農夫山泉(9633)
招商寫左好多行業既野，我寫D佢無既野
業務
好簡單，係湖同山抽水，跟住過濾再殺菌消毒，入樽，運去各銷售地方賣俾人飲。業務真係無咩好講，始終賣水呢樣唔係得佢有，其他公司都做緊，佢係市佔最大，但佢D對手都唔弱。佢業務模式要複製都唔難，只係品牌難複製。
中國飲料市場
我拎左招商證券張圖黎睇，因為招股書無好長歷史包裝水市場既圖，做個參考。
公司招股書P.63弗若斯特沙利文寫，2014年-2019年包裝水市場年複合增長率11%，預計2019-2024係10.8%，呢個預計我通常只參考，之後都唔會一樣，我認為會低D，我覺得呢版最值得留意係咖啡，2014年-2019年年複合增長率29%，其實好高，所以LK瑞幸同埋Starbucks點解會狂搶市佔就係咁解，功能飲料係第2高增長，呢個都要留意，不過中國市場d公司好似都無上市，但我最好奇係水，竟然排到第3高增長，比果汁、茶增長更高。
之後果頁有軟飲料排名，第1,a公司，美國公司，100%肯定係可口可樂，b公司非上市公司應該係娃哈哈，農夫山泉舊死對頭，C公司台灣成立，應該係康師父。第4就農夫。如果只計包裝農夫排第1，排第2係華潤怡寶(新死對頭)，之後先到娃哈哈及康師傅。其他例如果汁受茶都係康師傅排1／2。雖然康師傅係龍頭但過去幾年收入增長都係持平。
收入
得3年數，近2年增長都係17％，水佔公司收入60%，其他佔40%，2018及19年水收入增16.4%及21.8%，水都係收入增長主要來源，唔係靠其他非水產品。所以睇水得啦唔洗睇其他。
睇水銷量2018+20%，2019+23%，平均售價略跌，價都升唔起要靠量衝，但個量又升得唔錯。但如果價一直跌會拖低毛利率，生產成本未必成日都跌。毛利率一陣再講。
成本
原材料最多，原材料主要為生產瓶身的PET、瓶蓋、標籤、糖及果汁(公司寫既)。個膠樽最貴，3蚊支水，個樽成本係4毫子，不過呢個我之前睇康師傅都知，唔係咩秘密。最神奇係取水及處理成本，極低，做143億包裝水生意，取水同處理成本只係1.35億，3蚊支水呢個成本只係3仙...製造費公司無講係包咩，公司咁計之下成本就係43.9%。
毛利
2018年毛利率略跌，令毛利增長得11％，2019年毛利率回升，毛利增21.9%。呢d差異化低既產品要加價唔易，你諗下出面咁多牌子水，你貴過人少少，銷量都差左。毛利率風險大但近2年波動又唔算好大。
其他開支同最後淨利潤已經唔重要，直接飛去睇現金流吧啦
現金流與現金+債務
呢個應該無乜人講喇，我講多D，公司近3年現金都係差唔多4X億，經營現金流D現金去左邊?
公司最強就係個現金流，2017同2018經營現金流同利潤差不多，2019就經營現金流比利潤多左10億，主要係存貨減少同埋預付款減少各5億左右影響。每年資本開支(買機器設備果D)，過去3年就22,33,33億，咁所以過去3年經營現金流入165億，資本開支88億，自由現金流就有76億左右，跟住公司上市前2019年派左96億俾股東(其實大股東HOLD 8X%，即係主要佢自己拎返哂)，但係近3年多左76億又點有錢派96億，好簡單，問銀行借左22億，所以流動負債無啦啦有22億計息借貸，因為上到市就有錢還，所以無問題。其實大股東都計到好盡下。
其實公司現金流咁勁，都不缺錢啦，公司之前有冇派息俾股東?應該有，但唔知做乜儲3年先一次過拎96億(應該同上市有關，但上市之後h股股東只佔3.47%)，2017及18年都係拎左3億幾咋。
招股價市值相當於...........
上限價就2405億市值，利潤2021年有100億(樂觀地睇)，預測市盈率24倍，消費股黎講合理範圍內，自由現金流可能有60-70億，但會唔會派高息?就算派哂都只係3%左右息率，應該唔會派哂，亦都唔會高息，派咁多息都係落返大股東個袋。呢隻其實好乾下，H股股東持貨市值只有84億元(仲有好多係機構投資者)，市值2400億，有心夾高唔難，公司不缺錢又上市，可能之後想回流A股，港股通又入到，炒到上40-50倍市盈率唔奇，投機機會多過投資機會，如果IPO抽都可以考慮，但未必首日大升，我估上市一個月內大升機會大D。
風險
我覺得最值得講反而係風險，習大大叫大家惜食，全國就惜食，如果有一日，習大大要廢除膠污染，推廣用水機裝水飲，人人帶個水樽出街，商場裝哂收費水機，塑膠樽裝水就肯定玩完。
沒有留言:
張貼留言