2014中期業績簡評

https://docs.google.com/spreadsheets/d/1vACPODxaljzTEbwCqcS9DMxnB3NCGY8tGuBUJhLa4EA/edit?usp=sharing

看著這個LIST,應該如何入手? 

盈利增長反映今年公司盈利比上年同期多,但是不是就能推動股價上升? 不一定,我們投資是要找出明年盈利比今年增長更多,然後現在買入並等待,歷史數據是提供線索尋找未來仍然增長的公司

當然找未來增長強勁公司有很多方法,有人從行業入手發掘未來增長強勁行業,有人從宏觀經濟分析未來受經濟推動增長的行業,亦有人從政策取向分析未來政府想推動的行業,但我比較懶,我喜歡從資料庫篩選有可能強勁增長的行業,因為CLICK幾下就攪掂

我也不是所有公司都認識,通常有時間我會每間公司業績快速看一次,看看有沒有增長亮點,或靠自己工作上的經驗增加認識的公司,暫時有些我仍未涉獵到,我盡量簡單說一下自己認識的公司過去與前景

8002 IGG, 過去一年多是手遊爆發期,原因是智能手機價格下降,普及性提高,過去一年多亦是內地智能手機銷增長爆發期,具體數據忘記了,8002盈利大增原因是他上年下半年出了一隻GAME,在全世界十分受歡迎,雖然遊戲玩法與某熱門遊戲極為相似,但IGG的GAME亦有很多人喜歡,如同神魔之塔,所以今年上半比上年同期好,但問題是,未來能否有遊戲繼續支持公司盈利增長是一大問號,雖然公司公佈業績後股價大升,但至今已打回原形,市場對其信心仍然不足,仍在等待它出一款新遊戲,要投資此股,要留意公司遊戲受歡迎程度,有新遊戲1歡迎才值得入市

1117現代牧業,奶股我曾研究過,但內地農業股是比較複雜的行業,通常會計數據真確性令人懷疑,奶股是比較少假數的行業,公司收入大增主要是奶價上升,公司產量增長,產銷比率增加,因此推動盈利增加,但公司奶牛增長比預期慢,產銷比率已由70%提高至90%水平,每頭牛產奶量上升空間不多,而奶價亦有下行壓力,未來一年要保持高增長是有挑戰,要看看公司有沒有擴張計劃,暫時未曾了解到

1788國泰君安國際,中資證券行來港發展是近幾年已經陸續增加既事,1788近年業務發展都好強,因為暫時香港中資證券行最大規模係佢,國泰君安國內規模都大,有強勁後台支持及較早來港發展所以做到香港最大,公司盈利增長來源暫時係貸款及融資收入,內地企業於內地融資難,香港是他們出路之一,未來十年中資證券行在香港前景將會唔錯,但集團配股供股頻繁,資金需求大,能否為股東帶來高回報,可能暫時未係最佳投資時間

815中國白銀,本來以為這家是類似紫金/招金的礦業公司,持有銀礦再賣白銀,原來不是,到我認清這家公司的時候,它股價已飛天,但看數據仍具投資價值,公司是買礦渣再煉高純度白銀銀錠,礦渣採購價是以白銀和鉛含量計價,其他金屬成本是0,所以如果其他金屬價格升,亦都會賺多左,公司賺白銀採購時價格與賣出時價格差距,白銀回收率越高,公司越腿得多,白銀價格持續升,公司賺的差價亦會大左,當然跌既話會賺少左,白銀需求亦是主要影響因素,公司盈利增長原因,轉攻高毛利率零售業務是主因,另外附助原因是其他金屬價格升,由於0成本,賺亦賺多了,睇返公司以往業績,都是不錯,但金屬資源不是市場喜愛,估值一直給很低,近期股價大升是多了人認識這家2012年上市的新股價值所致,未來前景仍然不錯,雖然白銀市場在國內不活躍,內地人仍然是較喜歡金,但銀飾市場空間仍然很大,如果公司多著重產品設計,未來前景仍然不錯,因為他從上游至下游都做,產品價格及成本會有較好競爭力,再加上它在國內有一定規模,競爭力仍是不俗,翻查招股書內10大白銀企業,主要是國企,而且白銀不是這些公司主業,多數是做金屬資源,其中有些是白銀,集中做白銀的,這家公司是當中小數的民企公司,頗值得深入研究

940動物保健,這家公司較少留意,本來賺不到錢的,但近年突然好賺了很多,不知是收購還是新藥,估值與人類藥股差不多,動物藥其實市場與故事性都很大,有時間再研究,人類藥我還未弄清,動物藥更複雜

3898南車時代,增長主要是動車組收入增,因2013年下半年重新招標,上年上半年動車組收入很低,今年大增,未來都是看內地鐵路投資,與海外訂單,其實中國今年開始多了很多海外訂單,因為中國南車很積極走出去接單,中國政府亦很積極海外搶單,非洲及拉美是主要搶單地點,另外土耳其,中東亦有,所以我十分睇好鐵路設備未來十年前景,現時全球鐵路技術,中國已經可以說是首5位之1,再加上中國製造成本低,與非洲等國家關係密切,而非洲國家掘起,鐵路投資增加,我看不到有任何危機會出現在這個行業,又是逢低吸納最佳行業,但投資期會較長

327百富環球,這個行業其實少睇,但發展很快,做POS生產銷售,唔知POS係乜就自己上GOOGLE搵,我就算講個中文名俾你知你都唔知係乜,呢間做POS好似係全球最大果幾間之一,全球需求近幾年增長得好快,但其實呢樣野好多年已經用緊,或者是中國需求增加左,又或者經濟差左,企業提升營運效率所以買多左,現時公司估值仍然合理,但股價亦都反映左今年增長,未來增長我真的未太了解,或者很有機會會放緩,始終佢既產品唔係成日需要更新,買1次就可能很多年都唔洗再買,競爭情況亦不太了解,但暫時睇D數係好靚

914海螺,其實水泥股我唔記得有冇O係度講過,因為我返工寫過好多次,簡單D講,以前水泥行業產能過剩,因為無管制,2010年谷基建好多細廠走出黎搶食,大廠又上市又集資再谷產能搶單,2010年需求較然大升,之後需求放緩,細廠減價搶單,攪到成個行業競爭大,大廠都賺少好多,水泥間間都一樣,企業間無咩競爭優勢,主要優勢都是價格,誰CHEAP,誰有生意,但近年已經有改變,政府唔俾開咁多生產線,淘汰過剩產能,要D企業拆左D生產線,開始有改善,今年水泥盈利大增,係因為上半年水泥價格同比上升,煤價又低左,毛利率提高左,銷量其實無增好多,因為需求仍然好弱,未來一年需求增長都會只係單位數,但預期新增產能會好低,煤價又唔會大升好多,毛利率應該可以保持,再加上水泥廠唔洗再花太多錢建生產線,資本開支少,可以多返D錢還借貸,財務狀況會改善,利息開支會減少,對盈利增長有幫助

477奧普,這家公司做假天花,做浴室燈(有熱力果隻),其實香港人唔會用得著,北方天氣較凍既地方先有人用,會落得雪出果D地方,公司收入增長係來自電商,及新產品增加,佢假天花多左幾條LINE,有吸甲醛功能,又有船專用防潮技術,多左D特別設計既野,可以去佢網頁睇,公司經營效率亦都改善左,整合左一D分銷商,成本減左,員工少左,但生意多左,呢間野都係比較細,做唔做得大都好難講,始終佢D產品又唔係普及既野,競爭都大,佢已經係做浴室燈龍頭,增長都係跟行業增長,再做得大要靠新產品,城市化對佢有D幫助既,呢間公司不斷改善緊,估值都仲係低,仍然可以考慮,而且多左市場人士留意,近排股價都升得好勁,已經唔係第一水

暫時講住9間咁多,幾十間公司都值得留意,我每間都寫可以寫到出書了,以上好多公司都唔係食第1水,因為出哂業績全世界都知,食都係食第2水,比較需要長時間等待,如果沒有定力及耐性,不建議大家買,想賺快錢,還是炒莊家股,有做大鱷點心既心理準備,世上沒有免費午餐的,以上意見純粹出於個人興趣,不是什麼投資建議,當故仔睇下好了,我寫出來純粹為了整理自己思維,再從中找出合適投資,希望幫到自己都幫到大家,最後一句,如果覺得寫得好,歡迎轉貼分享,這篇文不收錢,所以不賺錢,只希望賺點曝光率,這樣我才有動力繼續寫下去,謝謝