2020年雖然對很多人來說是艱難的一年，但對投資者來說算是輕鬆的一年，港股資金集中於某幾個行業，要有正回報，應不難。如果回報差就一定是自己問題，我2020年都犯了很大的錯誤，幸好第4季收復返不少失地，港股個倉仍有不錯回報。
今年對於我黎講算是轉變頗大的一年，前2年個倉主力都係持有1523，其實都好奇妙，而家回想返果兩年，究竟我做緊咩呢? 基本上回報真係差到無朋友，停左係度，完全無進步，今年終於肯發下力去重新改變自己投資策略同埋改變自己個倉，唔知係因為疫情還是什麼改變導致。希望這篇文的經驗可以幫到大家從我的失敗經驗中學習。(如果有其他大神分享賺幾倍既經驗當然是更好的學習對象)
2020年1月(0%)，當時應該大部份時間都係撲口罩、搶口罩、上唔同網站訂口罩，準備過年，我個倉1月是沒有郁，得1隻股，就係1523珩灣科技，佢12月底同1月底收市價一樣，所以個1月個倉回報係0。
2020年2月(18.2%)，A股新年過後大跌，香港1月底有首宗確診之後股市已經跌緊。靠6820(未改名前叫FriendTimes)令個倉+18%，6820當月一個月升93%，我當然無all in又無買賣得好靚，所以先得18%，當時月底仍持有1523。當時會買6820好似係睇左新聞見到突破。
2020年3月(-4.6%)，由美國帶頭股災式下跌導致環球股市大跌，都係因為病毒環球擴散，6820急升之後大市跌佢都跟跌調整，3月底已經無再持有6820，1523反而無郁過，股數不變，但股價由1.15跌至0.98，所以成個倉都傷。不過當月短炒過美團，又有買過7500反向恆指，所以整體最後唔算好傷，而且個市亦都好快反彈返。例如美團當月最多跌26%，最後全月只跌6%。3月亦都係開始研究美股既月份。等左幾年，終於等到美股大跌，亦都將MPF轉一半去左北美基金。
2020年4月(9.4%)，4月底環球市都反彈，恆指都升4.41%，1523仍然仲係度不過股數略減，個價略升返上1.02，4月有買入雅迪1585，因為見佢突破，大家睇返1585 4月走勢就明，1585係睇業績睇返黎，下半年收入及利潤增長都好勁，加上當時有新聞指美團會買電動單車做出租服務，另外之後就有外賣轉用電動單車車隊需求增加。
2020年5月(10.4%)，5月港股係差，恆指跌6.8%，5月22日恆指單日跌5.6%，地產股是最大重災區，個倉已經無持有1523，全倉6820，當月6820升31%。開始發瘋之路,哈哈，呢個大家真係唔好學。6820係令我搣甩左1523既公司。
2020年6月(33.2%)，5月底全倉6820，6月6820升29.43%，個倉6月回報緊係好，不過6月底唔係全倉6820，分散左買左波司登3998周埋東陽光藥1558，中間都買賣過其他股，所以個倉有咁既回報。
2020年7月(-21.11%)，7月A股勁升，帶動埋港股勁升，當時仍然持有6820，但6820當月跌19%，是拖累整個倉原因，另一大主因係1612永勝醫療，我寫文推俾大家我都有買，我都重傷。 高追呢個行為是沒錯的，錯在沒SET止蝕，雖然我有分注，但就是做左好多人都會太既錯誤，越跌越溝，越溝越跌。所以分注唔應該向下分注，向下分只會變成越跌越溝。跌是要沽不是買，之後學懂了。
2020年8月(-7%)，收費欄開欄的一個月，雖然6820業績前升返，但1612仲有貨，8月頭仍大跌，蝕左唔少，加上轉另一隻港股(收費欄首隻推介港股)賬面都蝕，所以整個倉都係蝕。
2020年9月(-33%)，最慘的一個月，6820 8月31日(星期一)收市後出業績，第2日9月1日(星期二)單日跌29%，雖然開市即斬左D，但斬唔哂，之後繼續跌先再慢慢清哂倉(月底仲有D)，仲有8月果隻港股止蝕左。
2020年10-12月(4.59%，3.79%，28.66%)，10-12月D股票都是收費欄寫/推既股票，亦都開始分散黎買，個倉持有5-6隻港股，12月是靠個倉有隻股票單升最多升35%，然後佢跌之前沽左避左，同埋短炒過D港股執左錢，令到12月表現比較好。因為入面D股都係收費欄寫既股就不公開了，我會留返收費欄先寫。
結論
1.大家真係要時刻睇住自己個倉月回報，如果個倉回報唔高要檢討。唔好學我之前2年咁死抱住一隻股，然後跑輸大市(如果你死抱住識升既股，緊係OK啦，檢討目的就係檢察視自己既倉唔會跑輸大市)。
2.重倉個別股票，犯一次錯誤，足以拖累全年整體回報，或者你個倉隻股票由升勢轉跌勢又唔沽既，就會拖累回報(所以每月檢討一次就OK)
以下兩張圖第一張是如果7月0%，無買1612永勝，6820又清倉無俾佢拖累的話，個倉回報。第二張是9月0%回報既，全年135%。純粹試下計返無中槍既影響會點，但係咪咁就真係最好，其實仲有好多要檢討。
3.月檢討其實唔難，月結單有哂數俾你MARK低去計，只要每月收到月結單MARK一次就可以，唔會花你好多時間，但效果是好好。
4.10月同11月港股都有好多機會，不過我把握唔到，我而家睇返我當時其實係可以掌握到，不過我無努力去搵機會。當時應該好努力睇緊美股，美股個倉有更多要檢討，今年是特別的一年，開始同時睇兩個市場，亦都因為收費欄有好多新工作同埋新挑戰。
5.有長期持有股，亦都要有短期持有既股，目的係令你KEEP住對市場既關注，又係前2年果個例子，我睇返D月結單雖然有短期買既股票，但唔活躍，有時跟炒一下熱門股是有益的，果兩年我應該好拒絕D熱門股，就算短期買賣果D股票都係極冷門，例如2230羚邦，冷到無人買，要有人買先有錢推高股價，呢個是很重要的。
更多既檢討，留係收費欄再講，2021年，希望我都可以搵到D大路既股，寫係FACEBOOK，同時令收費欄同埋FACEBOOK/MEWE既谷友們，都可以因為"發掘十倍股"而獲得益處，感謝大家。
