潤差唔多(115.3億),即係其他收入+開支(包括稅)=打和

基本上重點都講哂,公司現價相對於市盈率20倍,我覺得只係fair,無特別平/貴。前景要再研究下,暫時我對呢間公司興趣仍然不大。

2020年3月29日 星期日

疫情下投資取態

疫情發展越黎越惡劣,歐美確診個案快速上升,各國政府都加強限制人既活動,減少接觸,對經濟影響是前所未見。對多個行業影響都好大,而且就算行業無被直接影響,間接影響都是很明顯。舉個例子,有間藥廠最近發第一季盈警,原因係相醫療服務受疫情終止。疫情影響有時係會在一些你估唔到既地方出現,例如,誰又會估到疫情令中國三大電訊商客戶數目減少超過1000萬戶呢?

由於疫情何時完結,政府措施何時緩解仍難以預料,在此之前,投資取態應保守偏淡,原因如下:

公司收入=資金+貨物/服務流動,而資金同貨物/服務流動關鍵都係人,有幾多人接觸到你既服務/貨物,公司既市場就有幾大。而家人既流動受限制,基本上大部份既資金+貨物/服務流動都會受限。收入受限,自然利潤都受限,利潤難以有增長,咁股價增長既能力當然受限制。

而且,呢個問題唔係靠印銀紙就可以解決,你有好多錢係咪就可以令到好多人多左出街消費?部份國家政府近期都禁部份商店營業。QE幫到D咩?只係將公司債務負擔降低,幫既既資產負債表上+利潤表上利息開支(減息),但幫唔到利潤上既收入/利潤,根本問題都解決唔到。點解之前金融危機可以?因為QE令借貸成本下降,資產價格上升,公司樂意投資,人更願消費,公司收入增加。

最近,美國初領失業救濟人數急升,只是剛剛開始,持續時間都係要睇政府限制措施幾時完。部份人開始失業,影響就係Demand,無收入就會削弱消費力。失業率上升是必然會發生,印銀紙派錢可以舒緩部份影響,但長久都是難以阻止消費下降趨勢。

而家比較樂觀既係,雖然實體店被限制,但網上商店限制較低,當然唔係所有野可以網上買,貴重物品(金或珠寶,應該好少人會靠物流運送吧)/大型物品(車?)。日常用/多數物品仍然可以網上購買,仍然有一線生存空間。當然服務業就比較難,至少暫時仲未可以網上剪髮,所以最近美國服務業PMI大幅下降。呢d就係網上商店既限制,但總比以前無網店既時候,多一個消費途徑。如果無網店,實體店又被封/人流大幅減少,經濟損害更大。

投資取態是保留現金或買跌對沖下跌風險。假設未來疫情退卻,社會回復正常,公司收入盈利回復正常,股價就會回升,但疫情仍然擴散,市場對股票價值判斷只會越來越低,當然對於投資者來說,是機會,賺的是現時市場對公司價值判斷與未來公司回復正常時價值的差距。市場仍然悲觀情況下,大量持有股票不是最佳策略,所以,等待,等待市場出現極不合理價格,例如公司破產機會極低但股價遠低於公司賬面價值(非會計上,自行計既賬面價值)。這些機會就要靠大家發掘一下。不過現時港或美股大幅下跌既股票不多,市場仍然很理性,要賺不理性既機會仍未出現。

現時我既策略會係,每日去搵跌幅超過一半既公司,最好係高位打2折/3折,100蚊跌到20-30蚊既股票,雖然呢堆公司可能99%都係無機會翻身既垃圾公司,但總有1-2%有機會翻身,係極難搵得中,但中左回報就會好豐厚,起碼幾倍升幅。搵到呢類大幅下跌又有翻身機會既公司,可以先放入監察列表,等待見底回升時買入。

係呢個環境搵倍升股只有這個方法。可能有其他方法,但跌幅唔夠大既公司,可以再升既升幅未必夠大,或者咁講,係唔夠跌幅大既公司升幅大,因為Recover既升幅係可以好誇張。

最後,我想講,係咁既環境下,唔好諗短炒賺到咩錢,當然如果你失業,又有時間,又真係無錢開飯,想靠股市賺點錢生活,股市買跌都或可以賺到點錢生活(不要投入太多資金),但市場比較波動,賺不到錢要倒蝕的話,就盡早離場,不要持續買賣。或者,學點新技能,開拓新的收入,可能比炒股更值得投資,投資在自己身上,總會有回報,香港人要加油!艱難日子總會有完結的一天。

2020年3月23日 星期一

疫情發展下去對公司及經營環境的影響

諗返起1月,有人覺得,疫情只係影響旅遊業,一個佔香港GDP 只有4.5%既行業,有乜好擔心? 唔知佢而家仲係咪唔擔心呢?

講下而家疫情發展....
因為避免人與人接觸,控制疫情,所以歐洲果邊,部份國家,禁食肆堂食,或者餐廳全關唔俾開門,麥當勞都關閉左英國所有分店(暫時),另外除左藥房/賣日用品既鋪,其他零售鋪都要關門,對零售同餐飲衝擊最大,而且市民限制活動下,其實好多行業都會受影響,個影響係連收入都無....

係以前d經濟差既環境,收入只是慢慢減少,然後公司調整經營策略,例如減少開支,因為收入一跌你可以做既就只有cut開支,開源都好難有人幫你買,因為失業率升,d人無收入,無錢買野....但而家情況係有別於之前.... 係完全無生意既情況,係比經濟差經營更艱難, 之前可能每月收入減少5%-10%,但而家係一個月暴跌50%-70%, 而且係持續唔知幾多個月, 係咁既情況下,d人可以做既都係cut開支,但有個兩難,疫情如果退得快,好快轉好,你如果炒哂大部份人,你到時好難請得返夠人,d人可能轉左行,如果唔炒人,疫情拖多一段時間,你就會係咁燒錢,當然可以逼員工放no pay leave,但仲有固定開支,未必咁易cut到,至少租金呢d無得cut, 餐飲零售都算係輕資產,可以捱得耐d,cut人唔開門,只係交租, 但有d重資產既就頭痛....但就算可以捱,都未必捱到好耐,錢一日都會燒完,捱唔到就會結業同壞賬潮出現, 會出現失業率急升,銀行收水(其實已經開始收緊)...之前經濟差都有得救,今次係咪都係有得救?

咁就要睇下今次同之前危機有幾個分別,之前1997,2000,2008,2011呢幾個危機都係某d地區影響大,1997影響亞洲,其實美國影響好細,睇返美國股市當時無咩跌,2000年科網爆,美國影響大,中國(未掘起),歐洲都係跌,應該環球gdp都受影響,2008年美國雷曼都係影響全球,2011年歐債危機,影響歐洲為主
1.地域性, 除左美國出事會影響全球之外,亞洲,歐洲都影響好細,歐洲出事,亞洲有錢入去買貨,吉利就買起左volvo, 一個地方有事,其他地方d買家有錢幫你,救你,但今次,全球都有事,特別係發達國家, 如果發達國家企業出事, 邊個救? 搵發展中國家救? 自救? 所以一出事今次係比較難有錢救到 

2. 非金融危機, 之前除左科網爆,其他都係金融危機, 金融危機用金融手段可以解決, 亞洲金融風暴,唔記得點解決了,科網經歷幾年recover, 2008同2011都係靠QE印錢去解決左, 但今次唔係金融危機,印錢都救唔到d公司,政府印錢,借錢,俾d公司捱過疫情,借錢俾佢地燒錢,保住資金流動,唔俾佢地大量同時間地破產或違約,但如果疫情長期限制人既流動同消費,始終有一日再借就無能力還,爆起上黎爆得仲勁...短期可以靠借錢渡日等疫情完,但長期是不能靠金融手段可以解決

舉個好簡單既例子,而家有個家庭,兩個人工作其中一個人失業,家庭收入減少50%, 就好似部份行業公司咁,收入突然減少, 你係佢朋友,你好有錢,無限量借錢俾佢過日子, 短期可係可以幫到佢, 但如果佢長期都未搵到工作, 賺唔到錢還俾你,你無限量借錢俾佢,最後都係變左壞賬...銀行唔係你朋友,係唔會無限量借錢俾你,如果政府帶頭借,更會衍生好多問題...

輕資產公司就係咁,另外,講下重債公司既然問,重債公司其實好危,重債/重資產既公司,本身就係借錢返黎買資產,賺資產回報與借貸利息成本差額, 即係買樣野1000蚊買返黎,果樣野1年賺100蚊,問銀行/其他人/機構借900蚊每年還50蚊,自己賺50蚊,本身盤生意/資產賺返黎既錢還本金還息,而家收入跌,好彩既話仲賺到10蚊還住利息先,如果唔好彩要蝕錢,就無錢還債,銀行追你數,要你還錢就要變賣資產還錢,但而家賣資產都唔知有冇人接,個價一定係殘價,呢個想法唔係無根據,最近SOFTBANK就因為資金流問題要變賣手上資產包括股票(阿里巴巴/UBER)...之前地區性危機都可以搵其他國家人接手, 但而家全球都唔掂, 有實力買既人極少,而且有D資產邊個敢買,例如飛機,買左無得飛,邊個會而家買? 郵輪都一樣...賤價賣,拎返D錢又唔夠還俾銀行,可以點? 變壞賬,銀行承擔,變成系統風險

而家會唔會引發以上風險既因素,取決於時間,疫情快完,市面快回復原狀就咩事都無~ 但如果疫情持續,長時間影響零售,旅遊,航空,餐飲等行業,以上情況就會出現,而且影響廣泛

所以而家唔好亂入市,唔好重貨,你拎少少錢即市入搏即日彈即走都OK,但疫情越後期,以上影響會越大....風險越高....

對於疫情長短我個人睇法係,如果中國數據係可靠,咁疫情應該唔會長,但歐美果邊情況比中國好似更差, 唔知會發展成點, 其實個病又唔係真係咁恐怖 只係各國措施影響到經營困難, 數字上去講,如果全部人染病,死亡率2-3% 對經濟影響都有限,但如果封哂所有野,健康既人都唔可以進行經濟活動,影響就好大~可以等於20-30%消失左

當然,無人想全世界突然有咁多人死亡,但人總要面對現實~ 係經濟困難同埋人命上取捨,不過呢D係各國政府做既野,我地可以做既,只能保護好自己,唔好染病,唔好令自己變成帶病毒人士,傳俾其他人,害埋其他人,盡量留係屋企

最理想情況一定係疫情突然消退,但現階段難出現.......所以係疫情消退之前,不要有任何希望,盡量不要持貨...等待疫情完結

2020年3月14日 星期六

2020年初至今股票跌幅統計 (港股)


因為我現時手頭上得港股數據,未有美股數據(星期一再撈下) 咁先講港股 2020年初至今股票跌幅統計...
計算方法係今年最高收市價至今年最低收市價既最大跌幅,可能係3月12日最低,可能係13日,可能唔係呢兩日,總之係今年最高收市價之後最低收市價果日個價去計
https://docs.google.com/spreadsheets/d/1-hdAHbiAAjqPCaILQurcouyYMK-qo_L2ZRgwDqwiYA8/edit?usp=sharing 因為只計日均成交額多於50萬既股票 所以只有1215隻股票做統計

跌多過一半/跌左一半既股票有56隻
跌左40-49.9%既股票有61隻
跌左30-39.9%既股票有159隻
跌左20-29.9%既股票有429隻
跌左10-19.9%既股票有405隻
跌左不足10%既股票有141隻

恆指就跌左17.2%...
如果用盈富基金做標準就係跌16.6%...
跌得多過盈富基金既有863隻,
跑贏盈富既得387隻
如果單買一隻股票同盈富比較
69%跑輸恆指

而家呢個大跌市情況下,
如果又未有股票,我就講下幾種選股策略
1.買殘股搏反彈,
2.買跑贏大市既股搏繼續跑贏

1.買殘股搏反彈都有分2種

1.1買跌得多既搏佢反彈果下,例如跌幅超過30%果d入面揀,短線搏10-20%反彈

1.2買因為受疫情影響跌到好殘果d,等業績復甦就有機會升得好勁...

2.買跑贏大市果堆,有387間公司,可以從行業入手, 之前熱炒過既物管/互聯網/醫療藥物/教育/食品飲品/基建/公用/5g等......

自己係入面慢慢揀....
因為每個人投資風格都唔同,
而且大家識既公司又唔同...
我就唔會推number俾大家

希望個list同埋以上介紹既方法幫到大家揀股
係大跌既時候撈到好野,賺到錢,
渡過困難時期....
香港人加油...

如果都係揀唔到股,留言討論


2020年2月27日 星期四

談一談S&P500指數歷史及現狀










1974年10月S&P 500低位係63左右...
1987年8月高位337左右...
13年升幅435%...
1987年10月19日黑色星期一..
單日跌20%到225 距離高位跌33%(即係1/3)......
不過之後就繼續升.....
2年後仲升穿埋337呢個歷史高位創新高








2009年3月大約670左右...
2020年2月19最高...3390左右
11年升幅405% 之後會跌幾多先見底?
唔知啦~


但可以計到d支持位
3390做高位計
跌10%=3051
跌20%=2712
跌30%=2373

2712=大約係2019年6月低位
2373=大約係2018年年底低位

現價2979點,大約係21倍市盈率
2712=19倍市盈率
2373=16.7倍市盈率
過去10年平均值19.44

總之,跌市,有現金就最開心
價值投資者就更開心...
你準備好要買咩未?
要買未來10年高增長既公司/行業...


2020年2月10日 星期一

1137 香港電視業務結構分析

1137香港電視近期熱炒,炒到上天花板
市值更超越TVB 511...
但近期太熱了,回調是少不免
自從10月提及過之後已經升左一倍有多
公司訂單增長係好強,但公司一直虧損
大家最關心問題係,公司幾時賺錢?

咁就要了解下公司盤數,同埋佢點賺錢~
公司主要業務,好簡單~網上賣野......
但分兩部份
i)自營,自己買貨返黎賣
ii)第三者經營,幫人地賣貨
平時會見到公司公佈果個總商品交易額就係由呢兩個數組成,無論賣自己既貨定賣人地既貨,賣左幾多錢貨,就係呢粒...
2019年果粒1月9日公佈左係27.8億,今年1月個數就係3.38億,2020年全年目標係33.8億(按年增21.6%)
但呢個數唔係公司真係賺返黎既錢,仲要扣除成本,首先扣左自營果d存貨成本,另外幫人賣果D,只能計佣金收入,之後再扣運輸開支,人工(後勤+運輸人員),租金,宣傳,雜費等...剩返落黎先係利潤。簡單D講,即係賣左100蚊貨,扣左80蚊買貨返黎成本,就係自己袋20蚊用黎出糧交租等開支...有剩先係利潤...

由收益表開始講

1.收入
公司收入由幾個部份組成~
i)自己買貨返黎賣...例如大街市果d,應該係佢自營(見佢賣口罩都用大街市),呢部份係收益表入面叫做「直接商品銷售」...但要扣左買貨返黎個成本,先係真係收入,表入面叫做
直接銷售毛利...
ii)特許銷售收入,即係其他公司係佢個網開個店賣野,而賣左既貨,要分返佣俾HKTV,大約係貨品售價既18%, 即係例如有間電器商賣左1000蚊既焗爐,HKTV收返180蚊。無存貨成本要扣
iii)節目版權廣告,即係之前拍左果D劇...放上網播收左果D廣告錢(可以不理)

上面講過,營運收入先係重點,直接商品銷售唔算收入,扣左存貨成本先算真係收返黎既錢,中間橙色營運收入就係包左上面三項,真正可能用黎俾開支既收入...OK?

而公司開支係乜?
係收益表入面有4項
i)人才成本,無論係前線定後勤包哂...
ii)其他,應該係油錢,網上平台既開支(軟硬件)...
iii)廣告開支
iv)租金

公司分析入面有分開4項,我主要講公司分析呢4個
i)配送成本,好簡單,即係物流成本,包括人/車/油/倉...越多訂單,個配送成本越高,但規模越大,單位成本越細。佔營運收入比越黎越少....
ii)市場推廣及O2O門市營運開支,包括廣告同門市租金,相關員工開支...呢個基本可控,暫時KEEP住佔營運收入30%左右
iii)電子商貿營運及後勤支援成本,都係人既成本,SERVER/IT,軟硬件相關開支,比較穩定,唔會點大增長,佔收入比跌得比較快
iv)非現金項目.折舊攤銷果D,通常不理

直接比較收入同開支
2017年,營運收入只有1.9億HKD
但人才成本已經2.6億...賺埋都未夠出糧俾人
如果睇配送成本,賣一件都未夠俾送貨成本...
2018年,好D,
營運收入有3.57億,夠出糧俾人,夠俾配送成本,但未夠俾其他開支,所以都係要蝕
2019年上半年,繼續改善,但都未夠俾配送成本同埋電子商貿開支
2019年全年,我預計,就算增長較高,但應該都係仍然虧損...
2020年,我估計頗大機會仍然蝕錢
2021年都應該可能仲要蝕或賺少少

公司問題係邊度?
配送成本太高...2019年,估計5.6億收入入面,有4億係配送成本,而電貿及支援成本估計要2.36億,呢兩個加埋已經高過收入...肯定要蝕錢

2020年,用公司目標商品交易額計,會有約7億幾營運收入,5億左右既配送成本(可能更低),扣埋2億幾電貿加支援可能有機會平手,但未夠俾大約1億宣傳同埋門市開支...所以都一定要虧損.....

2021年或者有機會賺,要再睇公司點樣壓縮成本開支...公司有開始同D鋪頭合作攪自提點,成效應該仍然不大。

其實要做大個規模,做大個物流系統,降低平均物流成本,先有機會賺大錢。物流強先可以應付到訂單,訂單多但物流人手唔夠,都會限制左收入。另外係公司電商平台系統,要更有效率幫客買到貨,賺第三方廣告錢,開拓更多收入來源,對改善利潤都會有幫助。

口罩機?
呢個投資少,初期應該難賺,就算賺都唔會賺好多,我估佢買返黎都唔係為左賺錢,純粹承擔一下社會責任,幫助香港人,對集團利潤影響不大,可以不理。

估值問題
公司2020年營運收入都係得7億,但而家市值50億,公司未來幾年利潤率都唔會高,而家真係反映左未來5年既估值,所以隨時見頂係正常。我10月時推市值約23億,當時只係估計可以炒高D,無諗過一倍咁誇張,當然當時未有疫情呢個因素,仲有好多因素推高,但而家明顯超過合理估值。

合理價?
未來2年仍然會虧損既公司,好難定合理價,而家都係炒作因素較多,估計呢D因素過後,公司會回落,有特別消息先會再炒起,波動上落而未會有長期上升趨勢。

個人意見
今次炒升浪應該告一段落,之後都係得波幅無升幅,唔會再建議繼續持有,上次建議買,都係因為見佢股價弱+似見底+有推升因素,而家升左一倍,反映哂,可以暫時收工

2020年1月31日 星期五

全球口罩供需分析


日本人口:1.27億,
2015年每日產265萬個口罩,
每日銷售1340萬個口罩
按估計,2019年,日本日銷1447萬個口罩,
產量未有最新數據,
假設增加一倍至日產530萬個
每日產量可供4.17%人口使用

中國人口:14億,
現時每日日產口罩2000萬個,多數出口...
不出口,每日可供國內1.4%人口使用

台灣人口:2378萬,
日產口罩188萬個,可推升至日產390萬個,
未推升前,可供7.9%人口使用,
推升後可供國內16.4%人口使用

香港人口:752萬,2
4小時生產,日產量 6萬個,
可供0.8%人口使用,
2018年註冊+登記護士人數56723人,醫生14,651人...

最近信報有篇口罩經濟學既文...指出全球口罩每日生產量係2500萬... 大家可以睇呢篇先,入面講左好多資料,我唔再補充
https://hk.news.yahoo.com/%E6%96%B0%E8%81%9E%E9%BB%9E%E8%A9%95-%E5%8F%A3%E7%BD%A9%E7%9F%AD%E7%BC%BA%E7%B6%93%E6%BF%9F%E5%AD%B8-201300752.html

幾個重點
1.全球口罩肯定供不應求,因為口罩呢樣野本身用量比較低,除左流感爆,霧霾,花粉季節,需求會大既時候,平時每日都會用口罩既只有醫護人員/工廠/部份需要防塵地盤或工程人員...突然全部人口,無論嬰兒到老人,要外出都要口罩既話,需求量突然增加幾十倍,一定唔夠

2.就算而家急建生產線,上游原料供應都係一大難題,要成條供應鏈都一齊增加,要花時間,問題係疫情可能只係維持幾個月會消減,呢個投資,邊個去做,只有政府,而且最有可能做既係中國政府

3.呢個投資,一定係蝕錢,對比經濟上損失黎計,呢個數真係極低,但問題需要時間,而家疫情擴散中,遠水未必救到近火,但明顯一定要做,睇下政府做唔做,其他國家政府未必會理,但我諗各國政府都應該認真考慮國內口罩生產量

4.糧食供應仍然正常,除非大規模爆發,或者到左7-8月都未見有減退跡象,會影響農業運作,暫時大家唔需要搶糧食住,農業已經多數機械化同自動化,極少人耕種都可以有糧食產出,個人就唔太擔心供應量會突然大減

大家搵到口罩買就盡量儲備捱到7-8月既用量,
有多就分D俾有需要既人...
亦都可以預期,未來幾個月,香港人會盡量減少外出
零售業,餐飲業會經歷超級寒冬...
加上旅客繼續減少,旅遊酒店業會冰封...
經濟會進一步轉差,留多個錢,保住份工,最緊要...

有危亦有機,至於機會,等真正機會出現先再講...
而家首要做好準備...應付危險...
遲下再同大家講下有咩機會....


===============================
以下是參考資料
2015年日本數據,家庭用口罩市場規模265億日元,36.9億個口罩,平均一個口罩7日元(現時匯率計約0.5港元一個/0.44人民幣一個)... 2015年日本國內年產9.68億個(日產265萬個),進口39.25億個(日進口1073萬個)
日本口罩主要公司及市場規模
https://info.taiwantrade.com/biznews/%E5%AE%B6%E5%BA%AD%E7%94%A8%E5%8F%A3%E7%BD%A9%E5%B8%82%E5%A0%B4-1127882.html

2019年預計市場規模係370億日元(包括醫療及工業用口罩),假設價格變化不大,年銷售52.8億個口罩,日銷1447萬個口罩...
http://japan.people.com.cn/BIG5/n1/2019/0829/c35421-31324580.html

中國工信部最近表示產量達到一天800萬隻以上,復工復產面達到了40%,按此推算全中國口罩日產量2000萬個
http://finance.eastmoney.com/a/202001291368397880.html

2014年中國口罩日產量1000萬個 中國口罩市場規模及主要品牌 http://www.xincailiao.com/news/news_detail.aspx?id=793

台灣口罩日產量188萬,力谷可以達到390萬
https://www.epochtimes.com/b5/20/1/29/n11829247.htm