見到唐牛講魯大師單野真係幾有趣，我補充少少資料，因為現時網上世界都要靠快，越快出文第一個講就最吸引到人，好多時幾個簡單資料就腦補成件事，漏左好多重要既資料，同事實差距勁大，我補充返大家可能會了解更多，更接近真相(雖然大家對真相都唔太在乎，有花生食就夠)。
首先由股權架構講起，先講講歷史，魯大師係魯錦開發，但2010年魯大師俾奇虎收購左，奇虎就係360(a股601360)母公司，咁好自然大股東係奇虎，咁田先生又係乜水? 田先生係360員工，2014年360將魯大師業務拆做一間公司(成都奇魯)俾左田野管理，2014年成立時，成都奇魯由奇虎科技、奇英科技及田先生分別持有48 .6%、36 .4%及15%。
2019年上市時因為重組，股權架構略有轉變，奇虎持有的股份放左入誠盛，田先生股份放入大師控股，同時間奇虎同田野簽委託協議，授權佢有投票權，所以田野算係間接地持有埋奇虎既股份，本來佢佔22%左右，加上奇虎31%股份，田野控制權就超過50%(53%)，這是上市時的佔比。今次減持係奇虎持有的股份與田野持有的一同減持，所以不只有田野減持，連奇虎都有減持。
除左奇虎同埋田野，第3大股東是嵩遠國際，呢間係上海東方網子公司，上海東方網由上海市國務院國有資產監督管理委員會控制。間接都有少少地方政府背景。
根據年報，2022年底各方持股(總發行2.69億股):
奇虎360(誠盛): 8274.5萬股
田野(大師): 4591.9萬股，因為佢受委託，可控投票權加奇虎持股等於1.2866億股(8274.5萬股+4591.9萬股)
上海東方網:4728.2萬股
其他股東:9305.8萬股
今次減持
奇虎360(誠盛): 8274.5萬股->4840萬股(減少3434.5萬)
田野(大師): 4591.9萬股其實無減少過，因為佢聯埋誠盛計所以都係減少3434.5萬股(4591.9萬股+4840萬股=9431.9萬股)
所以重點係今次大跌，d貨射左俾邊個?
9月20日減持，減左3434.3萬股，最高$1.84，平均$1.23，當日股價最高1.89，最低0.98，成交量4403萬，非大股東成交量968.7萬股。主要成交集中下跌後，即係大股東係跌左先大手沽，但跌左又點會有咁多散戶錢接? 所以我唔覺得係散戶接貨。
出左董事會公告之後第一日9月12成交量359.8萬股(咁岩又係360?)，當日各券商持股變化可以睇返ccass，老虎證券9月6日偷步掃左99.8萬股，但大跌前無乜減持。futu應該有一個主要股東擺左貨係入面，有19%貨，9月12增持53.5萬股，9月13再增持48萬股，之後都主力增持無減持。方正d客戶就2022年11月15開始一直增持無減持過，最怪係dbs，有客戶9月12日掃左67萬股。
9月12-13日之後其實無咩成交，直到大跌果日，因為t+2所以仲未睇到邊個接左大股東既貨。
上圖老虎
上圖futu
上圖方正
上圖dbs
2020魯大師收購左一間小型券商萬隆證券，魯大師(03601)逾1000萬元購萬隆證券 擬開拓線上金融業務，奇虎近年都想攪金融，上年推左3660奇富科技上市(三、六零鉅虧之後，週鴻禕要把360數科推到港股上市)，之後有咩攪作? 就唔知了。
小結
今次主要是奇虎減持，睇大跌前股權變化，再加上大跌當日成交量時間同價格，唔似係散戶接火棒，不過再進一步了解要等埋當日ccass變化。如果要射倉俾人有好多方法，奇怪在要攪過發特別股息既會議然後取消? 除左引起散戶注意之外，真係無咩特別需要要攪到咁肉酸。
