2019年2月第3星期 A股反擊

好耐無寫過一周升跌, 1月有寫總結,不過睇返果篇野,都係寫得麻麻地

2月初就新年啦,放假無野好寫啦

年假返黎果個星期,都無咩升跌既,恆指頂住左係28000 所以無咩野好寫,咪唔寫囉,

其實唔係我懶啊

今個星期就堅喇,有好多野值得講下 恆指一星期升915點,+3.28%,日均成交額1050億

唔算特別

精彩點係望下隔離A股, 全A股指數+5.75%,滬深300+5.43%,上綜+4.54%,深綜+6.32% 兩市日均成交額5,780億,超過一年新高,去返2017年9月時水平,接近一年半前(按圖可放大)

如果大家相信成交長期低迷後,突然大幅增加,就係轉勢起點, 咁A股今個星期可以算係新升浪起點??? 今個星期A股升咩呢,睇下下面

A股有樣好,有行業指數,香港真係好落後,恆指公司整果個,流到爆

多元金融係信託果類公司,今個星期第一次升,所以升幅特別勁,D公司唔係好識

券商指數,呢個係2018年10月已經見左底,之後慢慢爬升,今個星期先大彈,其中一個原因一定係上面提過,A股成交額大升呢個因素,其次係減稅降費,可以睇下面呢篇

A股熱炒減稅降費 券商A股集體漲停H股急飆

通信設備,半導體,5G,炒得最勁係新年之後,美國不斷叫其他國家唔好用華為設備,但部份國家表示唔用唔得, 反映華為競爭優勢之強,而國內有唔少設備公司都係華為D供應商,亦都有類似華為的低價優勢,所以D錢一齊湧入, 炒一轉OK既,但小心炒錯

半導體應該係手機設備,Samsung出摺mon機,3後置鏡2前置鏡既s10+

太多行業就唔逐個寫喇

睇返香港果個list

https://docs.google.com/spreadsheets/d/1HgYo6asmMagsL39FrYBtQictuivwHdwGRuXiIsekJ9M/edit?usp=sharing

其實同a股差唔多, 手機零件,5G設備,券商

比A股多左D既係賭股

內險係H股黎講算強勁,始終A股大升有幫助

A股大升,應該同中美貿易談判有點關係

美國延長加關稅期限,有時間繼續傾

然後,人民幣穩定成為焦點

雖然我覺得無咁快會解決中美間糾紛

但氣氛緩和,A股明顯有資金流入,3月應該繼續好

3月港股業績期,匯豐業績未如預期,恆生略好

聯想好過預期後大升.....

有部份公司發盈喜,例如雅生活,國泰

聯想同埋國泰都係之前一直潛既股

逆轉既業績推動股價向上,如果KEEP到

潛在升幅會好勁,要睇返公司基本面

市好,機會就多,把握今次機會,再儲定過冬既糧

對於經濟基本面,有人睇好有人睇淡

而家D數據有D係轉差,不過係滯後定領先

要小心D去睇

聯儲今個星期話希望今年停止縮表,加息或不多,亦都係令市場放心左既一個主因

買咩公司行業都唔洗我點講,要炒既都係上面呢堆,反而係業績中發掘優秀公司,作為長期投資對象,係2月及3月必要做既事情,我都唔打咁多字了,花多D時間睇返今個星期既業績,搵D有價值既野同大家講返,係咁先

2018年12月升跌

12月,又靜又差的既一個月,得返4個交易日

篩左港股日均成交額有1千萬既公司,唔過400間

恆指跌2.84%

https://docs.google.com/spreadsheets/d/1qDCf01e1dfEEumdk9g3x19df89J4n0gpZvY6IOoiiIc/edit?usp=sharing

跌既,好集中係醫藥醫療,集中採購影響持續

藥股之前升左好多,而家去返起點,

政策影響幾多,無人知,公司話影響微

因為之前要拎錢同醫院溝通溝通,行銷費大

但而家政府集中買哂,可以慳返筆錢

但有D藥降幅好大,達70-90%,仲有冇錢賺?

雖然佢出價投標,正常唔會出個蝕錢價去搶單,

但亦有可能出個蝕本價為左搏其他著數,

基本面估唔到,唯有睇圖估

但間間都唔太一樣

1177中生製藥跌返去2016年底部(不計除淨),計埋除淨就去返2017年起點 1093都係去返2017年水平,兩間估值都18-20倍P/E,5年低位附近 如果P/E計係平,但如果盈利跌,P/E就唔係而家呢個

如果要企穩升返,應該都要等業績出果時睇佢攪成點

跌就好難估反彈位,彈完再回果下先入,做左2個底先買就穩陣D 車股係另一重災區

主要係中國減入口車稅,入口車減價,競爭加劇

汽車股普遍都超平,但11月汽車銷量都分別幾大

廣汽有接近雙位數增幅, 東風就跌20%, 長汽都有微增,吉利增速明顯放慢

不過呢幾個月,車股都唔跟市跌,打左個底出黎,如果復甦,應該比藥快升D

教育股有D都仲跌緊

地產有少部份都係跌,水泥果D都係,

政策開始見有D鬆返房地產跡象,

不過經濟數據唔掂, 貿易戰影響持續,內房有無得彈? 機會又好似未見到

升既有幾類

1.公用: 電,燃氣,電訊呢類都係有升

2.地產收租: 領匯呢D

3.公路:深高速呢D

都係防守性強,有息派既比較強,市跌有錢轉泊防守股,都正常

黎緊2019年點睇? 真係有D複雜,仲未諗到點樣入手去寫,留返下次,再諗諗

MPF 研究

今次想講下所有人都會面對既問題,MPF選擇以及MPF操作
MPF投資主要有兩樣野選擇 1.買乜組合, 2.買入賣出時機
對於第1條問題,買乜? 好簡單, MPF得3種產品,股票,債券,現金
假設65歲退休,60歲式之前一定係100%股票
60-65歲就睇情況,一次過轉哂去債券/保守基金
股票再細分通常係地區,中港,亞洲,歐洲,北美,部份公司有行業揀例如醫療

先解釋下面2張圖
分別係恆指月線同埋美國標普月線圖
120,60,36月線,代表10年,5年,3年平均買入成本
因為mpf每月買一次,所以我選擇每月15號價格為模擬買入價
然後每月月供2000蚊,供10年,5年,3年計算當期平均成本
簡單D講,恆指/標指現價,就係現時價值
120/60/36月線,就係果段時期平均成本

買入賣出都係得2種方法
1.月供,唔理升跌,咁就好似下圖咁,
每條月線就係你平均成本,供既時間越長,平均成本越低
2.等股災先買入,就係你一直月供D錢放入保守基金做活/定期存款,大跌先轉入股票基金
呢個係每個人都普遍認為最聰明既做法, 大跌先買,一定最平最抵啦
事實又係唔係?

先以恆指為例,假設A君用方法1,月供唔理,咁佢10年平均成本就係紅線
你係咩時候買先會平過A君入市,就係2009年/2015年,過去18年只有2次機會平過
而且優勢只係打左9折,平10%買入...賺多A君10%

如果用美國標普做例子
只有2009年一次機會,優勢就係3X%,65折,但之後,一直都唔會有機會,
今個月15日計A君賺緊75%

如果用方法1,再高沽低買,又有無可能,可能性極低
你要估邊個位沽之後會大跌,但無一個指標可以估到頂

另一個方法係,你覺得係頂果陣,新錢轉供現金存款,舊錢繼續放係股票度

到左穿平均線,先再入返,但可以賺多既%未必太多

另一樣野,可以睇到,越早供股票,平均價越低

最後,想講,上面張圖.....
假設用方法1,月供唔理,任何時間做起點,供左10年
你既唔同時間回報就係上圖
如果2000年開始供恆指,最高就係120%回報
但如果2006年開始供,2016月你回報係負數

如果係2000年供標普,2008年你回報都係負數即係要蝕
如果2008年開始供,而家回報係80%

所以,有D野,都係無得計,無人知邊年係最旺,早十年出世同遲10年出世,
退休時都可以兩個世界

以上例子係月供2000,不變,與實際情況有出入,因為人工會加,供款會加

總結一下
1.先儲錢,等股災先買貨,對於月供股票,優勢不大
2.越早供,成本越低,供既時間越長,平均價越低
3.回報等如現價與平均成本差距,可見相差最多只係80%,即係你總回報,可能只有20-80%(10年計),所以沽既時機要準,只能等到高位沽,先著數

遲下有機會再講
1.股票同債券,點解要100%股票
2.有冇可能有方法比月供不理更好?

700 騰訊 Q3 2018 業績 (建議先看業績再看這個)

圖1:公司各業務收入及總收入按季同比

紅虛線係騰訊收入增長率，2015年Q3增長開始加快,但到左2017年Q3之後開始增長放緩，主要影響係增值服務收入(遊戲同埋媒體(視頻及音樂))，2015年Q4 王者榮耀出，係主要推動力，仲有其他收購合併，一路推左2年高增長，但之後政府唔批遊戲，食雞又無得收費，加上整體遊戲市場增長高峰過左，增長就大縮，其實手遊日流水俾錢就查到，所以大行跟得好貼，一見唔對路就沽，雖然5月出既2018Q1收入仲係靚仔，但騰訊已經領跌大市。

其他業務/廣告收入增長都仲係高，但果兩樣野佔比仍然較低，要影響收入增長仲要D時間，

收入之後，緊係睇毛利，賺到錢先最緊要，其實騰訊毛利率一直跌，好多原因

市場競爭加大，騰訊有自家平台亦有分銷平台，之前多自主業務，毛利率較高，遊戲比較簡單，而且好多都係照抄返黎，成本低，但高毛利率既業務好快多人入黎爭，要開始創造比較複雜既遊戲，毛利率受影響。另外，分銷既音視/視頻都係毛利率較低既業務，佔比持續增加。主要係業務結構變化導致毛利率持續下降。但有個奇怪既地方係毛利率跌，營運利潤率唔跌,淨利潤率都唔跌，中間開支控制得好? 並唔係，做遊戲其實要唔少宣傳費/員工費等等，毛利率跌一定會有影響，唔跌係因為中間多左樣叫其他經營淨收益(投資收益)既野。

呢個收益佔營業利潤金額一直大升，佔營業利潤比率一直升，係由2017年開始。呢舊野係乜?我都唔知，大約係一D佢投資過既公司公允值上升導致既收益，Q3寫係因為美團點評(騰訊有持股)公允值收益上升，呢個公允值係會計計既，騰訊有太多投資係出面D新企業，所以散戶基本上好難計返呢粒數，其實公允值上升佢係無錢賺到返黎，只係賬面值上升，所以我試下抽起呢粒數，唔包佢係營業利潤入面，再計一次營業利潤增長，下圖

收入，毛利，營業利潤(不包其他收益)，就係咁，點解我會話騰訊Q3業績其實係好差就係咁，毛利只有12%增長，係上市以來最低單季增幅，扣左其他收益，營業利潤得返1.X%增長，都係最差既一季，之前十幾季度，騰訊就算扣左其他收益，利潤都有20-30%增長，最高去過50-60%添，所以佢有40-50倍PE好合理，但如果騰訊增長得返0-10%或者10-20%，PE應該落返去20-30倍，而家係28.8倍。所以我認為，騰訊下跌空間略大於上升空間。

騰訊攪成咁，除左公司內部因素，外部因素都有影響，中央唔批新遊戲收費，攪好多政策令到D人打少D機，係令到騰訊最近增長咁慢既主因，其實整個遊戲市場都係受呢方面影響緊。人總不能多年都花時間打機，都會有周期，高增長過左又變返低增長，騰訊係咪無可能再高增長?又未必，但要時間轉型，其實一直都轉緊，遊戲收入比重一直跌，但遊戲利潤比重好難跌，遊戲利潤率太高，所以騰率要行好遠既路令低利潤率既業務佔比超過遊戲。

除非騰訊個價去到200蚊(若20倍PE)，否則，無咩興趣買黎坐。

2018年中央打壓的行業

1.光伏(2018年06月01日)
國家發展改革委、財政部、國家能源局於6月1日晚間發布的光伏新政，內媒《澎湃新聞》分析指這是給近年來高速發展的中國光伏產業踩下一腳「急刹車」。分析指出，出台如此嚴厲的新政，根本原因在於補貼壓力太大，且短期內難以解決。據統計，截至2017年底，可再生能源補貼缺口已達到1,000億元人民幣。

2.教育股(2018年08月13日)
中國司法部發布「民辦教育促進法實施條例（（送審稿）」，送審稿需要特別引起注意的是第十二條中「實施集團化辦學的，不得通過兼併收購、加盟連鎖、協議控制等方式控制非營利性民辦學校」

3.殯葬(2018年9月7日)
民政部官網公佈《殯葬管理條例》徵求意見稿，當中包括完善基本殯葬公共服務、強化公益導向作為修訂重點，內容提及，為整治殯葬商品和服務價格虛高亂象，多項殯葬服務內容被確定實施政府指導價和政府定價，並將會有步驟地實行火葬。

4.藥股(2018年9月11日)
中國國家醫療保障局公布的第一批帶量採購清單中，一共有 33 個藥品參加試點採購。若參與的企業大於等於 3 家企業，為充分競爭，以價低者得，預估降價幅度為 40%。若兩家競爭為不充分競爭，企業主動降價，並高於平均降幅，預估降價幅度為 20%；若僅一家競標是無競爭，談判降價，預計降幅為 10%。

5.燃氣股(2018年10月02日)
據重慶人大官方網頁公布，重慶人大會議發出《關於取消天然氣初裝費減輕群眾負擔的建議》，建議推進價格改革的進程中取消天然氣初裝費，減輕群眾負擔，指取消天然氣初裝費客觀條件已經具備。

6.手遊

禁卡牌類

分級制

限小童遊玩時間

7.人民幣貶值而死
紙股,航空股

同一個行業入面,如何選擇公司投資?

睇緊過去9年升幅超過300%既股票...
見到大快活,就係度諗 ...
點解佢可以升到590%,但同業大家樂,只有60%升幅
9年間相差幅度可以咁大? 我樓下果兩間大家樂同大快活,日日都係有咁多人買野
唔覺一間特別多,另一間特別少人...價格兩家都有加
兩間都要面對一樣既問題,人工,鋪租,食材價格等上升
兩間都有一樣既機會,普遍多左人外出食飯
兩間野賣既野都差唔多,肉醬意粉,粟米肉粒,西多,紅豆冰
大家樂肉醬意粉有唔少FANS添(包括我) 但係反而大快活跑贏左

我就開始時光倒流,想知道如果我係2009年,兩間公司揀一間投資 我應該從咩地方入手先會揀到大快活,而唔係揀左大家樂...
我如果由業績開始入手,會見到幾樣野
2009年7月出既全年業績比較
收入增長,大家樂+9.1%,大快活+2.2%
毛利增長,大家樂-1.4%,大快活-4.8%
毛利率及變化:大家樂毛利率下降1個百分點至16.2%,大快活毛利率降1個百分點至12.8%
淨利潤增長,大家樂-9.0%,大快活減20%
就單睇呢年既年報,好似睇唔到我應該揀大快活

睇後一年2010年
收入增長,大家樂+4.5%,大快活+6.6%
毛利增長,大家樂+10%,大快活+15.8%
毛利率及變化:大家樂毛利率上升0.8個百分點至17.1%,大快活毛利率升1.1個百分點至13.9%
淨利潤增長,大家樂+16.2%,大快活+16.6%
2010年大快活係好D,但係咪足以令我地揀返大快活?
唔睇比率,睇返9年黎兩家公司收入及利潤
收入
2009年:大家樂46.73億,大快活14.65億
最近:大家樂84.27億,大快活28.4億
大家樂+80%,大快活94% 利潤
2009年:大家樂4.41億,大快活0.8億
最近:大家樂4.58億,大快活2.1億
大家樂+4%,大快活162%

個原因開始出現,大家樂利潤升唔起
大家樂自2011年開始利潤率下跌,毛利率下跌是主因
大家樂2009年毛利率是16.2%跌到最近係12.4%,減3.8% 淨利潤率係9.45%降至5.45%,減4%,明顯是受毛利率下跌影響
大快活,2009年毛利率是12.8%最近係14.3%,升1.5%,比大家樂還要高
淨利潤率係5.45%升至7.6%,升2.2%,開支都有改善,比大家樂都要高

點解有咁大差別?

上面係各項成本佔收入比例
可以見到,大快活成本控制上將員工成本轉移至食材上
大家樂都有,但幅度不及大快活大,所以成本上漲較大,影響毛利率
舉個例子,唔知幾時開始大快活既西多士已經無左花生醬,但大家樂仲保持有,不過最近大家樂既西多都無左花生醬了....

睇2009年其他盈利比率
ROE:大家樂18.6%,大快活21.5%
ROIC:大家樂20.7%,大快活18.4%

再睇其他比率
大家樂2009年P/E:20.77,現時P/E:24.67 大快活2009年P/E:10.17,現時P/E:17.80
P/E其實係結果,點解大快活P/E估值可以有70%提升,但大家樂只有20%...
我估係因為利潤率改善影響....

再睇其他資料
2009年7月,大家樂香港店鋪總數246家,其他類餐廳39家及內地及海外131家,北美168家,總數584
2018年3月底大家樂香港店鋪總數298家,其他類餐廳68家及內地97家,總數463
香港店升28%,總分店減少,無左北美及海外

2018年3月底大快活營運145間分店,134間快餐,11間特色餐廳,10間於內地
2009年3月底大快活營運111間分店,94間快餐,4間特色餐廳,13間於內地
香港店升幅37%,總數目升30.6%

睇股價走勢圖,2013年初至2014年初,大快活根本無升,橫行
但大家樂一直向上升........ 如果你有朋友揀大家樂,你揀大快活,果13-14個月你會好痛苦 你會開始質疑,點解唔升.......

結論
單憑營運數據,係睇唔到點解毛利率會有咁既變化,邊個會估到大快活成本控制得咁好,而大家樂員工成本升得勁過大快活,大家都係請差唔多既人做野
雖然要2009年揀中大快活買入持有到而家真係好難 但都有幾樣野值得講下
1.要KEEP住將自己持有既公司經營數據同同業比較,如果超過一年半都差過就要減持/考慮換
2.將自己持有既股票股價走勢同同業比較,若果差過同業,要考慮換馬
3.高低P/E其實無影響,高PE持續做好都可以跑贏同業,但低PE做得好左,跑贏幅度會更大
4.高低毛利率都係無咩影響,高毛利率睇落競爭力強過同業,但毛利率係可以有升跌,低毛利率反而有上升空間,但當然提升毛利率唔容易
5.ROE值得參考,但ROE都係可以有升跌,要KEEP住高ROE唔易,當然係一個值得參考指標
6.規模較大既大家樂今次明顯無優勢,規模效應提升競爭力不存在....

其實兩間公司差距主要係一間做得好左,另一間做得差左,取決於管理層既決定,最後都係人既決定
今次呢個例子,外部因素同營運數據都俾唔到任何決斷性優勢,最後只能歸為內部因素

毛利率及利潤率提升,都係管理做既野去影響,唔會係外部因素影響到(因為外部因素大家一樣) 如果係同一個行業,同一地區經營相同業務,就要搵一班好既管理層
但投資者可能面對較多既係,首先,應該要揀邊個行業黎投資? 下次或者再講下,揀行業更為複雜及困難

一周大事回顧(2018年9月第一周)

第一單,最近多左人講社保徵繳新規,其實睇d文章寫到影響好大,但反而唔多人講 

少少背景資料

7月20日，中共中央辦公廳、國務院辦公廳印發了《國稅地稅徵管體制改革方案》，要求從2019年1月1日起，將基本養老保險費、基本醫療保險費、失業保險費、工傷保險費、生育保險費等各項社會保險費交由稅務部門統一徵收。8月20日，國稅總局、人社部等五部委聯合召開會議，提出在今年12月10日前完成社保費和第一批非稅收入職責劃轉交接工作。

影響

有人話會令全國企業盈利大減1.2萬億,有人話工資收入會減少(因被扣減先再出糧),我睇左幾篇文,簡單d解釋下,其實內地一直有收社保錢,即係上面果幾種,但之前就分開收,而家就稅局統一收,點解會咁?係因為之前d企業好多都用方法避交,俾少左,果d部門無能力查到係咪交齊,但今次改稅局統一收,收足既機會就大左,稅局同你計返之前交少左果d,一次過補交,所以會有幾大既影響,有d新聞話中小企要補交百幾萬,會可能引發倒閉潮或裁員潮...

中央明知經濟增長放緩緊都點解要咁做,真實原因我地未必知,但有人話係因為老人化,如果而家唔糾正唔追收,遲下就無錢俾d老人,制度就會崩潰,所以要急急追收,以防日後無錢出引發動亂...2019年其中一隻黑天鵝,要小心防避

相關新聞 http://news.stcn.com/2018/0907/14503301.shtml

第二單, 土地流拍

其實一直都有,但最近多人講,流拍多左,我估主要係因為之前內房舉債困難影響,無錢買地,流拍自然多,8 月內房銷售數仍然強, 但可能中小型房企或經營較差既,遲下會有問題浮現 https://www.hk01.com/%E5%A4%96%E5%AA%92%E8%A6%96%E9%BB%9E/231245/%E6%97%A5%E5%AA%92-%E4%B8%AD%E5%9C%8B%E5%9C%9F%E5%9C%B0%E5%B8%82%E5%A0%B4%E6%B5%81%E6%8B%8D%E6%B9%A7%E7%8F%BE-%E8%88%87%E6%94%BF%E5%BA%9C%E8%AA%BF%E6%8E%A7%E6%9C%89%E9%97%9C

第三單,係一篇係sina出既文,講美國家庭債務變化,其實唔太知數據有幾真,但咁睇又真係幾唔樂觀... 之前睇過一篇話一元店收入大旺,雖然經濟增長強勁,但仍然有好多人去一元店買野

美國經濟係咪無風險? 又未必

實際中等家庭收入現已超過1999年的歷史記錄，2018年第一季度家庭總負債已超過13萬億美元，比2008年前的峰值還要高出5000億美元。2007年，中等家庭收入達到了58149美元的峰值，然後在信貸週期跌落懸崖，在金融危機來臨的2008年第三季度，信貸週期達到了頂峰。

http://finance.sina.com.cn/stock/usstock/c/2018-09-06/doc-ihitesuy9024774.shtml

第4單,講左好耐既美國對中國既2千億關稅清單,好快實施,如果繼續發展落去,股市好難有運行

http://www2.hkej.com/instantnews/international/article/1887444/%E7%BE%8E%E5%9C%8B%E5%85%AC%E5%B8%832000%E5%84%84%E7%BE%8E%E5%85%83%E4%B8%AD%E5%9C%8B%E8%B2%A8%E9%97%9C%E7%A8%85%E6%B8%85%E5%96%AE