我用咗 OpenClaw（以下簡稱「龍蝦」）差唔多一個月，累積咗啲經驗想同大家分享。呢篇文主要係講觀念，唔係技術教學，亦唔係應用示範——安裝教學 YouTube 上面大把，我自己都係自學，所以安裝唔難。真正重要嘅問題係：龍蝦對你嚟講有咩用？ 呢個問題每個人嘅答案都唔同。龍蝦係一個百寶箱，我用嘅工具未必啱你，所以呢篇文嘅目的係幫大家建立正確觀念，等你用龍蝦或者其他 AI 工具嗰陣，識得搵到真正幫到自己嘅嘢。
寫喺最前面：認清龍蝦嘅本質
首先要講清楚一件事：OpenClaw 本身唔係設計俾普通用戶用嘅商業產品。 佢係由奧地利開發者 Peter Steinberger 一個人基於興趣做嘅開源項目，同一般商業軟件經過多重測試審核完全係兩回事。佢需要有一定程式基礎嘅人先至能順利操作，如果你經驗唔多甚至零經驗，你會遇到好多問題要靠自己解決。
呢個項目係全新嘅 AI Agent 架構，全世界都仲喺探索緊，所以千祈唔好期望龍蝦係完美嘅。冇人需要為佢負責——佢唔係商業工具，冇客服、冇售後，出咗問題你要識得自己搞。
龍蝦可以幫你做啲咩？
你可以將龍蝦想像成一個 AI 助理/秘書，你指派任務俾佢，佢就幫你喺電腦上面執行。所以第一步，你要搞清楚自己平日需要咩資訊、有咩嘢要做。
以我自己為例，我做投資，所以我用龍蝦幫我自動監察每日需要留意嘅金融資訊。
對一般人嚟講，可能有用嘅場景包括：
整理 To-do List 同行事曆提醒
自動收發同整理 Email
體重管理、健康記錄
讀書學習進度管理
定時提醒各種日常事務
但如果你平日 Email 都唔太需要理、又冇咩自我管理需求、或者已經有用開嘅工具（例如 Notion、Todoist），而且用得好好地，咁龍蝦未必會比你現有嘅方案更好。龍蝦唔係人人都有需要。
一個實用嘅判斷方法
如果你想試龍蝦，先諗下：你有冇 10 件嘢係需要一個程式每日幫你做嘅？ 如果你諗嚟諗去只係偶然先用得著一次，其實唔一定要用龍蝦。從你每日花最多時間嘅重複性工作入手，諗下邊啲可以交俾呢個 AI 助理去做。
玩龍蝦之前嘅心理準備
1. 你要肯學新嘢
最大嘅挑戰係你會接觸到大量完全陌生嘅概念——API、Token、Docker、MCP、JSON 呢啲程式相關術語會不斷出現。心理準備係：你要肯學、肯查、肯問。建議你手邊有另一個 LLM（例如 ChatGPT、Claude）可以隨時問問題。當然，AI 答完你都未必即刻明，有時搵個識嘅人問會快好多。
2. 你要鍾意「砌積木」
龍蝦係需要你自己 Build 一個專屬助理出嚟嘅，唔係你講一句佢就完美做到曬。個過程好似砌積木：
AI 負責幫你砌，但積木要你自己搵俾佢
你要指示佢點砌，AI 有自己嘅想法，但未必同你心目中一樣
你要識得搵工具（Skills）俾佢用，佢會話你知需要咩，但搵嘅過程係你嘅責任
如果你唔鍾意呢種自己動手摸索嘅過程，龍蝦真係唔適合你。
3. 唔好期望一步到位
你見到其他人分享嗰啲好勁嘅功能，例如自動交易系統、全自動工作流程，背後通常係有技術背景嘅人花咗大量時間同 Token 去建嘅。好似如果你想隻龍蝦變到好似富途（Futu）呢類平台，其實無可能，富途（Futu）背後有成隊專業開發團隊，而你用龍蝦就只有你 + AI 兩個，AI 亦未必有嗰啲團隊嘅專業知識。
所以複雜嘅功能要做好多步驟、用好多 Token，大部分人暫時都只係做到一啲相對簡單嘅自動化。想做到嗰啲被廣傳嘅「傳說級功能」，你自己都要有技術底同創意，唔好以為淨係靠 AI 叫佢模仿就得——除非人哋已經開源分享咗。
小提示： ClawHub 上面可以公開下載嘅 Skills 都係開源嘅，但最強嘅 Skill 未必會公開。
大家最關心嘅問題：安全性
呢個係好多人最擔心嘅部分，而且的確值得認真對待。
部署方式決定風險高低
核心原則：唔好喺你日常用嘅主力電腦上面裝龍蝦。
龍蝦係一個擁有高系統權限嘅工具，可以存取你嘅 Email、日曆、檔案系統等等。如果配置不當，有機會誤刪檔案或者洩露私隱。
兩個比較穩陣嘅方案：
用雲服務（推薦）：將龍蝦部署喺雲端，同你嘅本地電腦完全隔離。好處係就算出事都唔會影響你自己部機。壞處係啲整理本地檔案嘅功能自然用唔到，但呢啲未必人人需要。
用閒置嘅電腦：如果你有部唔用嘅 PC 或者 Mac，可以裝喺上面。PC 裝 Linux 會比較適合，Mac 都可以直接用。
我自己嘅方案
我用緊雲服務商 Zeabur，佢係一個 PaaS 平台，一鍵就可以部署 OpenClaw。費用方面，Zeabur 實際月費視乎你嘅用量而定。我自己大約用緊 10 美金嗰個計劃，對一般用途嚟講足夠。其他選擇仲有 DigitalOcean（最平 12 美金/月起）、Vultr 等等，揀邊間睇你自己需要。
帳戶安全嘅建議
其他方面嘅安全性其實好容易處理：
開新帳號去試：無論係 Email、Calendar 定其他服務，先用新開嘅帳號或者閒置帳號去接駁龍蝦
試一段時間覺得可靠，先考慮轉返主帳號
Email 怕被清洗？開個新 Email，將主 Email 入面啲唔涉及私隱嘅內容搬過去試
我自己而家所有接駁龍蝦嘅服務都係用新帳號或者閒置帳號
額外提醒： 第三方 Skills 有安全風險。曾經有安全研究發現，有啲第三方 Skill 會喺你唔知嘅情況下進行數據竊取同 Prompt Injection。所以安裝 Skills 之前一定要睇清楚來源，盡量用 ClawHub 上經過掃描嘅官方 Skills。
玩龍蝦必備條件：你自己嘅 LLM 模型
呢個係最重要嘅一環。龍蝦只係一個中介框架，佢嘅能力完全取決於你接入嘅 LLM 模型。 龍蝦本身係 model-agnostic（模型無關）嘅，即係你可以接入唔同嘅大語言模型。
如果你完全未用過 LLM API，你需要學點申請同配置。以下係幾個入門建議：
免費或低成本嘅選擇
NVIDIA NIM NVIDIA 提供嘅 API 平台，有免費額度，唔需要 VPN 有使用限制，限制每分鐘 40 次請求， 回覆速度未必快
重要澄清： 上面講嘅「免費」都係指有免費額度或者試用期，唔係真正無限免費任用。用量大嘅話最終都要付費。另外，網上有啲「逆向工程」嘅免費 API 項目，呢啲唔係官方服務，穩定性同合法性都有風險，唔建議長期依賴。
付費但更穩定嘅選擇
如果你想要更穩定嘅體驗，可以考慮：
Anthropic Claude（透過 API）
OpenAI GPT 系列
Google Gemini
OpenRouter（一個整合多個模型嘅平台，方便比較同切換）
揀模型嘅時候，主要考慮：推理能力、回覆速度、Token 價格、同埋你嘅使用場景。唔同模型各有長短，可以先用免費額度試下，搵到適合自己嘅再考慮長期使用。
總結
龍蝦係一個好強大嘅工具，但佢唔係一個即開即用嘅商業產品。玩之前，問自己三個問題：
我有冇明確嘅日常需求需要自動化？
我願唔願意花時間去學習同摸索？
我有冇做好安全措施嘅準備？
如果三條都答得到「有」，咁龍蝦值得你去試。如果冇，可能等佢再成熟啲、或者等有更易用嘅商業化方案出嚟再考慮都唔遲。
最後更新：2026 年 3 月 12日
沒有留言:
張貼留言