2018年1月20日 星期六

2018年第3周

2018年第3周,恆指升2.68%,收市繼續創歷史新高,全周總成交8700億,繼續爆上...
國指才是今周焦點,升5.7%,

全周成交多於100萬元的股票中,升既有610,跌既有538,無升跌64
升跌比例差距唔明顯,升幅高於2.68%既股票只有350隻
又係以往方式去分行業睇,1蚊以上,升多於2.68%(高於恆指)

今個星期又係內房排第一,有17間,部份內房星期五大爆上
例如龍光,合景,豐盛,奧園...唔知係咪炒大灣區
但見到龍光2018銷售目標係比2017+50%,好強勁
但大型內房例如恆大,融創,都回跌調整,碧桂今個星期有配股因素影響

第二係醫療股,上兩星期既藥股今個星期回調
醫療股勁係因為希瑪+愛康兩隻新股強夾....
現代牙科,聯合醫務,盈健醫療,都有炒起...
藥股都有10隻,排第3既,不過變成1線以下既公司為主例如金活,復旦,石四藥....

第3係券商,其實如果將券商+其他金融夾埋計,應該有第2名
港股成交不斷上,內地股市成交都上緊,本地券商其實上兩星期都升得好
今個星期內地券商都郁,所以多左券商上榜....A股券商都有大爆發

牛市第幾期先會一齊炒券商?不過而家先係第一個星期齊炒,一定唔會得一星期咁短命,只可以肯定到既係,盛宴剛開席....

第4係機械設備,其實講左2星期,無咩補充

第5係內銀,內銀真係異常強勁,連中小型都開始郁,例如民生呢D
其實有D上星期都郁緊,例如中信,但今個星期集體大爆發
主要係A股內銀大爆發,A股工行本周+14%,建行+15%,
至於點解今個星期先郁?未睇

內險,賭股,都多公司升......其實今個星期係集中呢幾樣行業升

之後落黎要睇會升到咩位,準備定離場策略....

港股仍然係理性,未到好非理性階段,可以繼續看好

2018年1月12日 星期五

2018年第2周港股行業升跌分析

2018年第2周,恆指升1.94%...成交高於100萬,升既股737隻,跌既460隻...
https://docs.google.com/spreadsheets/d/18bWgz68t_v2elcL0mgaxVKYQWUz2lIN09zPU1necPZQ/edit?usp=sharing
升多於5%既公司有261間
當中價格高於1蚊既有173間即係有88間係毫子/仙股

今次集中分析成交高於100萬,升幅高於5%,非毫仙股果173間公司, 
上星期升最多公司既行業,如1.內房,2.醫藥,3.券商,4.建材水泥,重機,5.煤,今個星期仍然霸佔top 10之內
今個星期首名係醫藥,其次內房,位置掉轉左
1.醫藥,升幅超過15%既有四間,都係細公司,億勝,李氏,康臣,聯邦
藥股上年升幅其實好勁下,特別係Q4升幅超強,
但市值大既如2196,1177,1093,其實都升左勁多~
2017年,2196+114%,1177+156%,1093+92%,睇返大行預測普遍唔係預期增長加快,所以現時預測pe都係新高
1093同1177都係超過40倍,歷史高位,所以我唔明炒咩
升左咁多又唔熟悉既行業,短期唔會花時間研究

2.內房,今個星期超過10%既有綠城,碧桂,奧園,旭輝
無咩野要update

3.紡織,魏橋+16%,天虹+8%,
今個星期uniqlo出左業績好過預期,唔知有無關係
6288本周升8.4%...

4.支援服務(主要係教育股)+有色金屬+石油設備,
金屬價今周無咩大變化,係鉬價有見過新聞講升,洛鉬+15%石油設備,因為油價繼續爆升....無咩要更新,同上星期睇法一樣

5.機械設備+煤+科技軟件
都係繼續炒重機,三一,龍工,鐵建......
煤股延續上周強勢但動力煤價未見有升
軟件股炒返igg,天鴿......

今個星期行業就係咁,其實好多都係延後返上星期升勢
所以呢d行業升左2星期,可唔可以延續第3個星期,有d懷疑
太強勢總會有一日回跌,三而歇機會高...個人就無渣上面果堆行業股
其實券商股都強,但分類拆開左所以未入5甲....
家電股今個星期都走勢強,1169海爾創過一年新高...
其他行業留返俾大家睇....

上星期寫今年睇好既行業,今個星期普遍表現都強...
除左水泥股係比較弱,入市/持貨,真係要考慮清楚....

2018年1月6日 星期六

2018年首周分析及由此引申2018心水行業前膽

https://docs.google.com/spreadsheets/d/18bWgz68t_v2elcL0mgaxVKYQWUz2lIN09zPU1necPZQ/edit?usp=sharing

2018年第1周,恆指升2.99%...成交高於100萬,升既股838隻,跌既333隻...
升多於5%既公司有340間
當中價格高於1蚊既有238間即係有102間係毫子/仙股

今次集中分析成交高於100萬,升幅高於5%,非毫仙股果238間公司, 
分行業睇,房地產股係今周大贏家...
內房+地產有45間公司,佔18.9%....
升幅最強係3883中國奧園+26.1%,其次1030新城+20.4%,同埋813世茂+19.7%
之後係龍湖,合景,旭輝,花樣年等等都係2-3線既內房股,一線得融創+15.9%
其實內房靜左好耐,以奧園為例9月尾之後一直潛水,12月尾先升返,
1月出左12月數靚仔,所以內房先全線上升,至於12月點解咁好賣,我未睇
但我見既係有機會部份內房上年12月基數低~
而且2018年,銷售增長唔會好似今年咁激烈,一來基數高,二來存貨少好多
以恆大為例佢2018年銷售目標只增10%
所以今年上半年可能仲有炒作,但估計大部份時間都會比較悶

之後排第2既行業係醫藥股,有10間,加埋醫療保健6家,有16間藥股今周升果D好多都係創新高,其實估值越黎越高,唔係好了解原因新藥物名冊今年開始實行所以炒?唔清楚

券商股有9隻,但都唔係最大果D,本地中小型券商為主,
內地股市成交唔大,唔升都合理,但香港成交都好旺,反而無咩點升
不過又真係未來券商前景無咩大既突破,升得少都正常...
除非成交癲,孖展癲,咁先有機會......

之後建材水泥,有7隻,重型機械股都有4間上榜,又係講返之前係GROUP講過既野....內房2017年大清貨收返唔少錢返黎投地,土地出讓金同比已升唔少,投地之後起樓,水泥之前幾年一直去產能但今年水泥需求升但產能無跟升加上內房有錢,銷情好,購買力強,水泥價將會........
周期既野就係一環扣一環,上一個環賺錢就帶落下一環賺錢傳遞落去......今年贏面高

煤有6間...但煤比較煩既係,雖然煤價一直升,但煤需求有好多方面,加上入口影響,比較難睇供需
======分隔線=======
今周市況講完,因為其他都係一個行業幾間,咁唔逐個行業講,講返我自己覺得2018有前景既行業
2018大家都覺得通脹會升返,但係咪一定升又唔係....不過如果以通脹為假設去睇2018年會有前景既行業....

我會睇以下呢D.....
1.石油+石油設備...如果通脹要升,石油一定會係其中一個幾重要既推動因素....
油價其實真係升返好多,而且升得又穩又快,減產仍然進行中,增產就是2018必定出現的事增產要做既就係買設備去鑽油輸送油.....呢個星期已經有人炒緊油氣設備股,2883中海油服本周升12%,857,883罕有地單周升6-8%其實基金已經開始部署緊,將D錢調緊返入去油股......最重要係2017年最弱既股就係油股
追落後+基本面改善(油價回升)兩大因素足以令油股2018年跑贏大市

2.2017年有唔少行業都加價,一來人工成本升,二來原材料價升....
最近內地啤酒業集體漲價,有報導指是十年來首次,連咁多年都無加價既產品都加....
公司解釋都係以上兩個原因,呢兩樣野帶出既係,消費會增加,原料公司收入會增加
所以市場亦都開始炒返2.消費股,下半年中國旺旺,康師傅,統一,青啤,潤啤,恆安等等消費股都被追入
如果而家要買,要睇間公司有幾受惠消費回升,由於公開資料比較少,唔易揀....
家電呢類消費會有數據睇,但飲品食品,日常用品都少,只能睇國統局既數,但太闊,唔夠集中
或者睇返自己/朋友最近既消費去睇,會易睇D

3.接返上面果點,原材料價,多數都有期貨,或者報導,好多人都係跟住黎炒
呢類只能短期炒作,應該無咩散戶勁到可以準確計到某類原材料價中長期走勢
如果準確估到,玩期貨仲好炒過買股票,所以我都唔太建議散戶花太多時間睇原材料
今年會有多D機會炒下,所以提提大家

4.科技股都係2018主流,但2017年既盛宴令到好多公司估值都比之前高,
如果間公司增長低過預期,2018就一定會跑輸大市,要好小心選擇
主要要揀今年可以肯定大增長既公司,例如間公司會有高增長既新產品/業務肯定可以令公司盈利持續高增長,市盈率又未至於不合理
如果搵到間公司今年盈利增長超過20%-50%,預期市盈率只有10-30倍,
都仲可以考慮渣下既
另一樣可以睇下受益於新科技既傳統行業,例如金融,FINTECH今年都有唔少新希望,例如之前中國平安就因為FINTECH炒過幾日

5.航運股,其實油價升係幫佢定害佢,我都唔係好了解雖然之前油價跌都唔覺得幫左佢,但油價升返點幫佢?但近期世界各國製造業PMI都上升,對原材料需求都會升
加上消費回升既話,應該會有助航運需求,但都要再睇D運力變化

6.金融股,加息周期,都令到銀行保險跑贏大市,加上新科技有助銀行降低成本,2017年跑輸大市既內地銀行股都會成為2018年焦點

結論係,暫時我上半年會睇科技公司,石油及相關,建材水泥,金融股.....暫時睇法係咁,如果之後有新事情發生,又或者個行業已經炒到去唔合理既價位,可能再調整以上看法....2018年有機亦都有唔少危,但遲下再講
2018年第一篇長文.預祝大家2018年都大賺~ :)