無意中睇返之前2012年9月16日寫低係電腦記事簿既字
見到呢個LIST,已經唔記得當初點解會將呢D公司放入個LIST
應該係2012年中期業績好好既公司~
當時係齋睇業績數字,同埋P/E估值,對果行認識好少~
甚至連點樣去分析/預測未來前景都唔係好識~
其實PE真係唔係一個重要既考慮因素,PE識升先係一個重要因素
另外公司競爭力,行業變化都係重點~
曾經10倍股既QQ,2012年50蚊,4年後升左4倍200蚊,曾經十倍唔代表唔會再升~
當時既準則用於現時都準確,十倍股準則係根據700既體質定出黎~
700每股盈利增長高,無咩長債,基本上錢都借得少,淨現金好多,因為係3.現金流強勁
產品價格不高其實係指產品大眾化,購買人數可以好多,咁購買人數變化就會好少
2020安踏都係呢類,所以2020KEEP住升~但1年後升幅只有1倍,係到而家先4年先升左5倍比較慢
336華寶國際,盤數靚但假?唔計假數懷疑,本身中國政府打擊煙草業都有影響
703佳景集團,都由1蚊升過上5蚊,要1年多時間,但呢隻市值低,市場細,賭業一死跟住一齊死,
管理層投資錯誤導致股價走哂樣
623中視金橋,只係升過1倍,之後因為傳統廣告已死,俾網絡廣告搶唔少生意,仲要奢侈品唔掂,死多2次
296英皇酒店,係因為見到賭股入面估值最低係佢,升左4倍幾,其實27銀娛都升左4倍,金沙升左1倍幾
2333長城汽車升左1倍幾,696升左接近1倍,1070都係升左1倍
2010瑞年同埋389通天酒就中左伏,中國既零售商真係好多伏
係香港上市,做消費零售,都係好唔穩定
賣酒既唔講通天呢D細民企,大如青島啤,都只能風光一時,168由2013年尾6X蚊一直潛到而家27.8
賣奶/奶粉既都經歷過唔少大波動周期,無邊間係平穩向上.....有D細民企仲死埋,例如大慶乳業
賣衫,如體育用品,又係經歷過乳業股果類周期,有D
賣家電既,又係大上大落周期,921科龍,1169海爾都經歷過
賣料酒既老恆和又係一直做唔起
賣即食麵飲料既統一康師傅又係近期弱弱不起,兩間鬥完即食麵就完氣大傷咁
賣內衣既都市麗人,近期都瓜左,之前又係好勁,安莉芳就一直做唔起股價
賣車係比較好少少既行業,因為有合資廠,中國未有自主品牌,競爭唔算勁,但近期自主品牌開始銷量大增,應該會經歷一輪牛市再經歷一輪產能過剩.....
點解會有呢個現象,我估係因為
1.呢D產品入場門檻都低,唔難製造,當你行業需求一增,一好賺,就會開始有人入場爭生意
2.本來做緊代工既廠,海外訂單少左,D機器係度,D人係度,唔做代工轉做自己品牌參與競爭,可能係其中一個因素,唔需要投入D咩,即刻同你爭
3.網購令更多小型企業更易參與競爭,亦都係近1-2年網購流行增大,傳統零售大企衰弱既原因之一
4.需求唔會長期高增長,飲酒唔會下年飲多1倍之後,持續每年增長1倍,之前可能只係市場擴大,由城市飲多左到農村開始飲多左,到農村都飽和埋,再無增長空間
今年都唔覺有咩零售企業業績係特別好,入場門檻高既股未來仍然有優勢
2016投資仍然會參考以上幾個準則,盈利有增長,現金流強,借貸少既公司,另外收入增長都好重要,最重要市場需求持續增加既行業
沒有留言:
張貼留言