2020年初至今股票跌幅統計 (港股)

因為我現時手頭上得港股數據,未有美股數據(星期一再撈下) 咁先講港股 2020年初至今股票跌幅統計...

計算方法係今年最高收市價至今年最低收市價既最大跌幅,可能係3月12日最低,可能係13日,可能唔係呢兩日,總之係今年最高收市價之後最低收市價果日個價去計

https://docs.google.com/spreadsheets/d/1-hdAHbiAAjqPCaILQurcouyYMK-qo_L2ZRgwDqwiYA8/edit?usp=sharing 因為只計日均成交額多於50萬既股票 所以只有1215隻股票做統計

跌多過一半/跌左一半既股票有56隻

跌左40-49.9%既股票有61隻

跌左30-39.9%既股票有159隻

跌左20-29.9%既股票有429隻

跌左10-19.9%既股票有405隻

跌左不足10%既股票有141隻

恆指就跌左17.2%...

如果用盈富基金做標準就係跌16.6%...

跌得多過盈富基金既有863隻,

跑贏盈富既得387隻

如果單買一隻股票同盈富比較

69%跑輸恆指

而家呢個大跌市情況下,

如果又未有股票,我就講下幾種選股策略

1.買殘股搏反彈,

2.買跑贏大市既股搏繼續跑贏

1.買殘股搏反彈都有分2種

1.1買跌得多既搏佢反彈果下,例如跌幅超過30%果d入面揀,短線搏10-20%反彈

1.2買因為受疫情影響跌到好殘果d,等業績復甦就有機會升得好勁...

2.買跑贏大市果堆,有387間公司,可以從行業入手, 之前熱炒過既物管/互聯網/醫療藥物/教育/食品飲品/基建/公用/5g等......

自己係入面慢慢揀....

因為每個人投資風格都唔同,

而且大家識既公司又唔同...

我就唔會推number俾大家

希望個list同埋以上介紹既方法幫到大家揀股

係大跌既時候撈到好野,賺到錢,

渡過困難時期....

香港人加油...

如果都係揀唔到股,留言討論

談一談S&P500指數歷史及現狀

1974年10月S&P 500低位係63左右...

1987年8月高位337左右...

13年升幅435%...

1987年10月19日黑色星期一..

單日跌20%到225 距離高位跌33%(即係1/3)......

不過之後就繼續升.....

2年後仲升穿埋337呢個歷史高位創新高

2009年3月大約670左右...

2020年2月19最高...3390左右

11年升幅405% 之後會跌幾多先見底?

唔知啦~

但可以計到d支持位

3390做高位計

跌10%=3051

跌20%=2712

跌30%=2373

2712=大約係2019年6月低位

2373=大約係2018年年底低位

現價2979點,大約係21倍市盈率

2712=19倍市盈率

2373=16.7倍市盈率

過去10年平均值19.44

總之,跌市,有現金就最開心

價值投資者就更開心...

你準備好要買咩未?

要買未來10年高增長既公司/行業...

1137 香港電視業務結構分析

1137香港電視近期熱炒,炒到上天花板

市值更超越TVB 511...
但近期太熱了,回調是少不免

自從10月提及過之後已經升左一倍有多

公司訂單增長係好強,但公司一直虧損
大家最關心問題係,公司幾時賺錢?

咁就要了解下公司盤數,同埋佢點賺錢~

公司主要業務,好簡單~網上賣野......
但分兩部份
i)自營,自己買貨返黎賣
ii)第三者經營,幫人地賣貨

平時會見到公司公佈果個總商品交易額就係由呢兩個數組成,無論賣自己既貨定賣人地既貨,賣左幾多錢貨,就係呢粒...

2019年果粒1月9日公佈左係27.8億，今年1月個數就係3.38億,2020年全年目標係33.8億(按年增21.6%)

但呢個數唔係公司真係賺返黎既錢,仲要扣除成本,首先扣左自營果d存貨成本,另外幫人賣果D,只能計佣金收入，之後再扣運輸開支,人工(後勤+運輸人員),租金,宣傳,雜費等...剩返落黎先係利潤。簡單D講,即係賣左100蚊貨,扣左80蚊買貨返黎成本,就係自己袋20蚊用黎出糧交租等開支...有剩先係利潤...

由收益表開始講

1.收入
公司收入由幾個部份組成~
i)自己買貨返黎賣...例如大街市果d,應該係佢自營(見佢賣口罩都用大街市),呢部份係收益表入面叫做「直接商品銷售」...但要扣左買貨返黎個成本,先係真係收入,表入面叫做「直接銷售毛利」...

ii)「特許銷售收入」,即係其他公司係佢個網開個店賣野,而賣左既貨,要分返佣俾HKTV,大約係貨品售價既18%, 即係例如有間電器商賣左1000蚊既焗爐,HKTV收返180蚊。無存貨成本要扣

iii)節目版權廣告,即係之前拍左果D劇...放上網播收左果D廣告錢(可以不理)

上面講過,營運收入先係重點,直接商品銷售唔算收入,扣左存貨成本先算真係收返黎既錢，中間橙色營運收入就係包左上面三項,真正可能用黎俾開支既收入...OK?

而公司開支係乜?

係收益表入面有4項

i)人才成本,無論係前線定後勤包哂...

ii)其他,應該係油錢,網上平台既開支(軟硬件)...
iii)廣告開支
iv)租金

公司分析入面有分開4項,我主要講公司分析呢4個
i)配送成本,好簡單,即係物流成本,包括人/車/油/倉...越多訂單,個配送成本越高,但規模越大,單位成本越細。佔營運收入比越黎越少....
ii)市場推廣及O2O門市營運開支,包括廣告同門市租金,相關員工開支...呢個基本可控,暫時KEEP住佔營運收入30%左右

iii)電子商貿營運及後勤支援成本,都係人既成本,SERVER/IT,軟硬件相關開支,比較穩定,唔會點大增長，佔收入比跌得比較快

iv)非現金項目.折舊攤銷果D,通常不理

直接比較收入同開支

2017年,營運收入只有1.9億HKD

但人才成本已經2.6億...賺埋都未夠出糧俾人

如果睇配送成本,賣一件都未夠俾送貨成本...
2018年,好D,營運收入有3.57億,夠出糧俾人,夠俾配送成本,但未夠俾其他開支,所以都係要蝕
2019年上半年，繼續改善,但都未夠俾配送成本同埋電子商貿開支

2019年全年,我預計,就算增長較高，但應該都係仍然虧損...

2020年,我估計頗大機會仍然蝕錢

2021年都應該可能仲要蝕或賺少少

公司問題係邊度?

配送成本太高...2019年，估計5.6億收入入面,有4億係配送成本，而電貿及支援成本估計要2.36億,呢兩個加埋已經高過收入...肯定要蝕錢

2020年,用公司目標商品交易額計，會有約7億幾營運收入,5億左右既配送成本(可能更低),扣埋2億幾電貿加支援可能有機會平手,但未夠俾大約1億宣傳同埋門市開支...所以都一定要虧損.....

2021年或者有機會賺，要再睇公司點樣壓縮成本開支...公司有開始同D鋪頭合作攪自提點，成效應該仍然不大。

其實要做大個規模，做大個物流系統，降低平均物流成本，先有機會賺大錢。物流強先可以應付到訂單，訂單多但物流人手唔夠，都會限制左收入。另外係公司電商平台系統，要更有效率幫客買到貨，賺第三方廣告錢，開拓更多收入來源，對改善利潤都會有幫助。

口罩機?

呢個投資少，初期應該難賺，就算賺都唔會賺好多，我估佢買返黎都唔係為左賺錢，純粹承擔一下社會責任，幫助香港人，對集團利潤影響不大，可以不理。

估值問題
公司2020年營運收入都係得7億,但而家市值50億，公司未來幾年利潤率都唔會高，而家真係反映左未來5年既估值，所以隨時見頂係正常。我10月時推市值約23億，當時只係估計可以炒高D，無諗過一倍咁誇張，當然當時未有疫情呢個因素，仲有好多因素推高，但而家明顯超過合理估值。

合理價?
未來2年仍然會虧損既公司，好難定合理價，而家都係炒作因素較多，估計呢D因素過後，公司會回落，有特別消息先會再炒起,波動上落而未會有長期上升趨勢。

個人意見
今次炒升浪應該告一段落，之後都係得波幅無升幅，唔會再建議繼續持有，上次建議買，都係因為見佢股價弱+似見底+有推升因素，而家升左一倍，反映哂,可以暫時收工

全球口罩供需分析

日本人口:1.27億,

2015年每日產265萬個口罩,

每日銷售1340萬個口罩

按估計,2019年,日本日銷1447萬個口罩,

產量未有最新數據,

假設增加一倍至日產530萬個

每日產量可供4.17%人口使用

中國人口:14億,

現時每日日產口罩2000萬個,多數出口...

不出口,每日可供國內1.4%人口使用

台灣人口:2378萬,

日產口罩188萬個,可推升至日產390萬個,

未推升前,可供7.9%人口使用,

推升後可供國內16.4%人口使用

香港人口:752萬,2

4小時生產,日產量 6萬個,

可供0.8%人口使用,

2018年註冊+登記護士人數56723人,醫生14,651人...

最近信報有篇口罩經濟學既文...指出全球口罩每日生產量係2500萬... 大家可以睇呢篇先,入面講左好多資料,我唔再補充

https://hk.news.yahoo.com/%E6%96%B0%E8%81%9E%E9%BB%9E%E8%A9%95-%E5%8F%A3%E7%BD%A9%E7%9F%AD%E7%BC%BA%E7%B6%93%E6%BF%9F%E5%AD%B8-201300752.html

幾個重點

1.全球口罩肯定供不應求,因為口罩呢樣野本身用量比較低,除左流感爆,霧霾,花粉季節,需求會大既時候,平時每日都會用口罩既只有醫護人員/工廠/部份需要防塵地盤或工程人員...突然全部人口,無論嬰兒到老人,要外出都要口罩既話,需求量突然增加幾十倍,一定唔夠

2.就算而家急建生產線,上游原料供應都係一大難題,要成條供應鏈都一齊增加,要花時間,問題係疫情可能只係維持幾個月會消減,呢個投資,邊個去做,只有政府,而且最有可能做既係中國政府

3.呢個投資,一定係蝕錢,對比經濟上損失黎計,呢個數真係極低,但問題需要時間,而家疫情擴散中,遠水未必救到近火,但明顯一定要做,睇下政府做唔做,其他國家政府未必會理,但我諗各國政府都應該認真考慮國內口罩生產量

4.糧食供應仍然正常,除非大規模爆發,或者到左7-8月都未見有減退跡象,會影響農業運作,暫時大家唔需要搶糧食住,農業已經多數機械化同自動化,極少人耕種都可以有糧食產出,個人就唔太擔心供應量會突然大減

大家搵到口罩買就盡量儲備捱到7-8月既用量,

有多就分D俾有需要既人...

亦都可以預期,未來幾個月,香港人會盡量減少外出

零售業,餐飲業會經歷超級寒冬...

加上旅客繼續減少,旅遊酒店業會冰封...

經濟會進一步轉差,留多個錢,保住份工,最緊要...

有危亦有機,至於機會,等真正機會出現先再講...

而家首要做好準備...應付危險...

遲下再同大家講下有咩機會....

===============================

以下是參考資料

2015年日本數據,家庭用口罩市場規模265億日元,36.9億個口罩,平均一個口罩7日元(現時匯率計約0.5港元一個/0.44人民幣一個)... 2015年日本國內年產9.68億個(日產265萬個),進口39.25億個(日進口1073萬個)

日本口罩主要公司及市場規模

https://info.taiwantrade.com/biznews/%E5%AE%B6%E5%BA%AD%E7%94%A8%E5%8F%A3%E7%BD%A9%E5%B8%82%E5%A0%B4-1127882.html

2019年預計市場規模係370億日元(包括醫療及工業用口罩),假設價格變化不大,年銷售52.8億個口罩,日銷1447萬個口罩...

http://japan.people.com.cn/BIG5/n1/2019/0829/c35421-31324580.html

中國工信部最近表示產量達到一天800萬隻以上，復工復產面達到了40%,按此推算全中國口罩日產量2000萬個

http://finance.eastmoney.com/a/202001291368397880.html

2014年中國口罩日產量1000萬個 中國口罩市場規模及主要品牌 http://www.xincailiao.com/news/news_detail.aspx?id=793

台灣口罩日產量188萬,力谷可以達到390萬

https://www.epochtimes.com/b5/20/1/29/n11829247.htm

美股及港股2018-2019曾大跌及翻身公司

今次分析方法,係好有系統,

首先我介紹一下今次分析系統

公司選擇準則:

全部都係2018年-2019年大跌過既公司

然後係2018/2019年最低收市價至現時升幅超過1倍，
代表公司經歷過一次大跌,然後翻身創新高既公司

每間公司分析步驟:

1.記錄公司股價最高最低位時股價及現價,與當時日期,並計算升跌幅度

2.搜尋公司最高與最低價之前既相關新聞報導

3.由新聞中資料睇到上升下跌因素

潛在公司找尋方法

1.找出現時有大量負面新聞既公司

2.找出公司有潛在翻身的因素(契機)

3.由財務上預計公司有幾大機會成功

大家首先可以先睇呢個LIST (有港股及美股)
https://docs.google.com/spreadsheets/d/1P_RwB5QfSxHW1rqzoOWMdpSEhrW7T_uyirrY70v2edM/edit?usp=sharing

今次以蘋果為基準，揀下跌超過30%，升幅超過一倍既公司，由於公司數目多，時間有限，只抽兩間公司黎講。每間公司跌及反升既背後原因都有好多唔同既情況，難以一一細數，呢兩間比較大(市值頭兩大)及出名多人識，港股都有唔少可以寫，但講應該比寫容易，所以寫就寫兩間美股算。

除左睇個別公司，亦都要睇下市場因素，標指500由10月既29xx跌落12月既24xx，跌幅17%，由24xx升返上現時333x，升幅36%。跌幅超過30%係超越指數近一倍。

以下簡單寫，詳細內容可以睇返參考資料＿

1.Apple(AAPL)

2018年10月2日,232蚊收市

2019年1月3日,142蚊收市(跌幅38.8%)

2020年1月17日,318蚊,新高(升幅123%)

前景憂慮:

2018年11月開始Apple有大量負面消息包括iPhone需求放慢的疑慮，多個Apple供應商唱淡盈利前景，主要係傳Apple零件訂單下降，當時正值中美貿易戰緊張階段，美國總統特朗普暗示iPhone未來可能落入徵收關稅的範圍，中國法院批准禁售蘋果七款iPhone(當時高通贏左訴訟，因此禁售舊款iPhone)，Apple宣佈不再公佈iPhone銷量亦增加市場憂慮。索羅斯沽清蘋果股票。

轉機: iPhone係當時Apple主要收入與利潤來源，佔收入60%，所以iPhone飽和憂慮令市場擔憂，不過之後呢類擔憂消失，可能係因為禁左平價舊機，反而益左Apple新機銷售，iPhone XR係中國銷量好好，iPhone 11仍然維持強勁銷售，另外兩個利好因素係，Airpod 銷量強勁(雖然佔收入利潤比仍低)，app store收入增長強，佔收入利潤比上升，iPhone佔比繼續減少，加上iPad銷量回復增長， 其他因素: 公司估值大幅上升，公司10年平均市盈率只係16倍，2017-2018年11月市盈率係16-21倍之波動，2019年11月開始突破21倍，現時係25倍(比平均值高56%)。

2.Tesla(TSLA)

2018年12月14日: 380蚊左右

2019年5月31日: 185蚊左右(跌幅51.3%)

今年最高537蚊(升幅190%)

前景憂慮
Model 3交車低於預期，要減價谷銷量，季度業績差，財政不樂觀，起火事件不斷，投行極度看淡。

轉機:
中國廠極速建成生產並開始交付，中國訂單大增，中國銷量強勁。荷蘭銷量增長強勁。全球銷量強勁，銷量超越leaf，成為2019全球最暢銷電動車。

兩間公司共同點

1.都係季度業績差，銷量差過市場預期，產品未如預期，然後加上碰上市場大跌拖累，公司負面新聞不斷
2.轉機同樣是有中國因素，中國市場對iPhone銷量提振及Model 3訂單增加因素....

這次分析其他發現

除左呢兩隻翻身股，有長升股票升幅都有一倍，最經典就係Visa同埋MasterCard，Visa現價距離2018-2019最低價升幅87%，MasterCard現價距離2018-2019最低價升幅116%。

兩者其他因素

美國2017年3月開始進入加息周期，直至2018年12月20日。美國2019年8月1開始減息，9月19及10月31日再減，累減0.75個百分點。然後，美國三大指數於11月1開始突破創新高，所以帶動美股公司估值開始提升。

以上資料的結論:
1.公司下跌一定有原因，但下跌之後能否上升，是最難判斷的問題。如果時間回去1年前，邊個會估到Apple/Tesla銷量會咁快回升? 強如索羅斯都估唔到。 兩者都有中國因素，如果無左中國因素，股價升幅不會太高。

2.現時美股明顯受減息而導致資金流入股市而推升股價與估值。唔少股票估值都提升到歷史新高/追上歷史高位，市盈率到頂唔一定會大跌，但如果增長不如預期，跌幅就會比較深，負面與正面消息會輪流出現，現時是正面消息期，適合短炒心態，不要以中長線心態入市。

點樣可以揀到翻身股?
1.當然要搵一隻高位跌落黎比較多既股票,呢個好易,用軟件一下就搵到出黎 2.係呢堆公司揀一隻/幾隻潛在公司先係最難，負面新聞一定大部份公司都有,先會跌成咁，但邊一隻可以翻身? 有咩因素決定? 我個人歸納左幾個簡單未經證實既因素(其實比較難證實)
a.公司有良好管理層，呢個好重要，要將公司走出谷底，扭轉惡劣環境，舵手係好重要，果D咩架船入左風高浪大既海中，要將佢帶離要個好既船長既比喻我就唔詳談，但Apple同埋Tesla兩個CEO明顯係好有實力(你當我馬後炮又好點都好)

b.公司產品係市場上有競爭力，呢個要睇返整個市場中所有競爭者與該公司既競爭情況，iPhone一直靠ios有好強競爭力已經唔洗多講，雖然華為上年表現亦都好出色。而Model 3其實一直問題都係出貨量上面，而非產品無訂單，公司d單一直多到做唔哂，中國廠一出，可以應付返大量訂單，所以解決左根本既問題。

c.公司一定要有高增長既可能性，百威(BUS US)一樣係曾大跌35.8%，但現只升返25%(我有睇埋有大跌但無咩點升既公司)。如果公司無咩高增長既可能，就算跌左都未必升得返好多，可能要用多好多時間先上返高位，因為只有單位數增長。

其實可以再打詳細D,但係兩日假期中抽空搜集及整理左美股同港股數據，再搵一堆新聞去證明呢兩間公司，再思考一堆有用既野，打字及編排，加上我又不喜歡多廢話，內容係唔會好多，希望幫到大家。

「文末彩蛋」到左最尾都唔見有number推介，一定好奇怪~我本來想寫下波音，不過見佢其實又唔係跌得多，高位計只係跌左16%......而且美股現時適合短炒熱門股，而非搏翻身既時間(要搏翻身應該等個市拖d股票大跌先係時機)，所以唔推了。至於港股，都係一樣，大家集中炒熱門股之時，執住錢先，執多d彈藥先再搏翻身股，同埋想睇多d資料先去推，唔想睇得少少資料就講出黎，一陣睇錯累大家蝕錢就唔好，大家密切留意住page&group，有機會我會出post講下，2019年10月提過1137香港電視，最近都升左唔少。應該係近期講過既翻身股。完!

以下係一堆參考資料

==============================================================

iPhone銷售佔Apple收入約六成，但Apple於11月1日公布上季業績時作出審慎的收入預測，同時還宣布不再公布iPhone等產品的銷量數字，引發iPhone需求放慢的疑慮。多個Apple供應商唱淡盈利前景，更加深市場疑慮。

美國總統特朗普日前暗示iPhone未來可能落入徵收關稅的範圍，摩根士丹利警告，Apple難以將生產線大舉遷出中國，若該公司將關稅轉嫁消費者，會重創需求；若自行承擔關稅成本，會削弱盈利，不論如何都不利股價。

https://hk.on.cc/hk/bkn/cnt/finance/20181202/bkn-20181202000810350-1202_00842_001.html

史上最貴iPhone救了營收表現，蘋果卻宣布不再公布手機銷量

2018.11.02

https://www.bnext.com.tw/article/51142/apple-iphone-sales-asp-q4

蘋果公司股價大跌的四大原因

2018年 11月 22日

1. 投資者擔心iPhone銷量

2. 如果經濟不景氣，蘋果的高價可能會令它捉衿見肘

3. 投資者對蘋果的商業服務沒有信心

4. 蘋果體現了更廣泛的市場擔憂——比如美中貿易的緊張局勢

https://www.bbc.com/zhongwen/trad/business-46300559

iPhone 市場飽和隱憂 蘋果遭降評股價下跌

https://news.cnyes.com/news/id/4250024

蘋果再爆嚴重硬體問題，高價策略使分析師看衰 iPhone XR

2018 年 11 月 13

https://technews.tw/2018/11/13/apple-hardware-problem-iphone-xr/

中國法院批准禁售蘋果七款iPhone

2018年12月11日

https://cn.nytimes.com/technology/20181211/apple-qualcomm-patents-ruling/zh-hant/

口裡說不身體很誠實   iPhone 大陸銷量增長驚人  

2020-01-10

https://www.eprice.com.hk/mobile/talk/4544/214936/1/

========================================================

特斯拉第一季新車交車量低於預期，Model 3 市場需求疲軟

2019 年 04 月 05 日

https://finance.technews.tw/2019/04/05/tesla-ships-63000-vehicles-in-q1-missing-expectations/

美國電動車生產商Tesla（內地譯:特斯拉）為了力谷銷量，近日宣佈調整全球售價，在中國推出的所有型號

https://hk.news.appledaily.com/international/daily/article/20190304/20625321

Tesla 今年首季的業績比上年同期下跌了約 30%，還有中國經濟放緩及車市不佳，令到 Tesla 的財政狀況並不樂觀

2019年4月12日

據《日經》報導，日本松下電器正在凍結對特斯拉千兆工廠  Gigafactory 的擴產計畫，因為銷售量可能低於預期。

https://technews.tw/2019/04/12/teslas-capacity-expansion-was-blocked-and-panasonic-suspended-its-investment-in-the-giga-plant/

美國大廠特斯拉（Tesla）電動車傳出數起著火意外，特斯拉採取軟體更新因應。分析師警告，特斯拉的起火事故將引發消費者抱持觀望態度，對電動車銷售造成不利影響。近幾個月，特斯拉轎車發生 3 起無預警起火案件，分別位於上海、香港及舊金山。特斯拉近年來至少發生 14 起電池起火事故，大多數發生於車禍碰撞後。

https://technews.tw/2019/05/20/tesla-on-fire-not-good-for-selling/

大摩勁踩Tesla每股只值10美金

24/05/2019

日前大摩（摩根士丹利）更落井下石，發表報告看淡公司前景，並預測最壞情況股價會跌95%，只值10美元。

https://www.exmoo.com/article/108425.html

Tesla上海動工設廠 料售價減4成

https://hd.stheadline.com/news/realtime/chi/1404978/%E5%8D%B3%E6%99%82-%E4%B8%AD%E5%9C%8B-Tesla%E4%B8%8A%E6%B5%B7%E5%8B%95%E5%B7%A5%E8%A8%AD%E5%BB%A0-%E6%96%99%E5%94%AE%E5%83%B9%E6%B8%9B4%E6%88%90

特斯拉中國出售量激增、獲得 16 億美元聯合貸款

https://www.inside.com.tw/article/18483-tesla-secures-1-29-billion-loan-from-chinese-banks

2019年港股回顧(一) 2019年倍升股簡評

回顧2019年港股倍升榜

截至2019年12月27日去計,只睇有利潤既公司(虧損不在我考慮之列)

2019年升幅超過1倍既公司有50間... 當中三間,2018年升幅同樣超過1倍.... 包括頤海國際1579,波司登3998,亞洲水泥743

頤海受惠於母公司海底撈積極擴張,及公司即熱火鍋新產品銷售良好

加上多款湯底及醬料推出,盈利增長強勁...

波司登,新產品銷售轉佳,雖然公司被沽空機構唱淡但無阻股價上升...

最高曾上4.46,現價雖然大幅回落至2.9,但年內升幅仍超一倍....

亞洲水泥,受惠水泥價格上升,利潤急增,同業增長都強勁...

可能亞泥市值較低,業務較集中個別地區,盈利增長較大, 同業潤泥前3年升幅都有50%或以上

另外HYPERBEAST,春立,愛康,李寧,都是2018年升幅超過30%,2019倍升既公司

HYPERBEAST由創板轉主板,盤數一直都靚, 我有LIKE佢地個PAGE,睇下D潮流資訊 但對於佢地賺錢模式就沒有太多了解

春立同愛康,做假關節植入物,主要係技術水平提高取代進口貨,

整體市場增長唔算快但市佔率提高令到利潤增長較快

李寧,其實,今年3月出既全年業績都未睇到有咩特別 係去到中期業績先見到利潤大增,但已經升左一大浪

要捉呢隻,真係好難,但明顯有跟開既市場人士/基金,一早已經入定貨

可能係季度訂貨會數據已經見到增長會加快.....

睇完上年升果D,轉睇上年跌果D... 我主要想講既係手機零件...

上年手機鏡頭果3隻,跌幅由30%-64%... 今年都升超過1倍....包括舜宇,丘鈦,高偉

上年2018印象中係價格競爭導致毛利率下跌,利潤不及預期甚至大幅減少

今年2019毛利率水平趨穩,加上供不應求,利潤大幅回升,加上下年5G元年

市場睇好訂單增加,繼續供不應求,所以今年開始股價復甦...

最後講下上年0%升跌幅,今年倍升,上年0,即係未上市

今年上市就已經倍升,除非定價好低,但今年普遍定價都不低

倍升左,估值通常已經很高,如果業務上睇

藥明康德做醫藥研發既市場增長較大

中煙,睇唔到有咩市場新機會~ 優品360,算吧啦,生意難做好難倍升....

小總結,上年倍升,唔代表今年唔會繼續升.... 如果係呢堆揀2020年仲會倍升既話, 手機零件應該有能力

舜宇同丘鈦都反映左唔少未來盈利預期,要倍升比較難

高偉如果2020中期盈利超預期,全年倍升機會就好大...

未來一星期有時間會繼續寫下2019年回顧及2020看好既行業/公司

發掘十倍股呢個地方可以幫到大家D乜?

係呢一刻,我都唔知可以做D咩幫到香港
同D唔同政見既人嘈,只會浪費時間
留返D時間思考一下,自己可以點幫香港
或者有人係覺得,感化其他人係自己可以做既野,其實都可以

我就無咩興趣同其他人爭論誰是誰非
想做返D實際D既野~講下投資~
其實對於果D工作5年都無既人黎講,投資十倍股關佢Q事咩~佢打工就算儲起一半錢,做左5年野,都係得2.5年既收入儲備,假設畢業至今5年,平均月入15000,儲起一半有7500,22.5萬本,再all in一隻渣5年中左10倍,225萬,夠唔夠俾首期?而家d上車盤都6球起....

邊個可以ALL IN就守到十倍...好多人都話有一倍已經好好,但1倍,45萬,可以做d乜? nothing.... 唔係我要求高,係社會生活成本太高,ALL IN有10倍先叫做可以諗下買樓,中唔到十倍,食屎啦~ 仲有注碼問題,唔all in,分10隻,有1隻中10倍,只係相等於你成舊錢多左1倍only,22.5萬拎2.25萬買左1隻升10倍,拎返22.5萬,只係多左1倍錢,買幾多隻去搏先岩?我覺得頂多4隻.... 搵十倍股既過程應該係點入手? 香港有2千幾隻股票,美股更多,A股,um....... 幾千隻股票,合埋眼買中一隻10倍,應該係千份之幾(5年都有幾隻有10倍既), 咁當然唔會合埋眼揀咁叻仔~

假設一下,你有能力睇到一間公司有10倍潛力,100%準既~ 但你睇一間公司要用1日時間先可以了解有冇10倍潛力 幾千間公司,每日睇1間, 你要用10年時間去睇哂先會搵到果一間, 你睇得黎都可能升左10倍......

如果你幾千隻入面,是但揀幾十隻黎睇,可能係睇報紙雜誌電視網上有人講,又或者朋友俾既number,希望係入面搵到1隻係10倍, 其實呢個機會計同合埋眼搵一隻既機會差別不大,可能比合埋眼揀一隻高dd.....因為本身呢d資料,都唔係for你爆升10倍架嘛....

其實最好既方法一定係整合左過往10倍既公司共通點, 再用果d共通點去篩一堆股票出黎,再逐隻自己睇~

我暫時可以肯定既共通點係收入同盈利一定係持續高增長...呢個係必然,一間公司既市值,好大程度上取決於佢做左幾大既生意同埋賺到幾多錢,呢兩樣增長得越快,公司價值增長得越快..... 如果間公司盈利低增長,盈利減少,有排都唔會市值升10倍,邊個買?(有人自己夾到自己d股票升10倍又係另計啦)

另外市值大果d都難d十倍...或者耐d時間...呢個要有例外既例子,但普遍都係正確~倍升係呢個情況就唔難既

仲有好多其他因素,但我唔會寫哂出黎住.....

寫到呢度,一定有人個心入面諗,有NUMBER未? 我俾個NUMBER你有幾難,但我係咪真係一定會中? 未必, 我都唔敢保證自己100%準, 就算我真係100%準,你睇到個NUMBER,會唔會就咁真係信哂我,瞓身ALL IN渣幾年唔郁? 我敢講,100%無人會咁做,SO,我講個NUMBER出黎有咩意思? 其實我應該講過好多次,我做既野係集中講D有用既資訊俾大家去分析,邊D公司值得睇,邊D可以研究下,減少睇D無謂既資料,令你唔需要睇10年先搵到1隻10倍股.... 所以,大家如果只係想睇number,睇推介,sorry,呢度無的, 想睇分析,會有,睇下有冇時間寫,可以一齊傾下, 有人有10倍股推介,都可以出post講,一齊傾, 係我最希望達成既情況,大家都為香港人努力,香港人加油.....