因為之前出過篇免費推薦文講手遊，推過6820，加上平時係GROUP/PAGE有講下，所以應該有谷友都入左6820，今日業績後大跌，都要寫返篇分析俾大家睇下發生了什麼事?
講一講業績先~
收入增34.5%達10.5億，主要係2019年底出既浮生為卿歌上半年收入4.9億帶動，其他遊戲只有5.6億收入，其他遊戲收入同比跌28%，變成一隻遊戲佔公司收入47%，上年同期熹妃Q傳佔46.5%收入，公司都係有一個依賴單一遊戲傾向，都係同之前睇法一樣，單一遊戲爆款(收入大)，可以推高公司增長好多，但收入跌，就拖累公司好多，雙刃劍，機會同風險都好大。
不過公司而家好似走緊一條比較新既路，6820之前既GAME以我所知故事性係有，但不如浮生咁強，但今年公司打算將浮生推5部曲(應該係網絡文學,長篇小說)，後年會出浮生2手遊，呢個我估係其他公司比較少採用既方式(至少我睇過既公司/手遊都唔係行呢種)，呢種方式類似金庸文學+手遊，不過金庸巨著係手遊出現前已經出現左幾十年既文學巨著，之後衍生出電視劇+電影+漫畫+遊戲，就算有睇過/無睇過金庸，都可以透過以上衍生品了解到金庸世界，成為鐵粉! 好多遊戲都係取自文學去衍生出黎，古龍(不過而家少有)、西遊記(呢個最多)，或者由其他動畫漫畫衍生出遊戲(呢個最多)。
由手遊成功再衍生其他商品比較少例子，Fate(SONY果隻)應該係最多人識既遊戲再出動漫文學既例子(原來最初係18禁文字遊戲)，6820正係用呢個方式去做，成唔成功要時間先知，中國係呢方面真係比較弱，之前有熱門文學轉電視劇(TVB買佢返黎播我先知個名，好似都係宮廷古風類但無睇)，但近期中國都開始多左熱門網絡文學轉手游既例子(唔記得D名)，同埋要由藉藉無名，變成人人都識，除左本身有好強既創作團隊，仲要一段好長時間，但當成左名，keep到就可以keep住賺，不過我懷疑浮生果類宮廷古風故事係咪真係可以長青? 之前有D熱門過一排但又無人提(我唔睇呢d,唔熟,但至少還珠格格好似無再見人講)。呢d真係太長遠既野，講返d短野。
毛利增1.9億至6.88億，增幅38%，毛利率由63.7%增至65.6%，ios app store抽佣係抽30%(最底有link)，而6820遊戲主要係靠ios app store收人課金錢，不過我要搵下佢係抽佣後袋左落袋先計收入，定係抽佣前個數計，公司業績成本部份只提到分銷平台收取的分銷成本、伺服器相關費用以及運營人員薪酬福利，如果ios抽左30%，剩返4.4%係其他成本又好似唔太合理。
其實到目前為止業績都無大問題，問題係開支，公司毛利之後只拆3個開支，1.銷售開支，2.行政開支，3.研發開支，
1.銷售開支，由2.03億增至3.79億，增1.76億或86%，呢個真係好驚嚇，我估好多投資者或基金都估唔到佢咁大開支，管理層話有大部份(2億幾，聽唔清)都係浮生既推廣開支，浮生4.9億收入，毛利率65%去估，3.18億毛利，扣左推廣開支得幾千萬賺，仲有研發開支+稅未計，所以管理層話浮生用6個月時間做到盈虧平衡，下半年先帶來利潤，有分析員問其他手遊都係3個月就平衡(我估市場睇錯佢都係因為咁)，點解浮生要咁耐，管理層話隻遊戲上左先用錢谷，而唔係前期就谷所以咁樣。大約係Q3每月3千萬推廣，Q4更少，我估下半年浮生應該1.5億推廣開支，比上半年應該少5千萬至1億。
2.行政開支，由上年2,758萬，跌至今年2,168萬，主要係因為上年有1,154萬上市開支，剔走呢個上年就係1,604萬，增35%，增幅合理，或564萬，幾百萬影響不大。
3.研發開支1.3億，增2300萬，正常。
經營利潤1.75億，增9%或1500萬。就係因為銷售開支增太大，如果推廣開支少5000萬，利潤已經可以增40%，咁就另一世界~HAHA不過無得如果..而家諗下下半年咩情況
浮生上半年4.9億，下半年應該更多，因為1-2月都岩岩開始，基數低，下半年應該略高於上半年，我估6-7億問題不大，其他手遊跌幅呢個難估，下半年應該有新遊戲(但又好似唔覺聽到管理層有講，隻此生無白應該就出)，暫時當無，上半年舊手遊5.6億收入，當下半年再跌20%，4.5億，照咁睇上下半年收入應該差唔多，樂觀少少去睇2020全年收入22億(2019年16.9億)。下半年其他開支變化不大，而推廣開支減少5000萬，經營利潤下半年2.55億。全年4.3億。同上年差不多，估計今年有好增長要靠cut開支或者浮生表現比預期更好。
今年全年低增長機會大，所以現價市盈率12.6倍左右，貴定平，要睇大家自行判斷，之前市場俾到17-18倍市盈率，都係預佢有3X%增長，但而家無增長，會俾幾多? 我答唔到，公司上市未夠一年真係無咩數據參考，同業更加無得參考，心動2400點解仲可以值幾十倍市盈率?我要睇睇先答到。
盤數無預期咁，所以俾人洗倉是今日大跌原因，大家都可以睇到課金收入(網上有數據，俾錢就見到)，但公司開支只能靠估，所以睇黎好多市場既人都估錯左。
未來靠新手遊或者網絡文學，漫畫果d要出左再睇，暫時浮生月活躍都係2百幾萬用戶，基數仲係好低，要拉高呢個數先有得增長，網絡文學/漫畫要受歡迎拉新客入去課金手遊，起碼要一年先見成效，要慢慢培育一個IP(知識產權)，短線俾人炒起機會不大(反彈唔計啦，我指短線要創新高機會不大)，有心長線先好買黎坐。
苹果为App Store收30%分成辩护：我们的开支也很高
https://tech.sina.com.cn/i/2019-05-29/doc-ihvhiews5537326.shtml
沒有留言:
張貼留言