我同831利亞零售都有D情意結，因為之前工作關係俾老細叫我去研究呢間公司，又有去過佢地業績發佈會兩次聽過管理層講野，加上最近我屋企既便利店就係OK便利店，我都時不時有去買下野。利亞賣走OK，都值得為佢寫返篇紀念文章(佢唔係結業，未死的)。
公司份野是咁寫的，很長，唔COPY哂，大家入下面條LINK睇->根據ACT授予的特許權協議，利亞零售早於1985年在香港以「OK便利店」品牌開始經營便利店。利亞零售表示，董事會收到ACT提出的有利建議，將便利店業務出售給ACT，並指儘管尚未進行有關續期特許權的確切討論，但鑑於對集團業務之持續審視，董事會認為，出售事項為集團提供一個良好機會，以圍繞剩餘集團的業務重新制定策略。
https://www1.hkexnews.hk/listedco/listconews/sehk/2020/1105/2020110500048_c.pdf
利亞零售 （0831）宣布，已訂立買賣協議，以 27.9億港元現金代價﹙按無現金及無債務基礎計算﹚，出售集團「OK便利店」業務。交易完成後，擬派每股3.85元特別股息。
公司已發行股數是7.681億股，即是派29.57億港元，因為27.9億是無現金無債務計(即係唔包公司現金同債)，但出售之公司扣除債務淨現金係3.44億，實收31.34億，本身公司年中有現金4.13億，減走3.44億，再加返31.34億，即是交易完成後公司持有32億現金，再派29.57億出黎，剩2.43億現金。
重大交易要過股東會批准先可以，咁我估派息都係一早傾好哂既野，因為831主要持貨者除左馮氏持有40%之外，其他都係基金股東。
過去2年半，OK都係831主要收入及利潤來源，其次是聖安娜。OK便利店個業務2018年核心經營溢利(EBIT)1.7億，2019年1.9億，加返折舊攤銷(D&A)，EBITDA 2018全年係2億，2019係2.17億，2018年經營現金流整家公司係2.6億，低於EBITDA的2.9億，但計返利息收入同稅開支3300萬，就好接近經營現金流。
便利店業務大約一年提供2億左右既現金流入，27.9億賣哂成間公司，大約提早拎返14年既現金流，賣走左7%年回報率既資產。如果係誠哥賣，一定俾人話拎錢撤出香港，但馮氏?
公司公告內容隱約有透露睇淡香港便利店前景，呢個就有D奇怪，如果講業務轉差，都係2020年上半年先出現，都係受疫情影響為主。而且2020上半年公司收入有增長，但毛利率下跌毛利下跌，但應該都只係暫時性，除非佢覺得疫情持續好耐，咁奇怪? 就算環境差，OK個底本身唔差，要發展新業務攪大佢唔係無可能，所以我覺得係公司已經無心再係香港攪便利店，寧願拎返錢攪其他野，利豐重組唔知點，係咪拆骨賣哂資產? 定係投資新野? 未見到有咩消息。所以我認為賣OK，係馮氏有其他打算。會唔會本身利豐缺錢，要賣資產打救? 因為疫情對利豐貿易生意影響都好大，以上都係猜測。
公司話要發展其他業務，但佢賣左間公司，將D錢派返哂出黎，都唔係拎D錢攪咩新業務，純粹賣左佢自己袋返D錢，馮氏袋返12億。其實831之前派息都高，基本上現金流入幾多派返幾多出黎。馮氏既現金牛公司，之前私有化利豐，再賣OK便利店。馮氏有咩大攪作真係佢地先知，公開資料應該不多，亦都無興趣花時間搵，始終俾你知你都賺唔到錢。
餅屋果度一年大約6-7千萬現金流入，增長應該都唔快，穩定程度都不及OK便利店高。新果兩個業務仲係好細，可能一年都係賺幾百萬。
餘下業務6-7千萬一年現金流入，7.68億股，每股0.085，俾8-10倍市盈率，公司賣OK後股價0.68-0.85元左右，3.85加返呢個範圍大約4.53-4.7。今日成交價範圍4.61-5.27，開市4.7,收市4.81。基本上而家買都無咩肉食，而家買黎坐等如買餅屋業務，但無咩吸引力。
又見證一個穩定業務既公司，離開香港股票市場。
